ນາຍົກລັດຖະມົນຕີ ຍີ່ປຸ່ນ ເດີນທາງຢ້ຽມຢ້າມ ອາເມຣິກາ ຢ່າງເປັນທາງການ

ຂ່າວສານຫວຽດນາມລາຍງານວ່າ: ໃນວັນທີ 8 ເມສາຜ່ານມານີ້, ທ່ານນາຍົກລັດຖະມົນຕີຍີ່ປຸ່ນ ໄດ້ເດີນທາງຈາກນະຄອນຫຼວງໂຕກຽວ ເພື່ອຢ້ຽມຢາມອາເມຣິກາ ເປັນເວລາ 5 ວັນ.
ຂ່າວລາຍງານວ່າ: ນີ້ແມ່ນການຢ້ຽມຢາມ ອາເມຣິກາ ຄັ້ງທຳອິດຂອງທ່ານ ກິຊິດະ ຟູມິໂອະ ໃນຖານະເປັນແຂກຂອງລັດຖະບານນັບແຕ່ທ່ານ ອາເບະ ຊິນໂຊະ ເດີນທາງໄປຢ້ຽມຢາມ ໃນປີ 2015.
ໃນການໃຫ້ສຳພາດຕໍ່ນັກຂ່າວກ່ອນອອກເດີນທາງ, ທ່ານ ກິຊິດະ ຟູມິໂອະ ໄດ້ເນັ້ນໜັກເຖິງຄວາມສຳຄັນຂອງການພົວພັນຄູ່ຮ່ວມມື ຍີ່ປຸ່ນ - ອາເມຣິກາ ໃນສະພາບທີ່ປະຊາຄົມໂລກພວມປະເຊີນໜ້າກັບບັນດາສິ່ງທ້າທາຍຢ່າງສັບສົນ ແລະ ມີຫຼາຍຮູບຫຼາຍແບບ. ທ່ານ ກິຊິດະ ຟູມິໂອະ ຍັງໃຫ້ຮູ້ວ່າ: ຍີ່ປຸ່ນ ແລະ ອາເມຣິກາ ແມ່ນຄູ່ຮ່ວມມືລະດັບໂລກ, ສະນັ້ນ 2 ປະເທດຕ້ອງພະຍາຍາມປະກອບສ່ວນນຳໜ້າໃນການແກ້ໄຂບັນຫາສາກົນ.
ຂໍ້ມູນຈາກກະຊວງການຕ່າງປະເທດຍີ່ປຸ່ນ ໃຫ້ຮູ້ວ່າ:ໃນວັນທີ 10 ເມສານີ້, ຢູ່ ວໍຊິງຕັນ, ທ່ານ ກິຊິດະ ຟູມິໂອະນາຍົກລັດຖະມົນຕີ ຍີ່ປຸ່ນ ແລະ ທ່ານ ໂຈ ໄບເດັນ ປະທານາທິບໍດີອາເມຣິກາ ຈະເປັນເຈົ້າພາບຈັດກອງປະຊຸມສຸດຍອດຍີ່ປຸ່ນ-ອາເມຣິກາ.
ກ່ຽວກັບກອງປະຊຸມສຸດຍອດ 3 ຝ່າຍລະຫວ່າງ ອາເມຣິກາ - ຍີ່ປຸ່ນ - ຟີລິບປິນ ທີ່ຈະຈັດຂຶ້ນໃນວັນທີ 11 ເມສາ ຢູ່ ອາເມຣິກາ, ທ່ານ ກິຊິດະ ຟູມິໂອະ ຢືນຢັນວ່າ, ການຮ່ວມມືລະຫວ່າງ 3 ປະເທດແມ່ນສຳຄັນທີ່ສຸດໃນການຮັກສາສັນຕິພາບ ແລະ ສະຖຽນລະພາບຢູ່ພາກພື້ນມະຫາສະໝຸດອິນເດຍ - ປາຊີຟິກ ເປັນຕົ້ນແມ່ນການຮັກສາສັນຕິພາບ ແລະ ເປີດກວ້າງສາກົນ ໂດຍອີງໃສ່ລະບຽບກົດໝາຍສາກົນ.