ໂດຍການນໍາພາຂອງທ່ານ ນາງ ພອນມະນີ ບຸນຄ້ຳ ຮອງຫົວໜ້າຄະນະບໍລິຫານສາດ ພ້ອມດ້ວຍຄະນະ ໄດ້ລົງເຄື່ອນໄຫວທັດສະນະສຶກສາເປັນເວລາ 6 ວັນ (ວັນທີ 8-13 ທັນວາ 2024).
ໃນໂອກາດລົງທັດສະນະສຶກສາຄັ້ງນີ້, ຄະນະນັກສຶກສາ ແລະ ຄູ-ອາຈານ ສມປຊ ຍັງໄດ້ເຂົ້າຮ່ວມພົບປະແລກປ່ຽນບົດຮຽນ ຢູ່ໂຮງຮຽນການເມືອງ-ການປົກຄອງ ແຂວງຫຼວງພະບາງ ໃນວັນທີ 10 ທັນວາ 2024 ໂດຍການຕ້ອນຮັບຂອງທ່ານ ພູທອນ ຫຼວງວິໄລ ຫົວໜ້າໂຮງຮຽນການເມືອງ-ການປົກຄອງ ແຂວງຫຼວງພະບາງ ພ້ອມຄະນະ, ທ່ານໄດ້ລາຍງານສະພາບການຈັດຕັ້ງປະຕິບັດການຮຽນ-ການສອນ ຂອງໂຮງຮຽນການເມືອງ-ການປົກຄອງແຂວງ ໃຫ້ຂະບວນການທັດສະນະກ່າວ ຮັບຊາບໂດຍຫຍໍ້ວ່າ: ໂຮງຮຽນການເມືອງ-ການປົກຄອງແຂວງຫຼວງພະບາງ ມີພາລະບົດບາດສໍາຄັນໃນການກໍ່ສ້າງ-ຍົກລະດັບດ້ານທິດສະດີການເມືອງຂັ້ນຕົ້ນ, ຂັ້ນກາງ ແລະຝຶກອົບຮົມໄລະຍະສັ້ນ ໃຫ້ກັບພະນັກງານຫຼັກແຫຼ່ງ ຂອງບັນດາພະແນກການ, ບັນດາເມືອງ, ກົມກອງ ແລະບ້ານຕ່າງໆ ຕາມຫຼັກສູດ ຂອງສະຖາບັນການເມືອງ ແລະການປົກຄອງແຫ່ງຊາດ ໄດ້ກໍານົດໄວ້.
ໂອກາດນີ້, ນັກຄົ້ນຄວ້າປະລິນຍາໂທ ຮຸ່ນທີ XIX ສາຂາການປົກຄອງ ຍັງໄດ້ປະກອບສ່ວນຊ່ວຍສັງຄົມເປັນຕົ້ນໄດ້ອຸປະຖຳວັດຖຸອຸປະກອນການຮຽນ-ອຸປະກອນຫຼິ້ນກິລາຄິດເປັນມູນຄ່າທັງໝົດ 4 ລ້ານກີບ ມອບໃຫ້ໂຮງຮຽນມັດທະຍົມສົມບູນເມືອງງອຍເພື່ອໃຫ້ນ້ອງເຍົາວະຊົນໄດ້ນຳໃຊ້ເຂົ້າໃນການຮຽນ, ການຫຼີ້ນກິລາ.
ການໄປທັດສະນະຄັ້ງນີ້, ນັກຄົ້ນຄວ້າປະລິນຍາໂທ ຮຸ່ນທີ XIX ສາຂາການປົກຄອງແມ່ນໄດ້ ບົດຮຽນ, ປະສົບການດ້ານປະຫວັດສາດ ແລະ ວັດທະນະທໍາ, ຄວາມຮູ້ກ່ຽວກັບວິທີການພັດທະນາການທ່ອງທ່ຽວແບບນິເວດຜ່ານສະຖານທີ່ສຳຄັນເຊັ່ນ: ນ້ຳຕົກຕາດກວາງຊີ, ພູດອຍ ເມືອງງອຍ, ສວນອຸທິຍານຕາດຮ້ອຍຄົວ, ການດຳລົງຊີວິດ ແລະເສດຖະກິດຊຸມຊົນຂອງປະຊາຊົນນະຄອນຫຼວງພະບາງເຊັ່ນ: ການເຮັດຜ້າໄໝຢູ່ບ້ານຜານົມລວມທັງບົດບາດການທ່ອງທ່ຽວໃນເສດຖະກິດທ້ອງຖິ່ນ.
(ຂ່າວ: ຕາອັອດ ແສນທະວີສຸກ)
ຄໍາເຫັນ