ກອງປະຊຸມ, ໄດ້ຮັບຟັງຄໍາຊີ້ແຈງ ຕໍ່ຄໍາຊັກຖາມທີ່ ສສຊ ແລະ ສສ ນວ ຍົກຂຶ້ນໃນກອງປະຊຸມ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 5 (2021-2025) ຄັ້ງທີ IX ປະຈໍາປີ 2025 ແລະແຜນການເຄື່ອນໄຫວປະຈໍາປີ 2026 ຂອງນະຄອນຫຼວງ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃນໄລຍະ 5 ປີ (2021-2025) ແລະ ທິດທາງຕໍ່ໜ້າ.
ສະຫາຍ ວຽງສາລີ ອິນທະພົມ ຮອງຫົວໜ້າພະແນກການເງິນ ນະຄອນຫຼວງວຽງຈັນ, ໄດ້ຊີ້ແຈງບາງຕອນ ວ່າ: ສໍາລັບການແກ້ໄຂໜີ້ສິນ ນະຄອນຫຼວງວຽງຈັນ ກໍເອົາໃຈໃສ່ໃນການແກ້ໄຂໜີ້ສິນ ບັນດາໂຄງການລົງທຶນ ຊຶ່ງສະແດງອອກໃຫ້ເຫັນ ໃນໄລຍະ 5 ປີຜ່ານມາ ນັບແຕ່ປີ 2021 ເປັນຕົ້ນມາ ນະຄອນຫຼວງວຽຈັນ ມີໂຄງການທີ່ມີໜີ້ສິນທັງໝົດ 278 ໂຄງການ ລວມມູນຄ່າຄ້າງຊໍາລະທັງໝົດ 2,996.85 ຕື້ກີບ, ໃນນັ້ນເປັນໂຄງການທີ່ມີໜີ້ສິນແຕ່ປີ 2015 ຄືນຫຼັງ 78 ໂຄງການ, ລວມມູນຄ່າຄ້າງຊໍາລະ 382.07 ຕື້ກີບ. ໄດ້ນໍາໃຊ້ເງິນເກີນແຜນເຂົ້າໃນການແກ້ໄຂໜີ້ສິນໂຄງການລົງທຶນຂອງລັດ ທັງໝົດ 312.19 ຕື້ກີບ (ໃນນັ້ນ, ປີ 2021 ຈໍານວນ 35.27 ຕື້ກີບ, ປີ 2022 ຈໍານວນ 68 ຕື້ກີບ, ປີ 2023 ຈໍານວນ 76.74 ຕື້ກີບ, ປີ 2024 ຈໍານວນ 35.23 ຕື້ກີບ ແລະ ປີ 2025 ໄດ້ນໍາໃຊ້ເງິນເກີນແຜນ ຈໍານວນ 96.95 ຕື້ກີບ). ສາມາດປົດໜີ້ໂຄງການ ແຕ່ປີ 2015 ຄືນຫຼັງ ໄດ້ 49 ໂຄງການ, ເທົ່າກັບ 62.82% (ສະເພາະປີ 2025 ແມ່ນສາມາດປົດໜີ້ສິນ 2015 ຄືນຫຼັງ ໄດ້ 15 ໂຄງການ) ປັດຈຸບັນຍັງເຫຼືອ 29 ໂຄງການ, ລວມມູນຄ່າຄ້າງຊໍາລະ 282.17 ຕື້ກີບ. ສໍາລັບໂຄງການທີ່ມີໜີ້ສິນ ແຕ່ປີ 2016 ຮອດປັດຈຸບັນ ແມ່ນຍັງເຫຼືອ 160 ໂຄງການ (ລວມທັງໂຄງການເກີດຂຶ້ນໃໝ່ ໃນແຕ່ລະປີ), ລວມມູນຄ່າຄ້າງຊໍາລະ 1,674.44 ຕື້ກີບ.
ສໍາລັບແຜນສືບຕໍ່ໃນການແກ້ໄຂໜີ້ສິນ ໃນປີ 2026 ນະຄອນຫຼວງວຽງຈັນແມ່ນຈະໄດ້ສືບຕໍ່ສຸມໃສ່ແກ້ໄຂໜີ້ສິນໂຄງການລົງທຶນຂອງລັດ ດ້ວຍງົບປະມານປະຈໍາປີ (ບ້ວງປົກກະຕິ) ຊຶ່ງໃນປີ 2026 ໄດ້ຮັບເພດານງົບປະມານທັງໝົດ 46.5 ຕື້ກີບ. ໃນນີ້: ໄດ້ຈັດສັນທຶນໃສ່ໂຄງການໜີ້ສິນ 23.25 ຕື້ກີບ, ກວມເອົາ 50% ຂອງທຶນທັງໝົດ. ພ້ອມກັນນີ້, ກໍຈະໄດ້ສືບຕໍ່ຄົ້ນຄວ້າຊອກຫາແຫຼ່ງທຶນ ແລະ ທ່າແຮງອື່ນໆທີ່ມີ ເປັນຕົ້ນ: ເງິນເກີນແຜນ ປີ 2025 ຂອງນະຄອນຫຼວງ ແລະ ນະໂຍບາຍອື່ນໆ ທີ່ລັດຖະບານວາງອອກ ໂດຍເລັ່ງຊໍາລະໃຫ້ໂຄງການແຕ່ປີ 2015 ຄືນຫຼັງ ເປັນບຸລິມະສິດໃນການແກ້ໄຂ.
ຕໍ່ກັບຄໍາສະເໜີດັ່ງກ່າວ ໃນນາມ ພະແນກການເງິນ ນະຄອນຫຼວງວຽງຈັນ ແມ່ນເຫັນດີເປັນເອກະພາບຢ່າງສູງ ຖ້າເຮົາໄດ້ຮັບການບິແບ່ງລາຍຮັບດັ່ງກ່າວ ກໍຈະສາມາດເພີ່ມລາຍຮັບ-ລາຍຈ່າຍ ເພື່ອມາພັດທະນາ ນະຄອນຫຼວງວຽງຈັນອີກທ່າແຮງໜຶ່ງ ແຕ່ການຄຸ້ມຄອງໜ້າວຽກດັ່ງກ່າວ ແມ່ນການຄຸ້ມຄອງຂອງສູນກາງ ສະນັ້ນ, ກົນໄກໃນການຈັດຕັ້ງປະຕິ ບັດພະແນກການເງິນ ນະຄອນຫຼວງວຽງຈັນຈະໄດ້ຄົ້ນຄ້ວາ ແລະ ນໍາສະເໜີສູນກາງກໍຄືກະຊວງການເງິນ ເພື່ອພິຈາລະນາ ໃນການຈັດຕັ້ງປະຕິບັດຕື່ມ. (ຂ່າວ: ແສງຈັນ)
ຄໍາເຫັນ