ນາຍົກລັດຖະມົນຕີ ຫວຽດນາມ ພົບປະນາຍົກລັດຖະມົນຕີ ກຳປູເຈຍ

ວິທະຍຸກະຈາຍສຽງຫວຽດນາມລາຍງານວ່າ: ເນື່ອງໃນໂອກາດເຂົ້າຮ່ວມກອງປະຊຸມສຸດຍອດພິເສດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນ ອາຊຽນ - ອົສຕຣາລີ (1974 – 2024),ໃນວັນທີ 6 ມີນາ ຜ່ານມານີ້ຢູ່ນະຄອນ ເມລເບີນປະເທດອົສຕຣາລີ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ພົບປະກັບທ່ານ ຮຸນ ມາເນັດ ນາຍົກລັດຖະມົນຕີ ກຳປູເຈຍ.
ຂ່າວລະບຸວ່າ: ໃນການພົບປະ, ນາຍົກລັດຖະມົນຕີ 2 ທ່ານ ໄດ້ແບ່ງປັນຄວາມປິຕິຊົມຊື່ນຕໍ່ການຮ່ວມມືຂອງ 2 ປະເທດໃນໄລຍະຜ່ານມາ ຊຶ່ງໄດ້ພັດທະນາຢ່າງມີສະຖຽນລະພາບ; ການນຳ 2 ປະເທດເຫັນດີສືບຕໍ່ຮັກສາການຢ້ຽມຢາມ ແລະ ພົບປະຂັ້ນສູງເປັນປະຈຳ; ບັນດາກົນໄກຮ່ວມມື 2 ຝ່າຍສືບຕໍ່ພັດທະນາຢ່າງມີປະສິດທິຜົນ. ນາຍົກລັດຖະມົນຕີ 2 ທ່ານກໍເຫັນດີຍົກສູງປະສິດທິຜົນການຮ່ວມມືດ້ານເສດຖະກິດ - ການຄ້າ - ການລົງທຶນໃຫ້ດີຂຶ້ນກວ່າເກົ່າ; ສືບຕໍ່ສົມທົບກັນຜັນຂະຫຍາຍບັນດາຂໍ້ຕົກລົງ, ກົນໄກທີ່ມີຢູ່ແລ້ວກ່ຽວກັບດ້ານປ້ອງກັນຊາດ - ປ້ອງກັນຄວາມສະຫງົບ; ພະຍາຍາມແກ້ໄຂວຽກງານປັກຫຼັກໝາຍທີ່ຍັງບໍ່ທັນສຳເລັດ ເພື່ອສ້າງເສັ້ນຊາຍແດນສັນຕິພາບ, ມິດຕະພາບ, ການຮ່ວມມື ແລະ ພັດທະນາແບບຍືນຍົງລະຫວ່າງ 2 ປະເທດ.
        ທ່ານ ຮຸນ ມາເນັດ ກໍເຫັນດີສືບຕໍ່ເອົາໃຈໃສ່, ສ້າງເງື່ອນໄຂສະດວກໃຫ້ຊາວຫວຽດນາມ ທີ່ອາໄສຢູ່ ກຳປູເຈຍ ມີຊີວິດການເປັນຢູ່ທີ່ສະດວກ, ເຊື່ອມໂຍງເຂົ້າກັບປະເທດປະຈຳຖິ່ນ, ເປັນຂົວຕໍ່ມິດຕະພາບລະຫວ່າງ 2 ປະເທດ; ພ້ອມທັງ, ສ້າງຄວາມສະດວກໃຫ້ບັນດາວິສາຫະກິດ ຫວຽດນາມ ທີ່ພວມລົງທຶນ ແລະ ດຳເນີນທຸລະກິດຢູ່ ກຳປູເຈຍ.