ນາຍົກເນັ້ນ 8 ບັນຫາສໍາຄັນໃຫ້ ຂະແໜງ ຊສ ເອົາໃສ່ໃຈຈັດຕັ້ງປະຕິບັດ

ທ່ານ ສອນໄຊ ສີພັນດອນ ນາຍົກລັດດຖະມົນຕີ ໄດ້ໂອ້ລົມຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານຊັບພະຍາກອນທໍາມະຊາດ ແລະ ສິ່ງແວດລ້ອມ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ໃນວັນທີ 17 ມັງກອນນີ້ ຊຶ່ງໄດ້ເນັ້ນໃຫ້ຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ (ຊສ) ທົ່ວປະເທດ ເອົາໃຈໃສ່ 8 ບັນຫາສຳຄັນ ທີ່ຕ້ອງສຸມໃສ່ຈັດຕັ້ງປະຕິບັດ.
    ໃນວາລະທ້າຍຂອງກອງປະຊຸມດັ່ງກ່າວ, ທ່ານນາຍົກລັດຖະມົນຕີ ໄດ້ເຂົ້າຮ່ວມ ແລະ ມີຄໍາເຫັນໂອ້ລົມຕໍ່ກອງປະຊຸມ ຊຶ່ງໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດທີ່ຂະແໜງ ຊສ ປະຕິບັດໄດ້ໃນປີຜ່ານມາ ໂດຍເຫັນວ່າ: ຂະແໜງ ຊສ ໄດ້ມີຄວາມສູ້ຊົນ, ພະຍາຍາມບຸກບືນປະຕິບັດໜ້າທີ່ຂອງຕົນ ທີ່ປະເທດຊາດ ແລະ ປະຊາຊົນມອບໝາຍໃຫ້ ໄດ້ມີຜົນສຳເລັດເປັນຢ່າງດີ ອັນໄດ້ປະກອບສ່ວນສຳຄັນໃນການພັດທະນາເສດຖະກິດ-ສັງຄົມຂອງຊາດ ໃຫ້ຈະເລີນກ້າວໜ້າໄປຕາມທິດສີຂຽວ ແລະ ຍືນຍົງ, ພ້ອມທັງປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ ໃຫ້ນັບມື້ດີຂຶ້ນເທື່ອລະກ້າວ. ພ້ອມດຽວກັນ, ກໍໄດ້ຍົກໃຫ້ເຫັນວຽກງານທີ່ຍັງຄົງຄ້າງບາງດ້ານ ທີ່ຈະຕ້ອງໄດ້ພ້ອມກັນເອົາໃຈໃສ່ປັບປຸງແກ້ໄຂ ໃຫ້ມີການຫັນປ່ຽນຢ່າງຕັ້ງໜ້າ, ມີປະສິດທິພາບ ແລະ ປະສິດທິຜົນກວ່າເກົ່າ. 
    ເພື່ອໃຫ້ທົ່ວຂະແໜງ ຊສ ໃນຂອບເຂດທົ່ວປະເທດ ໄດ້ຮັບຮູ້ເປັນເອກະພາບໃນການສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ທີ່ໄດ້ກຳນົດນັ້ນໃຫ້ໄດ້ຮັບຜົນດີ; ທ່ານນາຍົກລັດຖະມົນຕີ ໄດ້ສະເໜີຈິດໃຈຊີ້ນໍາຂອງສະຫາຍເລຂາທິການໃຫຍ່ ປະທານປະເທດ ຊຶ່ງເພິ່ນໄດ້ເນັ້ນໜັກວ່າ: “ຢາກຫຼຸດພົ້ນຈາກຂຸມດຳໃນການພັດທະນາ ເປັນປະເທດກຳລັງພັດທະນາ ໄລຍະກາງ ຊຶ່ງຂັ້ນຕົ້ນຂອງໄລຍະກາງ ຫຼາຍປະເທດບໍ່ສາມາດບືນຕົວໄດ້ໄວ ແລະ ອັນທີສອງ ກໍບໍ່ຢາກມີການກະທົບຈາກພາຍນອກຫຼາຍ ຊຶ່ງພາກເຮົາຕ້ອງມີພູມຕ້ານທານຂອງຕົວເອງ”. ສະນັ້ນ, ໃນໄລຍະມໍ່ໆມານີ້, ກົມການເມືອງສູນກາງພັກ, ຄະນະບໍລິຫານງານສູນກາງພັກກໍໄດ້ມີການຄົ້ນຄວ້າເວົ້າເລື່ອງການສ້າງໂຄງການການເມືອງຂອງພັກ ສະບັບທີ 3, ໃນບັນຫາດັ່ງກ່າວນີ້ກ່ຽວກັບການປ່ຽນແປງໃໝ່ໃນຂົງເຂດການພັດທະນາເສດຖະກິດ ໄດ້ເນັ້ນວ່າ: “ພວກເຮົາຕ້ອງເອົາໃຈໃສ່ເບິ່ງຄືນ ການຫັນປ່ຽນຈາກເສດຖະກິດ ທີ່ເຕັມໄປດ້ວຍການເພິ່ງພາເອື່ອຍອີງ ຫັນປ່ຽນທັດສະນະແນວຄິດໄປສູ່ລະບອບ ເສດຖະກິດເອກະລາດ ເປັນເຈົ້າຕົນເອງ (ສອຈ)”. ນີ້ກໍເພື່ອໃຫ້ ຂະແໜງ ຊສ ນໍາໄປຄົ້ນຄວ້າ ແລະ ຈັດຕັ້ງຜັນຂະຫຍາຍ ໃນວຽກງານທີ່ຕິດພັນກັບຂະແໜງການຂອງຕົນ ໃຫ້ເກີດຜົນ.
    ສຳລັບວຽກງານລວມຂອງຂະແໜງ ຊສ, ທ່ານ ສອນໄຊ ສີພັນດອນ ກໍໄດ້ເນັ້ນໜັກວ່າ: 
    1). ໃຫ້ສືບຕໍ່ສຸມໃສ່ສຶກສາອົບຮົມການເມືອງແນວຄິດ ໂດຍສະເພາະໃນສະພາບທີ່ປະເທດຊາດເຮົາ ປະເຊີນກັບຄວາມຫຍຸ້ງຍາກທາງດ້ານເສດຖະກິດ-ການເງິນ ເພື່ອໃຫ້ມີທັດສະນະຫຼັກໝັ້ນການເມືອງອັນໜັກແໜ້ນ, ໃຫ້ຮັບຮູ້ ແລະ ເຂົ້າໃຈສະພາບບັນຫາ ພ້ອມທັງ ຮ່ວມຈິດຮ່ວມໃຈກັນຕໍ່ສູ້ ຜ່ານຜ່າ ແລະ ແກ້ໄຂວິກິດການດັ່ງກ່າວໃຫ້ດີຂຶ້ນ; ພ້ອມດຽວກັນ, ກໍຕ້ອງໄດ້ຄົ້ນຄວ້າແກ້ໄຂດ້ວຍຫຼາຍວິທີ ໂດຍສະເພາະຊ່ວຍແກ້ໄຂຜູ້ທີ່ມີລາຍຮັບຕໍ່າ. ບັນຫານີ້, ສະເພາະລັດຖະບານ ກໍໄດ້ມີນະໂຍບາຍແລ້ວ.
    2). ຕ້ອງບຸກທະລຸແກ້ໄຂຈຸດອ່ອນຂໍ້ຄົງຄ້າງ ທີ່ເປັນອຸປະສັກຕ່າງໆນາໆ ໃນການຈັດຕັ້ງປະຕິບັດວຽກງານ ຊສ ໃນໄລຍະຜ່ານມານັ້ນ, ພ້ອມກັນຜ່ານຜ່າ ແລະ ເສີມຂະຫຍາຍດ້ານດີ, ດ້ານຕັ້ງໜ້າ, ນໍາເອົາບົດຮຽນທີ່ຖອດຖອນໄດ້ ເປັນແນວທາງໃນການປັບປຸງປະສິດທິພາບ ໃນການເຄື່ອນໄຫວວຽກງານໃຫ້ດີຂຶ້ນກວ່າເກົ່າ.
    3). ກວດກາຄືນບັນດາກົດໝາຍ, ນິຕິກຳໃຕ້ກົດໝາຍຂອງຂະແໜງ ຊສ ອັນໃດບໍ່ເໝາະສົມກໍຄວນປັບປຸງໃໝ່, ອັນໃດບໍ່ທັນມີ ແລະ ອັນໃດບໍ່ທັນເປັນບຸລິມະສິດ ກໍຕ້ອງຮີບຮ້ອນສ້າງຕາມຂັ້ນຕອນ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່. ໃນນີ້, ໂດຍສະເພາະເບິ່ງຄືນກົດໝາຍທີ່ດິນ ຊຶ່ງປັດຈຸບັນມີບຸກຄົນ, ນິຕິບຸກຄົນ ກວດຊື້ທີ່ດິນຈໍານວນຫຼາຍ ຊຶ່ງອາດຈະກາຍເປັນກຳມະສິດຂອງນາຍທຶນໃນລະບອບໃໝ່ ຊຶ່ງຈະມີດິນແຜ່ນໃຫຍ່ ແຕ່ບໍ່ໄດ້ເຊົ່າສຳປະທານນໍາລັດ. ສະນັ້ນ, ໃຫ້ກວດຄືນເບິ່ງ ແລະ ຄວນປັບປຸງໃຫ້ຖືກຕ້ອງຕາມລະບຽບກົດໝາຍ. ພ້ອມນີ້, ກໍໃຫ້ເອົາໃຈໃສ່ໃນການຕິດຕາມການຫັນປ່ຽນທີ່ດິນ ຊຶ່ງຕ້ອງມີນິຕິກຳຂອງຂະແໜງກ່ຽວຂ້ອງ ສົມທົບກັບທີ່ດິນ ທີ່ເວົ້າມາວ່າ 8 ຂະແໜງການທີ່ຄຸ້ມຄອງທີ່ດິນ; ຢາກໃຫ້ມີລະບຽບສະເພາະວ່າໂຕໃດສາມາດຫັນປ່ຽນໄດ້, ໂຕໃດທີ່ບໍ່ສາມາດຫັນປ່ຽນໄດ້ ແລະ ຕ້ອງໄດ້ເບິ່ງຢ່າງປະສົມປະສານກັບເລື່ອງການທ່ອງທ່ຽວ ຊຶ່ງເປັນການສົ່ງເສີມ ໂດຍເບິ່ງວ່າອັນໃດຄວນຕິດພັນກັບການບໍລິການ ຫຼື ບໍ່ຕິດພັນ.
    4). ຕ້ອງດຳເນີນການຕິດຕາມກວດກາ ການຈັດຕັ້ງປະຕິບັດນິຕິກຳ, ການປະຕິບັດວຽກງານຂອງຂະແໜງ ຊສ ລວມທັງການປະຕິບັດໜ້າທີ່ວຽກງານຂອງສະມາຊິກພັກ ແລະ ພະນັກງານ ທັງຢູ່ສູນກາງ ແລະ ທ້ອງຖິ່ນ ດ້ວຍໃຫ້ເຮັດການກວດກາແຕ່ຫົວທີ ແລະ ຖືສຳຄັນວຽກງານກວດກາພາຍໃນຢ່າງເປັນປົກກະຕິ ເພື່ອປ້ອງກັນ ແລະ ສະກັດກັ້ນປະກົດການຫຍໍ້ທໍ້ໃນຖັນແຖວພະນັກງານ ໂດຍສະເພາະພາກສ່ວນທີ່ຕິດພັນກັບເສດຖະກິດ ເປັນຕົ້ນ ກ່ຽວກັບໃບຕາດິນ.
    5). ໃຫ້ສຶກສາຄົ້ນຄວ້າ ແລະ ນໍາໃຊ້ວິທະຍາສາດ-ວິທະຍາການ, ເຕັກໂນໂລຊີໃໝ່ ເຂົ້າໃນຂະແໜງ ຊສ ແລະ ຫັນເປັນທັນສະໄໝ ແນໃສ່ຍົກສູງສະມັດຖະພາບຂອງວຽກງານ ໃຫ້ມີຄວາມວ່ອງໄວທັນສະໄໝ, ປະຢັດງົບປະມານ ແລະ ໂປ່ງໃສ ສາມາດກວດສອບໄດ້.
    6). ສືບຕໍ່ກໍ່ສ້າງ ແລະ ຍົກລະດັບພະນັກງານໃຫ້ເປັນລະບົບ ແລະ ສອດຄ່ອງກັບເປົ້າໝາຍ, ສ້າງພະນັກງານໃຫ້ເປັນມືອາຊີບ ເພື່ອຮັບປະກັນການເຄື່ອນໄຫວ ຢ່າງມີປະສິດທິຜົນ ແລະ ສາມາດເຊື່ອມສານກັບສາກົນ. ອັນນີ້ມີຄວາມສຳຄັນຫຼາຍ ຊຶ່ງບຸກຄະລາກອນເປັນສິ່ງຕັດສິນ ເພາະທຸກສິ່ງທຸກຢ່າງແມ່ນຄົນເຮົາເປັນຜູ້ຈັດຕັ້ງປະຕິບັດ. ສະນັ້ນ, ມະຫາພາກ ກໍຄືກະຊວງ ຕ້ອງໄດ້ເບິ່ງຕິດຕາມເປົ້າໝາຍ ການເຄື່ອນຍ້າຍ, ການກໍ່ສ້າງພະນັກງານ ຊ່ວຍທ້ອງຖິ່ນ ເພາະໃນ 5 ພາລະບົດບາດມະຫາພາກ ກໍມີການຝຶກອົບຮົມ, ການຍົກລະດັບໃຫ້ພະນັກງານສາຍຕັ້ງ ນັບທັງກະຊວງ ແລະ ທ້ອງຖິ່ນ.
    7) ສືບຕໍ່ຊຸກຍູ້ສົ່ງເສີມກົນໄກ 3 ສ້າງ, ມອບໝາຍໜ້າທີ່ຄວາມຮັບຜິດຊອບ ໃຫ້ສາຍຕັ້ງຢູ່ທ້ອງຖິ່ນໃຫ້ຫຼາຍຂຶ້ນ; ເລັ່ງຝຶກອົບຮົມ ເພື່ອສ້າງຄູ່ມືແນະນໍາ, ກວດກາຕິດຕາມປະສິດທິພາບ ສາຍວິຊາການໃນຂອບເຂດຂະແໜງຕົນຢູ່ທົ່ວປະເທດ ເພື່ອສ້າງແຕ່ລະແຂວງມີກຳລັງແຮງ, ມີບຸກຄະລາກອນທີ່ສາມາດຈັດຕັ້ງປະຕິບັດໜ້າທີ່ການເມືອງໄດ້ດີ.
    8). ໃຫ້ສືບຕໍ່ຈັດຕັ້ງປະຕິບັດຄາດໝາຍໃນວຽກຈຸດສຸມຂອງຂະແໜງ ຊສ ໂດຍສອດຄ່ອງກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໂດຍສະເພາະແຜນໃນທ້າຍສະໄໝ; ຈັດຕັ້ງແຜນພັດທະນາເສດຖະກິດ-ສັງຄົມ ປະຈໍາປີ 2024 ສົມທົບກັບການຈັດຕັ້ງປະຕິບັດວາລະແຫ່ງຊາດ. ນອກຈາກ 2 ວາລະແຫ່ງຊາດ, ກໍຂຸ້ນຂ້ຽວສຸມໃສ່ປະຕິບັດມະຕິຕົກລົງ ເລກທີ 19/ກມສພ ໃນການແກ້ໄຂບັນຫາເງິນເຟີ້, ອັດຕາແລກປ່ຽນ, ການຄຸ້ມຄອງລາຄາສິນຄ້າ ແລະ ໜີ້ສິນຕ່າງປະເທດ.
(ຂ່າວ-ພາບ: ສຸກສະຫວັນ)