ນະຄອນ ຫຼວງພະບາງ ມອບ​ຈັກຕັດຫຍ້າໃຫ້ປະ​ຊາ​ຊົນ​ມີ​ສ່ວນ​ຮ່ວມອະ​ນາ​ໄມ​ແຄມ​ທາງ

ການມອບເຄື່ງຈັກຕັດຫຍ້າໃນຄັ້ງນີ້ ແນໃສ່ສະໜອງອຸປະກອນ ໃຫ້ແກ່ບັນດາບ້ານທີ່ຢູ່ລຽບຕາມເສັ້ນທາງສາຍຫຼັກ ໂດຍສະເພາະ ເຂດເສັ້ນທາງເລກທີ 13 ເໜືອ, ເສັ້ນທາງໄປສະຖານີລົດໄຟ ລາວ-ຈີນ (ນະຄອນ ຫຼວງພະບາງ), ເສັ້ນທາງເລກທີ 2501 ໄປຫາອຸທິຍານແຫ່ງຊາດນ້ຳຕົກຕາດກວາງຊີ, ເພື່ອຊຸກຍູ້ໃຫ້ຄະນະກຳມະການປົກຄອງບ້ານ ແລະປະຊາຊົນ ໄດ້ມີສ່ວນຮ່ວມເຂົ້າໃນການບົວລະບັດຮັກສາ ແລະຕັດຫຍ້າ ບໍລິເວນແຄມເສັ້ນທາງ ໃຫ້ມີຄວາມສະອາດງາມຕາຕະຫຼອດລະດູການ, ຮັບປະກັນຄວາມປອດໄພໃນການສັນຈອນ ທັງຫຼຸດຜ່ອນອຸບັດຕິເຫດຕາມທ້ອງຖະໜົນຫຼວງ ແລະເພີ່ມທັດສະນະວິໄສທັດ ໃນການຂັບຂີ່ໃຫ້ມີຄວາມປອດໄພສູງຂຶ້ນ, ຮັກສາພາບພົດອັນດີງາມຂອງຕົວເມືອງທ່ອງທ່ຽວລະດັບໂລກ.

ທ່ານ ສະເຫວີຍ ສີລາວັນ ໄດ້ຊີ້ນຳໃຫ້ບັນດາບ້ານ, ແຕ່ລະພາກສ່ວນຢູ່ໃນສັງຄົມ, ຈົ່ງເພີ່ມທະວີຄວາມເອົາໃຈໃສ່ໃນການ ອອກແຮງງານລວມຕັດຫຍ້າທີ່ຮົກເຮື້ອຕາມແຄມທາງ, ເກັບມ້ຽນຂີ້ເຫຍື້ອຕາມແຄມທາງ, ດິນທີ່ເປົ່າຫວ່າງ ໃຫ້ມີຄວາມສະອາດງາມຕາ ແນໃສ່ເຮັດໃຫ້ນັກທ່ຽວທ່ອງ ທີ່ເຂົ້າມາທ່ຽວຊົມນະຄອນ ຫຼວງພະບາງ ໃຫ້ມີຄວາມປະທັບໃຈ, ສະກັດກັ້ນກຸ່ມຄົນບໍ່ດີທີ່ຖິ້ມຂີ້ເຫຍື້ອຊະຊາຍ, ເພີ່ມທະວີຄວາມເອົາໃຈໃສ່ເກັບມ້ຽນຂີ້ເຫຍື້ອທີ່ບໍ່ມີເຈົ້າຂອງ.

ສຳລັບເຄື່ອງຈັກຕັດຫຍ້າທີ່ນຳມາມອບໃນຄັ້ງນີ້ ມີທັງໝົດ 28 ເຄື່ອງ, ມອບໃຫ້ຈຳນວນ 28 ບ້ານ, ມູນຄ່າທັງໝົດ 89 ລ້ານກວ່າກີບ.

ພາບ-ຂ່າວ: ທອງດາ ທີບພະວົງ