ແລະ ໄຫຼປ່ອງໃສ່ກັນ ຈຶ່ງເກີດມີນໍ້າຖ້ວມຊຸ, ນໍ້າຖ້ວມຍຶ່ງ ຢູ່ບັນດາບ້ານທີ່ຢູ່ພື້ນທີ່ຕໍ່າ, ເຮັດໃຫ້ເສັ້ນທາງ, ລະບົບໂທລະຄົມມະນາຄົມ, ໄຟຟ້າ, ນໍ້າປະປາ ໄດ້ຖືກຕັດຂາດ, ພື້ນຖານໂຄງລ່າງຂອງເມືອງຫຼວງນໍ້າທາ, ທີ່ຢູ່ອາໄສ, ເຮືອນຊານບ້ານຊ່ອງ, ພື້ນທີ່ທໍາການຜະລິດ, ຊັບສິນຂອງປະຊາຊົນ ຖືກຜົນກະທົບເສຍຫາຍຢ່າງໜັກໜ່ວງຊຶ່ງໄດ້ສົ່ງຜົນກະທົບຕໍ່ການດໍາລົງຊີວິດຂອງປະຊາຊົນ ແລະ ເຮັດໃຫ້ການເຂົ້າຊ່ວຍເຫຼືອປະຊົນພົບຄວາມຫຍຸ້ງຍາກລໍາບາກ.ແນວໃດກໍຕາມ ມາຮອດປັດຈຸບັນ ທຸກພາກສ່ວນ ໂດຍສະເພາະ ຄະນະຮັບຜິດຊອບ ຕ້ານໄພພິບັດແຕ່ລະຂັ້ນ ໄດ້ເປັນເຈົ້າການ ເລັ່ງໃຫ້ການຊ່ວຍເຫຼືອປະຊາຊົນຜູ້ປະສົບໄພຢ່າງຮີບດ່ວນ.
ອີງຕາມບົດລາຍງານຂອງແຂວງຫຼວງນ້ຳທາເມື່ອວັນ 10 ກັນຍາຜ່ານມາໃຫ້ຮູ້ວ່າ: ໃນເວລາ 7:00 ໂມງຂອງວັນທີ 9 ກັນຍາ 2024 ໄດ້ເກີດເຫດໄພພິບັດ (ນໍ້າຖ້ວມ) ພາຍໃນແຂວງຫຼວງນໍ້າທາໃນເບື້ອງຕົ້ນມີ 35 ບ້ານຄື: ເຂດເສດຖະກິດພິເສດບໍ່ເຕ່ນແດນງາມ, ບ້ານບໍ່ເຕ່ນ, ບໍ່ປຽດ, ຕີນຕົກ, ນາເຕີຍ, ຫ້ວຍດໍາ, ຫ້ວຍຫ້ອມ, ນໍ້າແດງເໜືອ, ນໍ້າແດງໃຕ້, ຕາຫວ່ານ, ບວມພຽງ, ນໍ້າທຸງ, ຫ້ວຍຂີງ, ປ່າປົວະ, ທົ່ງໄຈ້ເໜືອ, ທົ່ງໄຈ້ໃຕ້, ວຽງເງິນ, ໂພນໄຊ, ໜອງບົວວຽງ, ຫົວຂົວ, ດອນສໍາພັນ, ທົ່ງອົ້ມ, ວຽງເໜືອ, ວຽງໃຕ້, ບ້ານຫຼວງ, ຂອນດອນຄຸນ, ທ່າຂໍ້, ນໍ້າແງ້ນ, ທົ່ງຂວາ, ບ້ານປຸ່ງ, ບ້ານໃໝ່, ປ່າສັກ, ນານ້ອຍ, ນາລືເຮັດໃຫ້ເຮືອນຊານ, ຊັບສິນ, ພາຫະນະເຂດທໍາການຜະລິດ, ສັດລ້ຽງຂອງປະຊາຊົນເສຍຫາຍເປັນຈໍານວນຫຼວງຫຼາຍຊຶ່ງບໍ່ສາມາດປະເມີນມູນຄ່າໄດ້.
ເລີ່ມແຕ່ເຫດເກີດຂຶ້ນ,ການນໍາຂອງແຂວງ, ຄະນະກຳມະການໄພພິບັດຂັ້ນແຂວງສົມທົບພາກສ່ວນກ່ຽວຂ້ອງລົງຊ່ວຍເຫຼືອປະຊາຊົນ, ຍົກຍ້າຍຊັບສິນ, ກອບກູ້ຊີວິດຂອງປະຊາຊົນ, ແຕ່ເຫດເກີດຂຶ້ນພ້ອມກັນຫຼາຍຈຸດເຮັດໃຫ້ການຊ່ວຍເຫຼືອບໍ່ທ່ວງບໍ່ທັນ.
ປັດຈຸບັນແຂວງພວມສຸມໃສ່ຈັດຕັ້ງກໍາລັງລົງແຕ່ລະຈຸດເພື່ອຊ່ວຍເຫຼືອປະຊາຊົນທີ່ຍັງຕິດຄ້າງຢູ່ຕາມເຮືອນຊານອອກມາຢູ່ບ່ອນປອດໄພ, ແຂວງໄດ້ກຳນົດຈຸດພັກຊົ່ວຄາວ, ຕັ້ງສູນຮັບ-ແຈກຢາຍເຄື່ອງອຸປະໂພກ-ບໍລິໂພກສໍາລັບຜູ້ປະສົບໄພ, ພ້ອມທັງລະດົມການຊ່ວຍເຫຼືອຈາກທຸກພາກສ່ວນທົ່ວສັງຄົມ.
ໃນຂະນະທີ່ ທ່ານ ພັນເອກ ຄໍາເຫຼັກ ສາຍຄໍາພວນ ຫົວໜ້າຫ້ອງການເມືອງ ກອງບັນຊາການທະຫານ ແຂວຫຼວງນໍ້າທາ ຄະນະຮັບຜິດຊອບຕ້ານໄພພິບັດຂັ້ນແຂວງ ໄດ້ລາຍງານເມື່ອວັນທີ 10 ກັນຍາຜ່ານມາໃຫ້ຮູ້ວ່າ: ພາຍຫຼັງທີ່ໄດ້ຮັບການແຈ້ງຂ່າວ ມີສະພາບການນໍ້າຖ້ວມເກີດຂຶ້ນ, ຄະນະພັກ-ຄະນະບັນຊາ ກໍຄືຄະນະຮັບຜິດຊອບຕ້ານໄພພິບັດທໍາມະຊາດ ກອງບັນຊາການທະຫານ ແຂວງຫຼວງນໍ້າທາ ໄດ້ນໍາພາກໍາລັງປະຈໍາການກຽມພ້ອມຕອບ-ຕ້ານໄພພິບັດ ຂອງກອງບັນຊາການ 565 ສະຫາຍ ພ້ອມດ້ວຍພາຫະນະ ເຮືອ 6 ລໍາ, ສົມທົບກັບເຮືອ ແລະ ກໍາລັງຂອງປະຊາຊົນຈໍານວນໜຶ່ງ ເລັ່ງໃຫ້ຊ່ວຍເຫຼືອປະຊາຊົນຢູ່ບັນດາບ້ານທີ່ຂຶ້ນກັບ ເມືອງຫຼວງນໍ້າທາ ແຂວງຫຼວງນໍ້າທາ ທີ່ຖືກຜົນກະທົບໜັກເປັນຕົ້ນແມ່ນບ້ານວຽງເງິນ, ທົ່ງໃຈເໜືອ, ທົ່ງໃຈໃຕ້, ນານ້ອຍ, ທົ່ງຂວາ, ວຽງເໜືອ, ບ້ານປຸ່ງ, ໃໝ່, ປ່າສັກ, ນາລື, ທ່າອໍ, ຄອນຄູນ, ບ້ານຄອນ, ບ້ານຫຼວງ, ໂພນໄຊ, ດອນສໍາພັນ, ຫົວຂົວ, ວຽງໃຕ້, ປ່າປົວະ, ນໍ້າທູນ, ບໍ່ເຕັນ ແລະ ບ້ານນາເຕີຍ ໃນນີ້, ເລັ່ງຊ່ວຍເຫຼືອໄດ້ແລ້ວຈໍານວນໜຶ່ງ ແລະ ຍັງຈະສືບຕໍ່ໃຫ້ການຊ່ວຍເຫຼືອບັນດາບ້ານ ທີ່ຍັງຕົກຄ້າງຕາມຈຸດຕ່າງໆ ເພື່ອນໍາສົ່ງປະຊາຊົນສູ່ຈຸດປອດໄພ ແລະ ນໍາເອົາຜູ້ບາດເຈັບນໍາສົ່ງໂຮງໝໍທະຫານ ແຂວງຫຼວງນໍ້າທາ ໃຫ້ທ່ວງທັນເວລາ.
ຕໍ່ສະພາບການດັ່ງກ່າວ, ເຖິງແມ່ນວ່າໃນປັດຈຸບັນປະລິມານນໍ້າບາງເຂດ ຈະຫຼຸດລົງແລ້ວກໍຕາມ, ແຕ່ຝົນຍັງສືບຕໍ່ຕົກຢ່າງຕໍ່ເນື່ອງ. ດັ່ງນັ້ນ, ຈຶ່ງຮຽກຮ້ອງໃຫ້ປະຊາຊົນຢູ່ເຂດຈຸດສ່ຽງໄພ ຈົ່ງພ້ອມກັນເຝົ້າລະວັງ ການປ່ຽນແປງຂອງສະພາບອາກາດຢ່າງຕໍ່ເນື່ອງ. ທຸກພາກສ່ວນໃນສັງຄົມ ຈົ່ງພ້ອມກັນ ສົ່ງກໍາລັງແຮງໃຈ ດ້ວຍການບໍລິຈາກ ເຄື່ອງອຸປະໂພກ-ບໍລິໂພກ ໂດຍຜ່ານພາກສ່ວນທີ່ກ່ຽວຂ້ອງ ເພື່ອບັນເທົາທຸກໃນເບື້ອງຕົ້ນ ປະກອບສ່ວນຊ່ວຍບັນເທົາທຸກ, ຟື້ນຟູຊີວິດການເປັນຢູ່ ຂອງປະຊາຊົນ ໃຫ້ກັບຄືນສູ່ສະພາບປົກກະຕິໂດຍໄວ.
ຂ່າວ: ຄ. ຄຳປະສິດ
ຄໍາເຫັນ