 |
ງານບຸນທີ່ຈະຈັດຂຶ້ນໃນຄັ້ງນີ້, ມີຫຼາຍກິດຈະກໍາທີ່ໜ້າສົນໃຈ ແລະ ໜ້າໄປທ່ອງທ່ຽວ, ຊຶ່ງນອກຈາກທ່ານຈະໄດ້ຮັບຊົມບັນຍາກາດການແຂ່ງຂັນຊ່ວງເຮືອ ໃນທ່າມກາງທໍາມະຊາດທີ່ສວຍສົດງົດງາມອັນປະທັບໃຈແລ້ວ, ຍັງຈະໄດ້ທ່ຽວຊົມຮ້ານວາງຂາຍສະແດງສິນຄ້າປະເພດອຸປະໂພກ, ບໍລິໂພກ, ສິນຄ້າຫັດຖະກໍາ, ກະສິກໍາ ຈາກພູມປັນຍາຊາວບ້ານ, ອາຫານການກິນທີ່ຫຼາກຫຼາຍ, ຮັບຊົມບູ໊ດວາງສະແດງສິນຄ້າ, ຜະລິດຕະພັນເຄື່ອງທີ່ລະນຶກຂອງແດນສະຫວັນນໍ້າງື່ມຣີສອດ, ພ້ອມທັງມີສິດຮ່ວມປິ່ນວົງລໍ້ລຸນຮັບລາງວັນຕ່າງໆອີກຫຼາຍລາງວັນ, ພິເສດງານບຸນຊ່ວງເຮືອທີ່ຈັດຂຶ້ນໃນປີນີ້ແມ່ນຈັດແບບຍິ່ງໃຫຍ່ເປີດກວ້າງ ໂດຍເປີດໂອກາດໃຫ້ເຮືອຈາກຫຼາຍຄະນະເຂົ້າຮ່ວມ, ພ້ອມນີ້ຍັງມີວົງດົນຕີມິດຕະພາບມິວສິກເຕັມວົງມາສ້າງບັນຍາກາດເບີກບານມ່ວນຊື່ນໃຫ້ແກ່ງານອີກດ້ວຍ.
 |
ເປີດຮັບຕະຫຼາດນັດເລີ່ມແຕ່ວັນທີ 30-31 ຕຸລາ 2025 ເຖິງວັນທີ 1 ພະຈິກ 2025, ຊາວຄ້າຂາຍສາມາດຈັບຈອງຮ້ານຂາຍເຄື່ອງໄດ້. ປັດຈຸບັນຍັງເປີດຮັບສະໝັກທີມສີພາຍເຮືອຊ່ວງ ໂດຍໃຫ້ນໍາເຮືອມາເອງ, ເປີດກວ້າງສີພາຍຄົນລາວພາຍໃນປະເທດ, ຈຶ່ງຂໍເຊີນຊວນທີມງາມເຮືອກິລາປະເພດ 12 ສີພາຍ ລົງທະບຽນເຂົ້າຮ່ວມແຂ່ງຂັນ. ສໍາລັບລາງວັນເຮືອຊ່ວງ ມີ 8 ລາງວັນ, ລາງວັນທີ 1 ໄດ້ຮັບເງິນສົດ 25 ລ້ານກີບ ພ້ອມຂັນ 1 ໜ່ວຍ, ລາງວັນທີ 2 ເງິນສົດ 18 ລ້ານກີບ ພ້ອມຂັນ 1 ໜ່ວຍ, ລາງວັນທີ 3 ເງິນສົດ 13 ລ້ານກີບ ຂັນ 1 ໜ່ວຍ, ລາງວັນທີ 4 ເງິນສົດ 10 ລ້ານກີບ ຂັນ 1 ໜ່ວຍ, ລາງວັນທີ 5 ເງິນສົດ 7 ລ້ານກີບ ຂັນ 1 ໜ່ວຍ, ລາງວັນທີ 6 ເງິນສົດ 5 ລ້ານກີບ ຂັນ 1 ໜ່ວຍ, ລາງວັນທີ 7 ເງິນສົດ 4 ລ້ານກີບ ຂັນ 1 ໜ່ວຍ, ລາງວັນທີ 8 ເງິນສົດ 3 ລ້ານກີບ ພ້ອມຂັນ 1 ໜ່ວຍ.
 |
ສໍາລັບເຮືອທຸກຄະນະທີ່ລົງທະບຽນເຂົ້າຮ່ວມແຂ່ງຂັນ ຮັບໄປເລີຍເງິນສົດ 1 ລ້ານກີບ. ວັນທີ 31 ຕຸລາ 2025 ເວລາ 13:00 ໂມງ ໃຫ້ສົ່ງຕົວແທນຂອງແຕ່ລະທີມເຂົ້າຮ່ວມກອງປະຊຸມຮັບຟັງພິທີການ, ກົດລະບຽບການແຂ່ງຂັນ, ຈັບສະຫຼາກປະກົບຄູ່ ແລະ ກວດກາເບິ່ງສະຖານທີ່ແຂ່ງຂັນ, ກ່ອນເຂົ້າຮ່ວມປະຊຸມມີອາຫານທ່ຽງໃຫ້ຮັບປະທານ, ສົນໃຈເຂົ້າຮ່ວມແຂ່ງຂັນ ແລະ ຈັບຈອງຮ້ານຂາຍເຄື່ອງ ໂທ: 020 55607889.
 |
(ແຫຼ່ງຂ່າວ: ແຂວງວຽງຈັນ)
ຄໍາເຫັນ