ຮອບຊີງຊະນະເລີດລະດັບພາກພື້ນ ປີ 2024 ພາຍໃຕ້ຫົວຂໍ້: ການພັດທະນາທີ່ຍືນຍົງຂຶ້ນໃນວັນທີ 22 ຕຸລານີ້ ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ນະຄອນຫຼວງວຽງຈັນ ໂດຍມີທ່ານ ສິຣິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານສິນທະວອນ ດາລາວົງ ຮອງອະທິການບໍດີ ມຊ, ທ່ານ ປິຕິ ສິຣິແສນງາມ ຜູ້ອໍານວຍການມູນນິທິອາຊຽນ, ມີຜູ້ອໍານວຍການພາກພື້ນ ຮັບຜິດຊອບວຽກງານຊ່ວຍສັງຄົມສົງເຄາະຂອງວິສາຫະກິດໃນຂົງເຂດອາຊີຕາເວັນອອກ, ປາຊີຟິກ, ສປຈີນ, ເອກອັກຄະລັດຖະທູດ,ຜູ້ຕາງໜ້າຈາກສະຖານທູດຂອງບັນດາປະເທດສະມາຊິກອາຊຽນ ປະຈໍາ ລາວ, ຕາງໜ້ານັກສຶກສາຈາກ 10 ປະເທດສະມາຊິກອາຊຽນ ແລະ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນໄລຍະຜ່ານມາ ມຊ ໄດ້ຮ່ວມມືກັບພາກສ່ວນກ່ຽວຂ້ອງຈັດງານດັ່ງກ່າວຂຶ້ນໃນລະດັບປະເທດ ໃນປີ 2019 ແລະ ປີ 2023. ການຈັດງານຄັ້ງນີ້, ແມ່ນການວິເຄາະຂໍ້ມູນດ້ານເສດຖະກິດ-ສັງຄົມ ເພື່ອໄຈ້ແຍກບັນຫາທີ່ປະເທດສະມາຊິກອາຊຽນກຳລັງປະເຊີນຢູ່ ແລະ ຈາກ 18 ເປົ້າໝາຍຂອງອົງການສະຫະປະຊາຊາດ (ສປຊ). ໃນນັ້ນ, ໄດ້ເລືອກເອົາ 6 ເປົ້າໝາຍການພັດທະນາແບບຍືນຍົງຂອງອົງການ ສປຊແລະ ນໍາສະເໜີວິທີແກ້ໄຂບັນຫາດັ່ງກ່າວໂດຍໝູນໃຊ້ເຕັກໂນໂລຊີເຂົ້າຊ່ວຍຊຶ່ງ 6 ເປົ້າໝາຍທີ່ນໍາມາວິເຄາະປະກອບມີ: 1) ເປົ້າໝາຍທີ 6 ຮັບປະກັນໃຫ້ມີນໍ້າໃຊ້ ແລະ ການບໍລິຫານນໍ້າແບບຍືນຍົງ ແລະ ສຸຂະອະນາໄມສໍາລັບໝົດທຸກຄົນ; 2) ເປົ້າໝາຍທີ 7 ຮັບປະກັນການເຂົ້າເຖິງພະລັງງານທີ່ທັນສະໄໝ, ຍືນຍົງ, ເຊື່ອຖືໄດ້ ແລະ ລາຄາບໍ່ແພງສໍາລັບໝົດທຸກຄົນ; 3)ເປົ້າໝາຍທີ 8 ສົ່ງເສີມການຂະຫຍາຍຕົວທາງດ້ານເສດຖະກິດຢ່າງຕໍ່ເນື່ອງ, ທົ່ວເຖິງ ແລະ ຍືນຍົງ, ການມີວຽກເຮັດງານທໍາທີ່ມີປະສິດທິຜົນ, ເຕັມສ່ວນ ແລະ ວຽກທີ່ມີຄຸນຄ່າສໍາລັບໝົດທຸກຄົນ; 4) ເປົ້າໝາຍທີ 11 ຕົວເມືອງ ແລະ ທີ່ພັກອາໄສຂອງປະຊາຊົນໃຫ້ທົ່ວເຖິງ, ປອດໄພ, ໝັ້ນຄົງທົນທານ ແລະ ຍືນຍົງ; 5) ເປົ້າໝາຍທີ 12 ຮັບປະກັນຮູບແບບການອຸປະໂພກ ແລະການຜະລິດ ໃຫ້ມີຄວາມຍືນຍົງ; 6) ເປົ້າໝາຍທີ 13 ມາດຕະຖານອັນຮີບດ່ວນ ເພື່ອແກ້ໄຂບັນຫາການປ່ຽນແປງດິນຟ້າອາກາດ ແລະ ຮັບມືຈາກຜົນກະທົບບັນຫາດັ່ງກ່າວ.
ການແຂ່ງຂັນໃນຄັ້ງນີ້, ໄດ້ແບ່ງອອກເປັນ 2 ກຸ່ມ ໃນການນໍາສະເໜີບົດຈາກຜູ້ເຂົ້າຮ່ວມແຂ່ງຂັນແຕ່ລະປະເທດສະມາຊິກອາຊຽນຄື: ກຸຸ່ມທີ 1: ບຣູໄນ, ກໍາປູເຈຍ, ອິນໂດເນເຊຍ, ລາວ, ມາເລເຊຍ; ກຸ່ມທີ 2: ມຽນມາ, ຟີລິບປິນ, ສິງກະໂປ, ໄທ, ຫວຽດນາມ ໂດຍເປັນຕົວແທນນັກຮຽນ-ນັກສຶກສາປະເທດລະ 2 ຄົນ.
ທ່ານສິນທະວອນ ດາລາວົງ ກ່າວວ່າ: ງານໃນຄັ້ງນີ້, ແມ່ນມີຄວາມສໍາຄັນຫຼາຍແລະ ປີນີ້ ສປປ ລາວ ໄດ້ຮັບກຽດເປັນປະທານອາຊຽນ. ການແຂ່ງຂັນໃນຄັ້ງນີ້, ຈະເປັນເວທີແລກປ່ຽນບົດຮຽນຊຶ່ງກັນ ແລະ ກັນ ເຮັດໃຫ້ຄູ-ອາຈານ, ນັກສຶກສາບັນດາປະເທດອາຊຽນ ທີ່ເຂົ້າຮ່ວມໄດ້ຮັບຮູ້ຂໍ້ມູນຂອງປະເທດອາຊຽນໄດ້ຫຼາຍຂຶ້ນ. ພ້ອມນັ້ນ, ນັກສຶກສາລາວຍັງມີໂອກາດໄດ້ຮຽນຮູ້ກັບບັນດານັກຮຽນ-ສຶກສາປະເທດອາຊຽນ. ໃນນັ້ນ, ຍັງເປັນການຮ່ວມມືທີ່ດີ, ສ້າງເງື່ອນໄຂ, ສ້າງໂອກາດໃຫ້ນັກຮຽນ-ນັກສຶກສາ ໄດ້ມີການພັດທະນາທັກສະ,ຄວາມຮູ້ ແລະ ຄວາມສາມາດຂອງເຂົາເຈົ້າໃນເວທີພາກພື້ນ ແລະ ສາກົນ.
ຜົນແຂ່ງຂັນໃນຄັ້ງນີ້: ຊະນະເລີດ (ທີ 1) ໄດ້ແກ່ ທີມນັກສຶກສາປະເທດ ຫວຽດນາມ ໄດ້ຮັບທຶນການສຶກສາ 2,000 ໂດລາ ພ້ອມໂລ້ລາງວັນ ແລະ ໃບຢັ້ງຢືນ; ທີ 2 ຕົວແທນນັກສຶກສາ ປະເທດ ມາເລເຊຍ ໄດ້ຮັບທຶນການສຶກສາ 1,500 ໂດລາ ພ້ອມໂລ້ລາງວັນ ແລະ ໃບຢັ້ງຢືນ; ທີ 3 ຕົວແທນນັກສຶກສາປະເທດໄທ ໄດ້ຮັບທຶນການສຶກສາ 1,000 ໂດລາພ້ອມໂລລາງວັນ ແລະ ໃບຢັ້ງຢືນ. ໃຫ້ກຽດມອບລາງວັນໃນຄັ້ງນີ້ ໂດຍ ທ່ານ ສິຣິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ.(ຂ່າວ-ພາບ: ວັນເພັງ)
ຄໍາເຫັນ