ແນະນຳລົດຍີ່ຫໍ້ MG ສອງລຸ້ນໃໝ່ຫຼ້າສຸດ THE ALL – NEW MG RX5 ແລະ MG ONE

ໃນການນໍາເອົາລົດຍີ່ຫໍ້ MG ມາຮ່ວມງານວາງສະແດງລົດນາໆຊາດ ວຽງຈັນ ຫຼື VIENTIANE INTERNATIONAL Expo 2023, ເອັມຈີ ຊິຕີ້ ລາວ (MG CITY Laos) ໄດ້ເປີດໂຕລົດສອງລຸ້ນໃໝ່ຫຼ້າສຸດ ທີ່ນໍາມາວາງຈໍາໜ່າຍໃນ ສປປ ລາວ ຄື THE ALL – NEW MG RX5 ແລະ MG ONE ໃນວັນທີ 16 ຕຸລານີ້ ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ (ນວ) ຊຶ່ງໃນໂອກາດນີ້ ເອັມຈີ ຊິຕີ້ ລາວ ກໍໄດ້ມີການຈັດໂປຣໂມຊັນ ທີ່ມີຂໍ້ສະເໜີອັນໜ້າສົນໃຈ ບໍ່ສະເພາະ ນວ ແຕ່ສຳລັບຕ່າງແຂວງ ກໍຈະມີຫຼາຍຂໍ້ສະເໜີ ແລະ ນໍາສົ່ງລົດໄດ້ຢ່າງແນ່ນອນ.
    ພິທີແນະນຳລົດຍີ່ຫໍ້ MG ສອງລຸ້ນດັ່ງກ່າວ, ໄດ້ຮັບກຽດເຂົ້າຮ່ວມໂດຍ ທ່ານ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ລັນ ແສງອາພອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ພອນຈັນ ເພັງສຸວັນ ຜູ້ອໍານວຍການບໍລິສັດ ພີພີໄຊໂຍ ເອັນເຕີເທັນເມັ້ນ ແອນ ອໍກາຍເຊີ ຈໍາກັດຜູ້ດຽວ ພ້ອມດ້ວຍບັນດາທ່ານການນໍາຈາກກະຊວງ/ອົງການກ່ຽວຂ້ອງ ແລະ ບັນດາບໍລິສັດ ທີ່ເປັນຄູ່ຮ່ວມມື.
    ທ່ານ ດາວວົງ ແກ້ວມະນີວົງ ປະທານບໍລິສັດ ວຽງຈັນມໍເຕີ ມາເກັດ ຈໍາກັດ ໄດ້ກ່າວວ່າ: ໃນນາມເປັນຜູ້ນໍາເຂົ້າ ແລະ ຈັດຈໍາໜ່າຍລົດຍີ່ຫໍ້ MG ບໍລິສັດທໍາອິດ ນັບແຕ່ປີ 2007 ແລະ ໄດ້ສົ່ງຕໍ່ໃຫ້ ບໍລິສັດ GB MOTOR ບໍລິສັດຂອງລູກຊາຍ ເປັນຕົວແທນຈຳໜ່າຍແຕ່ພຽງຜູ້ດຽວຂອງ MG ໃນປະເທດລາວ ພາຍໃຕ້ຊື່ (MG CITY Laos) ຊຶ່ງເຫັນວ່າປັດຈຸບັນໄດ້ນໍາເຂົ້າມາວາງຈໍາໜ່າຍຫຼາຍລຸ້ນ ແລະ ເປັນລົດທີ່ລາຄາເໝາະສົມ ສາມາດເຂົ້າເຖິງໄດ້ໃນຕະຫຼາດລົດຂອງລາວ ໂດຍຜ່ານມາສະເລ່ຍແມ່ນປະມານ 40-50 ຄັນຕໍ່ເດືອນຖືວ່າໄດ້ຕາມຄາດໝາຍທີ່ວາງໄວ້. ລົດຍີ່ຫໍ້ MG ເປັນລົດທີ່ມີຫຼາຍປະເພດ, ຫຼາຍລຸ້ນ ທີ່ເປັນຍານຍົນນະວັດຕະກຳຂອງປະເທດອັງກິດ ທີ່ມີຄວາມທົນທານ, ສາມາດໄປໄດ້ບໍ່ວ່າທາງຍາກ, ການເດີນທາງແບບຜະຈົນໄພ... ແລະ ການເປີດໂຕລົດສອງລຸ້ນນີ້ ເປັນລຸ້ນຫຼ້າສຸດທີ່ຫາກໍນໍາມາວາງຈໍາໜ່າຍຢູ່ ສປປ ລາວ ຊຶ່ງຫວັງວ່າຈະໄດ້ຮັບຄວາມນິຍົມ.
    ລົດລຸ້ນ THE ALL – NEW MG RX5 ແລະ MG ONE ແມ່ນສອງລຸ້ນສຸດພິເສດທີ່ມາໃໝ່, ເປັນລົດປະເພດ SUV (ຍານພາຫະນະອະເນກປະສົງແບບສະປອດ) ຊຶ່ງມີເຄື່ອງຈັກທີ່ແຮງເຕັມປະສິດ ທິພາບໃນການອອກໂຕ ກັບການຂັບຂີ່ເທິງທ້ອງຖະໜົນ ກັບທຸກໆເສັ້ນທາງ ທີ່ທາງຈະເດີນທາງໄປ ແລະ ໃນແຕ່ລະລຸ້ນຈະມີສີພິເສດໃຫ້ທ່ານໄດ້ເລືອກ. ສຳລັບລາຄາໃນງານ ແລະ ການແນະນຳຢ່າງເປັນທາງການ ມີການຫຼຸດລົງຈາກລາຄາເຕັມຄື: MG ONE ຈາກລາຄາເຕັມ 31.500 ໂດລາ ເຫຼືອ 26.900 ໂດລາ ແລະ THE ALL – NEW MG RX5 ຈາກ 32.500 ໂດລາ ເຫຼືອ 27.500 ໂດລາ; ພ້ອມນີ້, ຍັງມີຂໍ້ສະເໜີຫຼາຍຢ່າງບໍ່ວ່າຈະກ່ຽວກັບອັດຕາແລກປ່ຽນ, ການວາງເງິນຜ່ອນລົດເລີ່ມຕົ້ນ 20-30% ຂອງມູນຄ່າລົດ, ເອກະສານປະກອບງ່າຍ, ອະນຸມັດໄວ ແລະ ໂປຣໂມຊັນພິເສດ ພາຍໃນງານທີ່ເປີດຍາວໄປເຖິງ 9 ມື້ເຕັມ ແລະ ຈົນຮອດມື້ໝົດເຂດ ຊຶ່ງສາມາດຕິດຕາມໄດ້ທີ່ເພສເຟສບຸກຂອງ MG CITY Laos; ຖ້າທ່ານໃດທີ່ເຮັດສັນຍາຈອງລົດພາຍໃນງານ ແມ່ນຈະໄດ້ຮັບລາງວັນພິເສດໃນການຈັບສະຫຼາກ ເພື່ອກ້າວເຂົ້າສູ່ການເປີດໂຕຢ່າງເປັນທາງການ. 
(ຂ່າວ-ພາບ: ສຸກສະຫວັນ)