 |
ທ່ານ ທອງລີ ສີສຸລິດ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ (ຄຊປປລ) ໄດ້ຂຶ້ນກ່າວປິດງານວ່າ: ງານບຸນມະໂຫລານຊາວໜຸ່ມ, ເຍົາວະຊົນ ປີ 2025 ໄດ້ດໍາເນີນເປັນເວລາ 5 ວັນ ຊຶ່ງເຕັມໄປດ້ວຍບັນຍາກາດທີ່ເບີກບານມ່ວນຊື່ນ, ເຕັມໄປດ້ວຍເນື້ອໃນ ແລະ ມີຄວາມໝາຍອັນເລິກເຊິ່ງສໍາລັບສະມາຊິກຊາວ ໜຸ່ມ, ເຍົາວະຊົນພວກເຮົາ. ງານບຸນດັ່ງກ່າວໄດ້ຈັດມີກິດຈະກໍາທີ່ຫຼາກຫຼາຍເພື່ອສົນທະນາ, ພົບປະແລກປ່ຽນບົດຮຽນຖ່າຍທອດຄວາມຮູ້ ຊຶ່ງກັນ ແລະ ກັນໃນຫຼາຍຂົງເຂດເປັນຕົ້ນ ກ່ຽວກັບເອໄອ, ຮຽນໄປນໍາເຮັດວຽກໄປນໍາ, ເສດຖະກິດເອກະລາດເປັນເຈົ້າຕົນເອງ, ການສົ່ງເສີມການປົກປັກຮັກສາສິ່ງແວດລ້ອມ ແລະ ການບໍລິຫານຄວາມຫຼາກຫຼາຍທາງດ້ານຊີວະນາໆພັນ, ບົດບາດຂອງສັງຄົມຕໍ່ການດໍາເນີນທຸລະກິດທີ່ເປັນມິດກັບສິ່ງແວດລ້ອມ, ການມີສ່ວນຮ່ວມຂອງສັງຄົມ ແລະ ຊຸມຊົນໃນການປົກປັກຮັກສາວັດທະນະທໍາ ແລະຮີດຄອງປະເພນີອັນດີງາມຂອງຊາດ, ການພັດທະນາແບບຍືນຍົງ ແລະ ການຈ້າງງານສີຂຽວ. ນອກຈາກບັນດາຫົວຂໍ້ດັ່ງກ່າວຍັງມີເວທີການແຂ່ງຂັນຂອງຊາວໜຸ່ມ, ເຍົາວະຊົນ ແລະ ມີການຈັດວາງສະແດງສິນຄ້າ, ຜະລິດຕະພັນຂອງຜູ້ປະກອບການໜຸ່ມທີ່ມາຈາກຄະນະຊາວໜຸ່ມບັນດາກະຊວງ, ອົງການ, ນະຄອນຫຼວງວຽງຈັນ ແລະ ບັນດາແຂວງຈໍານວນໜຶ່ງ, ນີ້ເປັນການຢັ້ງຢືນເຖິງຜົນງານ ແລະ ຜົນສໍາເລັດໃນການນໍາພາ-ຊີ້ນໍາຂອງຄະນະພັກ, ຄະນະຊາວໜຸ່ມແຕ່ລະຂັ້ນ, ທັງເປັນການສະແດງໃຫ້ພວກເຮົາເຫັນໄດ້ຢ່າງຈະແຈ້ງວ່າ: ບັນດາສະຫາຍໄດ້ເຊີດຊູຄວາມເອົາໃຈໃສ່, ຄວາມຈົງຮັກພັກດີ ແລະ ມີຄວາມຮັບຜິດຊອບສູງ ເຂົ້າໃນການຈັດຕັ້ງປະຕິບັດໜ້າທີ່ການເມືອງທີ່ການຈັດຕັ້ງມອບໝາຍໃຫ້.ຜົນສຳເລັດໃນການຈັດງານໃນຄັ້ງນີ້ໄດ້ຢັ້ງຢືນໃຫ້ເຫັນເຖິງຄວາມສາມາຄີເປັນເອກະພາບ, ຄວາມຕັດສິນໃຈ ແລະ ຄວາມຮັບຜິດຊອບສູງຂອງບັນດາສະຫາຍຄະນະພັກແຕ່ລະຂັ້ນ, ຄະນະບໍລິຫານງານຊາວໜຸ່ມ ແລະ ສະມາຊິກຊາວໜຸ່ມ ຊຶ່ງໄດ້ທຸມເທກໍາລັງແຮງກາຍ, ງົບປະມານ ແລະ ມັນສະໝອງເຂົ້າໃນງານນີ້ຈົນປະສົບຜົນສໍາເລັດທີ່ຈົບງາມ.
ງານໃນຄັ້ງນີ້, ມີກິດຈະກໍາທັງໝົດມີ 26 ກິດຈະກໍາ ມີຜູ້ເຂົ້າຮ່ວມຈໍານວນ 5,000 ເທື່ອຄົນ ແລະ ມີຮ້ານມູນເຊື້ອຊາວໜຸ່ມຂອງບັນດາກະຊວງ, ອົງການ, ຄຊປປລ ແຂວງ, ນະຄອນຫຼວງ, ຮ້ານສົ່ງເສີມຄວາມຮູ້, ຊ່ວຍເຫຼືອສັງຄົມ, ບໍລິຈາກເລືອດ, ຂາຍສິນຄ້າຫັດຖະກຳ, ອາຫານຕ່າງໆ ແລະ ອື່ນໆ ລວມທັງໝົດ 230 ຮ້ານ.
(ຂ່າວ: ວັນເພັງ, ພາບ: ສຊປລ)
ຄໍາເຫັນ