ນໍ້າກັດຢໍລະປາ ມີຫຼາຍກິດຈະກໍາທີ່ໜ້າໃຈ ພ້ອມສໍາຜັດອາກາດໜາວເຢັນ

ພ້ອມນັ້ນ,ຍັງມີເດີ່ນຈອດລົດທີ່ກວ້າງຂວາງ, ສິ່ງສໍາຄັນສະຖານທີ່ທ່ອງທ່ຽວທໍາມະຊາດນໍ້າກັດຢໍລະປາ ແມ່ນມີຫຼາກຫຼາຍກິດຈະກໍາທີ່ໜ້າສົນໃຈ ແລະ ໜ້າສໍາຜັດໂດຍສະເພາະໄລຍະນີ້ທ່ານຈະໄດ້ສໍາຜັດກັບອາກາດໜາວເຢັນຕື່ມອີກ.
ທ່ານ ສິງໄຊ ທອງເງິນງາມ ພະນັກງານຮັບຜິດຊອບກ່ຽວກັບກິດຈະກໍາຕ່າງໆຢູ່ສະຖານທີ່ທ່ອງທ່ຽວທໍາມະຊາດນໍ້າກັນຢໍລະປາ ໄດ້ໃຫ້ສຳພາດຕໍ່ນັກຂ່າວໜັງສືພິມ ປະຊາຊົນເມື່ອບໍ່ດົນມານີ້ວ່າ: ປັດຈຸບັນ ສະຖານທີ່ທ່ອງທ່ຽວທໍາມະຊາດນໍ້າກັດຢໍລະປາ ແມ່ນໄດ້ຮັບການພັດທະນາຂຶ້ນເປັນລໍາດັບ, ມີຫຼາກຫຼາຍກິດຈະກໍາທີ່ໜ້າສົນໃຈ, ສໍາຜັດ ແລະ ມີອັນໃໝ່ໆໃຫ້ຜູ້ມາທ່ຽວໄດ້ທ່ຽວຊົມ ໂດຍສະເພາະຈະມີຫຼາກຫຼາຍກິດຈະກໍາ ເໝາະສໍາລັບນັກທ່ອງທ່ຽວທັງພາຍໃນ ແລະ ຕ່າງປະເທດທີ່ມັກຮັກໃນການພະຈົນໄພ ແລະ ມັກກັບສິ່ງທ້າທາຍໄດ້ລອງສໍາຜັດເປັນຕົ້ນກິດຈະກໍາຂີ່ລົດຂຽວຊົມນໍ້າຕົກຕາດນໍ້າກັດຢໍລະປາ, ຂີ່ສະລິງ 11 ເສັ້ນ, 4 ເສັ້ນ, ສະລິງກາເຟ, ມີຕາໜ່າງແມງມຸມ, ຍ່າງເລາະຊົມຕົ້ນໄມ້ໃຫຍ່, ຍ່າງປ່າ 6 ຊົ່ວໂມງ, ຍ່າງປ່າຊົມດອກໄມ້ 3 ຊົ່ວໂມງ ແລະ ກິດຈະກໍາຕັ້ງແຄມປິງ ເພື່ອນອນແຮມຄືນສໍາຜັດອາກາດໜາວເຢັນໃນຍາມລາຕຣີ ແລະ ອື່ນໆ. ພ້ອມນັ້ນ, ຍັງມີກິດຈະກໍາ ເອົາໃຈຜູ້ທີ່ມັກຮັກໃນການຍ່າງປ່າ ຂຶ້ນພູຍາຄາຊົມທໍາມະຊາດຫຼາຍຊົ່ວໂມງ ແລະ ນອນແຮມຄືນ ມີກິດຈະກໍານອນ 1 ຄືນ ກັບ 2 ວັນ ແລະ 2 ຄືນ ກັບ 3 ວັນ. ໃນການຍ່າງຂຶ້ນພູຍາຄາຈະໃຊ້ເວລາ 7 ຊົ່ວໂມງ ແລະ ເວລາກັບປະມານ 3-4 ຊົ່ວໂມງ.ສ່ວນລາຄາແຕ່ລະກິດຈະກໍາ, ເວລາໃຫ້ບໍລິການແມ່ນຈະມີຄວາມແຕກຕ່າງກັນໄປ, ທີ່ສໍາຄັນລາຄາບໍ່ແພງ ແຕ່ກໍກຸ້ມຄ່າທີ່ສຸດ. ໃນນັ້ນ, ສະຖານທີ່ແຫ່ງນີ້ຍັງມີຫໍພິພິທະພັນຊີວະນານາພັນ, ອ່າງປາຄາບ ໃຫ້ນັກທ່ອງທ່ຽວທັງພາຍໃນ ແລະ ຕ່າງປະທດ ໄດ້ເຂົ້າທ່ຽວຊົມໂດຍບໍ່ເສຍຄ່າ. ເຫັນໄດ້ວ່າປີ 2024 ນີ້ ມີນັກທ່ອງທ່ຽວເຂົ້າມາທ່ຽວສໍາຜັດກັບກິດຈະກໍາຕ່່າງໆ ຢູ່ສະຖານທີ່ແຫ່ງນີ້ ເປັນຈໍານວນຫຼາຍ ແລະ ຫຼາຍກວ່າທຸກໆປີ ໂດຍສະເພາະໃນໄລຍະບຸນເທດສະການວັນສໍາຄັນຕ່າງໆ, ວັນເສົາ-ອາທິດ ຈະມີນັກທ່ອງທ່ຽວລາວ, ນັກທ່ອງທ່ຽວຈີນ ແລະ ອື່ນໆເຂົ້າມາທ່ຽວຫຼາຍທີ່ສຸດ.
ທ່ານ ສິງໄຊ ທອງເງິນງາມ ຍັງຝາກເຖິງນັກທ່ອງທ່ຽວທັງພາຍໃນ ແລະ ຕ່າງປະເທດ ຖ້າໄດ້ເຂົ້າມາທ່ຽວ ຫຼື ຢ້ຽມຢາມເມືອງໄຊ ແຂວງອຸດົມໄຊ ກໍຢ່າລືມ-ຢ່າພາດໃນການມາທ່ຽວສະຖານທີ່ທ່ອງທ່ຽວທໍາມະຊາດນໍ້າກັດຢໍລະປາ ເພາະສະຖານທີ່ແຫ່ງນີ້ ຍັງມີຫຼາກຫຼາຍກິດຈະກໍາທີ່ໜ້າສົນໃຈ, ທ້າທາຍລໍໃຫ້ທ່ານໄປສໍາຜັດດ້ວຍຕົວເອງ. ລາວທ່ຽວລາວສົ່ງເສີມລາວ ສົ່ງເສີມເງິນກີບລາວ.