 |
ທ່ານ ສົມໄໝ ພົມມະຈັນ ອຳນວຍການສຳນັກພິມດີບຸກ ທັງເປັນປະທານຄະນະຈັດງານໄດ້ກ່າວວ່າ: ງານມະຫະກຳໜັງສືປີນີ້ໄດ້ຖືກຍົກລະດັບຂຶ້ນສູ່ເວທີສາກົນຢ່າງເຕັມຮູບແບບ ໂດຍມີຈຸດປະສົງຫຼັກເພື່ອຜັນຂະຫຍາຍແຜນຍຸດທະສາດການພັດທະນາຊັບພະຍາກອນມະນຸດຂອງລັດຖະບານ ສົ່ງເສີມວັດທະນະທຳການອ່ານ ແລະ ການຮຽນຮູ້ຕະຫຼອດຊີວິດ ພ້ອມກັນນີ້ຍັງໃຊ້ "ໜັງສື" ເປັນຂົວຕໍ່ໃນການແລກປ່ຽນວັດທະນະທຳລະຫວ່າງຊາດ ແລະ ເປັນວາລະພິເສດໃນການຮ່ວມສະເຫຼີມສະຫຼອງ ຄົບຮອບ 30 ປີຂອງ ມຊ ອີກດ້ວຍ.
 |
ທ່ານນາງ ບຸນຊ່ອນ ໄຊວຸດທິ ຮອງປະທານຄະນະຈັດງານ ໄດ້ລາຍງານເຖິງການກະກຽມຄວາມພ້ອມວ່າ:ງານປີນີ້ຄາດຄະເນຈະມີຜູ້ເຂົ້າຊົມ 15,000-20,000 ຄົນ, ປັດຈຸບັນພື້ນທີ່ວາງສະແດງທັງໝົດ 75 ຮ້ານ ໄດ້ຖືກຈັບຈອງເຕັມແລ້ວ ຊຶ່ງປະກອບມີການອອກຮ້ານຈາກສະຖານທູດການາດາ, ສະຖານທູດຫວຽດນາມ, ສະຖາບັນພາສາຝຣັ່ງ, ບັນດາສຳນັກພິມທີ່ມີຊື່ສຽງທັງພາຍໃນ ແລະ ຕ່າງປະເທດ ຕະຫຼອດເຖິງຮ້ານອາຫານ ແລະ ເຄື່ອງດື່ມຕ່າງໆ. ຕະຫຼອດງານຜູ້ເຂົ້າຮ່ວມຈະໄດ້ພົບກັບປະສົບການທາງປັນຍາ ແລະ ວັດທະນະທຳແບບຄົບວົງຈອນເຊັ່ນ: ຄັງປັນຍາມະຫາສານ, ເລືອກຊື້ປຶ້ມນັບແສນໆເຫຼັ້ມໃນລາຄາພິເສດ ຈາກສຳນັກພິມ ແລະ ຮ້ານປຶ້ມທີ່ມີຊື່ສຽງ ການແນະນຳປຶ້ມໃໝ່ 18 ເຫຼັ້ມ ເວທີປຸກໄຟຝັນ ແລະ ເສວະນາ: ພົບປະແລກປ່ຽນປະສົບການກັບວິທະຍາກອນຊື່ດັງ, ນັກທຸລະກິດ, CEO ລະດັບປະເທດ ແລະ ພົບປະນັກຂຽນ, ປະພັນລາງວັນຊີໄຣ, ເທດສະການສິລະປະ-ວັດທະນະທຳ: ຮັບຊົມການສະແດງວັດທະນະທຳນານາຊາດ, ການເດີນແບບປຶ້ມ (Book Fashion Show) ການອ່ານກະວີ, ການແຂ່ງຂັນໂຕ້ວາທີ ແລະ ການເຕັ້ນ Cover Dance ລວມກິດຈະກຳທັງໝົດຫຼາຍກວ່າ 130 ລາຍການ. ໂອກາດທາງການສຶກສາ: ຮັບຟັງການແນະນຳທຶນການສຶກສາ ແລະ ຫຼັກສູດພາສາຕ່າງປະເທດຈາກ ສະຖານທູດ ແລະ ສູນພາສາຕ່າງໆ ໂດຍກົງ, ຄະນະຈັດງານພ້ອມດ້ວຍອາສາສະໝັກຫຼາຍກວ່າ 66 ຄົນ ເຊີນຊວນນັກຮຽນ, ນັກສຶກສາ, ຜູ້ປົກຄອງ ແລະ ປະຊາຊົນທົ່ວໄປທີ່ສົນໃຈເຂົ້າຮ່ວມງານໄດ້ໂດຍບໍ່ເສຍຄ່າ ຕັ້ງແຕ່ວັນທີ 10-15 ມີນາ 2026 ເວລາ 9-17:00 ໂມງ ທີ່ສະໂມສອນໃຫຍ່ ມຊ (ຊັ້ນ 1) ຂໍ້ມູນເພີ່ມຕື່ມສາມາດຕິດຕາມໄດ້ທີ່: Facebook Page: ສຳນັກພິມດີບຸກ D-Book Publishing.
ຂ່າວ: ວຽງຈັນໃໝ່
ຄໍາເຫັນ