ໜັງສືພິມປະຊາຊົນ-ເຍິນເຢິນ ສືບຕໍ່ຮັດແໜ້ນການຮ່ວມມືດ້ານວິຊາການ

ໜັງສືພິມປະຊາຊົນ ສຽງຂອງສູນກາງພັກປະຊາຊົນປະຕິວັດລາວ ແລະ ໜັງສືພິມເຍິນເຢິນ ສຽງຂອງສູນກາງພັກ-ລັດ ແລະ ປະຊາຊົນຫວຽດນາມ ໄດ້ສືບຕໍ່ເພີ່ມທະວີຮັດແໜ້ນການຮ່ວມມືຢ່າງແໜ້ນແຟ້ນ, ໜັງສືພິມປະຊາຊົນ ໄດ້ສະເໜີໃຫ້ໜັງສືພິມເຍິນເຢິນປັບປຸງເວັບໄຊ ລວມເຖິງລະບົບໄອຊີທີ ແລະ ຍົກລະດັບວິຊາສະເພາະຂອງນັກຂ່າວ, ນັກວິຊາການໄອຊີທີໃຫ້ໜັງສືພິມປະຊາຊົນ ໄດ້ຍົກສູງຄຸນນະພາບ ດ້ານເນື້ອໃນ ແລະ ຮູບແບບ, ຮູບຮ່າງໜ້າຕາເວັບໄຊ ໃຫ້ມີຄວາມທັນສະໄໝ ແລະ ດຶງດູດຜູ້ອ່ານ, ຜູ້ຊົມເວັບໄຊ ອັນເປັນການຍົກສູງຄວາມອາດສາມາດໃນການເຜີຍແຜ່ແນວທາງນະໂຍບາຍຂອງພັກ, ຂອງລັດ ແລະ ສິ່ງຕັ້ງໜ້າ, ອັນໃໝ່ໆ ຂອງປະຊາຊົນລາວບັນດາເຜົ່າ ແລະ ອື່ນໆ ຕາມທິດຊີ້ນໍາຂອງພັກເຮົາ.
    ໜັງສືພິມປະຊາຊົນ ແລະ ໜັງສືພິມເຍິນເຢິນ ໄດ້ຈັດພິທີພົບປະສອງຝ່າຍ ໃນວັນທີ 25 ທັນວານີ້ ທີ່ສຳນັກງານໜັງສືພິມປະຊາຊົນ ນະຄອນຫຼວງວຽງຈັນ ຊຶ່ງຝ່າຍລາວ ນໍາໂດຍ ສະຫາຍ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ ພ້ອມດ້ວຍຄະນະ ແລະ ຝ່າຍຫວຽດນາມ ນໍາໂດຍ ສະຫາຍ ດິງ ຍື ຮວານ ຮອງຫົວໜ້າບັນນາທິການໃຫຍ່ ໜັງສືພິມເຍິນເຢິນ ພ້ອມດ້ວຍຄະນະ ໃນໂອກາດທີ່ຄະນະຜູ້ແທນດັ່ງກ່າວ ມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 24-29 ທັນວາ 2023 ນີ້.
    ການພົບປະຄັ້ງນີ້, ສອງຝ່າຍ ໄດ້ລາຍງານໂດຍຫຍໍ້ກ່ຽວກັບສະພາບການເຄື່ອນໄຫວວຽກງານໜັງສືພິມຂອງແຕ່ລະຝ່າຍໃຫ້ກັນຊາບ ພ້ອມທັງໄດ້ທົບທວນຕີລາຄາຜົນການພົວພັນຮ່ວມມືກັນໃນໄລຍະຜ່ານມາ ໂດຍສະເພາະແມ່ນໄລຍະອັນໃກ້ນີ້ ທີ່ໄດ້ຍົກສູງການຮ່ວມມືໃຫ້ຮັດແໜ້ນຂຶ້ນນັບມື້ ກໍຄືການຮ່ວມມືໃນການຊ່ວຍປັບປຸງເວັບໄຊ, ລະບົບໄອຊີທີ ເພື່ອໃຫ້ໜັງສືພິມປະຊາຊົນ ໄດ້ສືບຕໍ່ຍູ້ແຮງການຜັນຂະຫຍາຍແນວທາງການປ່ຽນແປງໃໝ່ ເຂົ້າສູ່ລວງເລິກ, ສ້າງການຫັນປ່ຽນທີ່ແຮງແຂງ, ເລິກເຊິ່ງ ແລະ ຮອບດ້ານ ຕອບສະໜອງໄດ້ທັນກັບຍຸກສະໄໝ ແຫ່ງການປະຕິວັດອຸດສາຫະກຳ 4.0, ຫັນເປັນທັນສະໄໝ, ຫັນເປັນດີຈີຕອນ ໃຫ້ເປັນລະບົບຈະແຈ້ງ ແລະ ໜັກແໜ້ນ ຕາມທິດທາງການນໍາພາຂອງພັກປະຊາຊົນປະຕິວັດລາວ ປະກອບສ່ວນໃນການສ້າງການຫັນປ່ຽນຢ່າງແຂງແຮງໃນວຽກງານໂຄສະນາອົບຮົມໄປສູ່ຄຸນນະພາບໃໝ່.
    ໂອກາດນີ້, ສະຫາຍ ວັນໄຊ ຕະວິນຍານ ໄດ້ກ່າວຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະດັ່ງກ່າວໃນຄັ້ງນີ້ ຊຶ່ງໄດ້ສະແດງໃຫ້ເຫັນເຖິງຄວາມຮັກແພງອັນສະໜິດສະໜົມ, ການພົວພັນຮ່ວມມືທີ່ມີມາແຕ່ດົນນານ ໃຫ້ແຕກດອກອອກຜົນຍິ່ງໆຂຶ້ນ, ເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ເວົ້າລວມເວົ້າສະເພາະແມ່ນການຮ່ວມມືຊ່ວຍເຫຼືອຊຶ່ງກັນແລະກັນລະຫວ່າງໜັງສືພິມປະຊາຊົນກັບໜັງສືພິມເຍິນເຢິນໃຫ້ນັບມື້ນັບເລິກເຊິ່ງຍິ່ງໆຂຶ້ນ. ພ້ອມດຽວກັນນີ້, ສະຫາຍ ວັນໄຊຕະວິນຍານຍັງໄດ້ກ່າວສະແດງຄວາມຂອບໃຈມາຍັງໜັງສືພິມເຍິນເຢິນໄດ້ໃຫ້ການຊ່ວຍເຫຼືອໜັງສືພິມປະຊາຊົນມາໂດຍຕະຫຼອດ. ນັບແຕ່ການຝຶກອົບຮົມດ້ານວິຊາການ, ການສະໜອງດ້ານພື້ນຖານວັດຖຸເຕັກນິກ ແລະ ສິ່ງສຳຄັນ ເມື່ອບໍ່ດົນມານີ້ ກໍໄດ້ສົ່ງຊ່ຽວຊານ-ວິຊາການ ມາສຳຫຼວດຕີລາຄາ ເພື່ອສ້າງແຜນ ແລະ ຊ່ວຍປັບປຸງລະບົບເວັບໄຊ ໃຫ້ກັບໜັງສືພິມ ຈົນກ້າວມາສູ່ການພົບປະສອງຝ່າຍ ເພື່ອທົບທວນຕີລາຄາແຜນການເຄື່ອນໄຫວວຽກດັ່ງກ່າວ ແລະ ໄດ້ມີການລົງນາມໃນບົດບັນທຶກຊ່ວຍຈໍາໃນມື້ນີ້.
    ສະຫາຍ ດິງ ຍື ຮວານ ໄດ້ຕີລາຄາສູງ ຕໍ່ການພົວພັນຮ່ວມມືຂອງສອງຝ່າຍ ທີ່ນັບມື້ນັບຮັດແໜ້ນ ແລະ ແໜ້ນແຟ້ນຂຶ້ນກວ່າເກົ່າ ພ້ອມທັງສະແດງຄວາມຍິນດີໃນການຮ່ວມມື, ການສະໜັບສະໜູນດ້ານຕ່າງໆ ຕາມທີ່ໄດ້ຕົກລົງເຫັນດີເປັນເອກະພາບກັນຂອງສອງຝ່າຍ.
    ພ້ອມດຽວກັນນີ້, ຝ່າຍຫວຽດນາມ ກໍໄດ້ລາຍງານກ່ຽວກັບຄວາມຄືບໜ້າຂອງແຜນການປັບປຸງເວັບໄຊຂອງໜັງສືພິມປະຊາຊົນ ໂດຍແມ່ນ ສະຫາຍ ເລ ຟານ ແອັງ ຫົວໜ້າພະແນກເຕັກນິກໜັງສືພິມເຍິນເຢິນ ພ້ອມດ້ວຍວິຊາການຂອງພະແນກໄດ້ລາຍງານໃຫ້ຮູ້ວ່າ: ການປັບປຸງແລະພັດທະນາລະບົບເວັບໄຊຂອງໜັງສືພິມປະຊາຊົນເປັນການນໍາໃຊ້ລະບົບຊັອບແວ ທີ່ທັນສະໄໝທີ່ສຸດ ເມື່ອທຽບກັບບັນດາອົງການສື່ມວນຊົນຂອງລາວ. ລະບົບດັ່ງກ່າວ, ມີລັກສະນະເປີດກວ້າງ ແລະ ຂະຫຍາຍຕົວໃນອະນາຄົດ ເພື່ອຕອບສະໜອງດ້ານສື່ມວນຊົນທີ່ທັນສະໄໝ ແລະ ດ້ານຂໍ້ມູນຕ່າງໆ ຊຶ່ງລະບົບນີ້ແມ່ນ ລະບົບ CMS (Content Management System)ຊຶ່ງຄາດວ່າຈະໄດ້ເປີດນຳໃຊ້ຢ່າງເປັນທາງການໃນຕົ້ນປີ 2024.
    ເພື່ອບັນລຸເປົ້າໝາຍໃນການປັບປຸງເວັບໄຊຂອງໜັງສືພິມປະຊາຊົນ, ພາຍຫຼັງການພົບປະສອງຝ່າຍ ສະຫາຍ ວັນໄຊ ຕະວິນຍານ ແລະ ສະຫາຍ ດິງ ຍື ຮວານ ໄດ້ລົງນາມໃນບົດບັນທຶກຊ່ວຍຈໍາ ໂດຍໜັງສືພິມເຍິນເຢິນ ເປັນທີ່ປຶກສາ, ຈະໄດ້ສ້າງ ແລະ ມອບ-ຮັບ ຊຶ່ງພາຍຫຼັງສໍາເລັດບັນດາໜ້າວຽກ ທີ່ສອງຝ່າຍຕົກລົງເປັນເອກະພາບ ແລະ ເຫັນດີປະຕິບັດຢ່າງຄົບຖ້ວນຂອງບັນດາເນື້ອໃນ ທີ່ລະບຸໃນບົດບັນທຶກ ໂດຍສະເພາະແມ່ນເຫັນດີເປັນເອກະພາບກ່ຽວກັບໜ້າເວັບໄຊໃໝ່ ຂອງໜັງສືພິມ ປະຊາຊົນ ແລະ ເນື້ອໃນລະບົບຈໍາໜ່າຍ (CMS) ຊຶ່ງແມ່ນລະບົບເວັບໄຊໃໝ່ທັງໝົດ ທີ່ຈະໄດ້ສ້າງຂຶ້ນ, ໜັງສືພິມເຍິນເຢີນ ເປັນທີ່ປຶກສາໃຫ້ໜັງສືພິມ ປະຊາຊົນ ກ່ຽວກັບຄວາມຕ້ອງການດ້ານເຕັກນິກ ໂຄງລ່າງອິນເຕີເນັດ ແລະ ເຊີເວີ ຮັບປະກັນໄດ້ລະບົບເວັບໄຊໃໝ່ ມີຄວາມໝັ້ນຄົງ, ມີຄວາມປອດໄພສູງ, ປະສິດທິຜົນ ເພື່ອໃຫ້ໜັງສືພິມ ປະຊາຊົນ ຈັດຕັ້ງປະຕິບັດ, ອຸປະກອນໂຄງລ່າງພື້ນຖານເຮັດແນວໃດໃຫ້ແທດເໝາະ; ໜັງສືພິມ ເຍິນເຢີນ ຈະສະໜັບສະໜູນວຽກຕິດຕັ້ງສະພາບແວດລ້ອມເຄື່ອງເຊີເວີ ແລະ ບໍລິການ ໃນລະບົບໜັງສືພິມ ປະຊາຊົນ ທີ່ໄດ້ກະກຽມຕາມທີ່ໜັງສືພິມເຍິນເຢີນໃຫ້ຄໍາປຶກສາ; ໜັງສືພິມ ເຢີນເຢິນ ສະໜັບສະໜູນ ຝຶກອົບຮົມໃຫ້ບຸກຄະລາກອນ ໜັງສືພິມ ປະຊາຊົນ ໃນວຽກເຄື່ອນໄຫວ ແລະ ນໍາໃຊ້ລະບົບເວັບໄຊໃໝ່, ຮູບການຝຶກອົບຮົມ ອາດຈະອີງໃສ່ສະພາບການຕົວຈິງຂອງທັງສອງຝ່າຍຕົກລົງກັນ ເພື່ອເອກະພາບຜັນຂະຫຍາຍ; ພາຍຫຼັງການເຊື່ອມຕໍ່ສໍາເລັດ ຊື່ເວັບ pasaxon.org.la ກ່ຽວກັບລະບົບອິນເຕີເນັດ ແລະ ເຄື່ອງເຊີເວີໃໝ່; ພາຍຫຼັງມອບ-ຮັບລະບົບສໍາເລັດສົມບູນ, ໜັງສືພິມປະຊາຊົນ ອາດມີສິດຄຸ້ມຄອງ ແລະ ເຄື່ອນໄຫວທັງໝົດ. ໃນກໍລະນີທີ່ຈໍາເປັນ, ບັນດາຊ່ຽວຊານ ໜັງສືພິມເຍິນເຢິນຈະດໍາເນີນການສະໜັບສະໜູນແບບທາງໄກ ຫຼື ມາລາວ ເພື່ອຊ່ວຍແກ້ໄຂໂດຍກົງ.
(ຂ່າວ-ພາບ: ສຸກສະຫວັນ)