ງານປະກວດນາງສາວທິດາພະເຫວດປະຈໍາປີ 2024 ໄດ້ຈັດຂຶ້ນໃນຄໍ່າຄືນຂອງວັນທີ 21 ມີນາຜ່ານມາ ທີ່ເດີ່ນກິລາ ເມືອງປາກລາຍ ແຂວງໄຊຍະບູລີ, ໃຫ້ກຽດເຂົ້າຮ່ວມຮັບຊົມມີທ່ານ ບຸນຫຼາຍ ວົງດາລາ ວ່າການເຈົ້າເມືອງປາກລາຍ, ມີການນໍາຂອງເມືອງ, ນັກທຸລະກິດ ພ້ອມດ້ວຍພໍ່ແມ່ປະຊາຊົນບັນດາເຜົ່າເຂົ້າຮ່ວມຊົມເຊີຍຢ່າງຫຼວງຫຼາຍ.
ການຈັດງານປະກວດນາງສາວທິດາພະເຫວດຄັ້ງນີ້, ກໍເພື່ອເປັນການປົກປັກຮັກສາຮີດຄອງປະເພນີອັນດີງາມຂອງຊາດກໍຄືຂອງປະຊາຊົນບັນດາເຜົ່າຊາວເມືອງປາກລາຍ ຕິດພັນກັບເທດສະການບຸນພະເຫວດ ຜີໂຂນປະຈໍາປີ 2024 ແລະ ການເປີດປີທ່ອງທຽ່ວຂອງເມືອງ ທັງເປັນການຊຸກຍູ້ສົ່ງເສີມວັດທະນະທໍາສະແດງອອກການນຸ່ງຖື, ວາຈາ, ກິລິຍາມາລະຍາດ, ຍິ້ມແຍ້ມແຈ່ມໃສ, ນໍ້າໃຈດີທີ່ເປັນເອກະລັກ, ວັດທະນະທໍາອັນດີງາມຂອງຄົນລາວ.
ການປະກວດນາງສາວທິດາພະເຫວດໃນປີ2024 ນີ້, ມີນາງສາວເຂົ້າຮ່ວມທັງໝົດ 16 ຄົນ ທີ່ເປັນຕົວແທນຈາກບ້ານ ແລະ ສໍານັກງານອົງການເຂົ້າປະກວດ. ຜ່ານການປະກວດອັນດັບ 1 ໄດ້ແກ່ ນາງ ນໍ້າຫວານ ວົງສີຈອມລັດ ຕົວແທນຈາກຮ້ານຂາຍຄໍາອານຸສອນຕະຫຼາດເມືອງປາກລາຍ ໄດ້ຮັບມົງກຸ ພ້ອມສາຍສະພາຍ ແລະ ເງິນສົດ 6 ລ້ານກີບ, ອັນດັບ 2 ໄດ້ແກ່ ນາງ ປັນຍາພອນ ເທບປະຫຼັດ ຕົວແທນຈາກໂຮງຮຽນ ມສ ປາກລາຍ ໄດ້ຮັບສາຍສະພາຍ ພ້ອມເງິນສົດ 5 ລ້ານຫ້າແສນກີບ, ອັນດັບ 3 ໄດ້ແກ່ ນາງ ມະນີກອນ ສີຫຼຽນທອງສຸກ ຕົວແທນຈາກບ້ານສຸວັນນະພູມໄດ້ຮັບເງີນສົດ 5 ລ້ານກີບ, ອັນດັບ 4 ນາງ ສະຫຼັດ ຍອງມະລາດ ຕົວແທນຈາກບ້ານໄຊຍະມຸງຄຸນໄດ້ຮັບເງີນສົດ 4 ລ້ານຫ້າແສນກີບ, ອັນດັບ 5 ນາງ ສົມສະຫວັນ ຈັນທາ ຕົວແທນຈາກບ້ານຫວ້ຍຊາຍຄໍາໄດ້ຮັບເງີນສົດ 4 ລ້ານກີບ ແລະ ລາງວັນອື່ນໆ.
(ຂ່າວ: ກ່າ ຄຸທະວົງສັກ)
ຄໍາເຫັນ