 |
ທ່ານ ບຸນເລື່ອນ ດວງເດືອນ ຫົວໜ້າສະຖາບັນການແພດ ແລະ ການຢາພື້ນເມືອງ ກະຊວງສາທາລະ ນະສຸກ ທັງເປັນຮອງປະທານສະມາຄົມອະນຸລັກຢາພື້ນເມືອງລາວ ໄດ້ຖະແຫຼງຂ່າວຕໍ່ສື່ມວນຊົນໃນວັນທີ 9 ທັນວາຜ່ານມາວ່າ: ສະຖາບັນການແພດ ແລະ ການຢາພື້ນເມືອງ ກະຊວງສາທາລະນະສຸກຮ່ວມກັບສະມາຄົມອະນຸລັກຢາພື້ນເມືອງລາວ ຈະຈັັດງານວາງສະແດງຢາພື້ນເມືອງລາວ ຄັ້ງທີ II ເພື່ອສະເຫຼີມສະຫຼອງວັນເກີດປະທານ ໄກສອນ ພົມວິຫານຄົບຮອບ 105 ປີ (13/12/1920-13/12/2025); ຊົມເຊີຍວັນສະຖາປະນາສປປ ລາວ ຄົບຮອບ 50 ປີ (2/12/1975-2/12/2025) ຜ່ານມາ, ເພື່ອສະເຫຼີມສະຫຼອງວັນສ້າງຕັ້ງສະມາຄົມອະນຸ ລັກຢາພື້ນເມືອງລາວ ຄົບຮອບ 3 ປີ (13/12/2022-13/12/2025) ທັງເປັນການສົ່ງເສີມ ແລະ ເປີດໂອກາດໃຫ້ຜູ້ປະກອບການຜະລິດຕະພັນຢາພື້ນເມືອງ ກໍຄືສະມາຊິກພາຍໃນສະມາຄົມອະນຸລັກຢາພື້ນເມືອງລາວໄດ້ນໍາເອົາຜະລິດຕະພັນຂອງຕົນມາວາງສະແດງ ແລະ ຈຳໜ່າຍໃຫ້ສັງຄົມ ກໍຄືປະຊາຊົນລາວບັນດາເຜົ່າໄດ້ຮັບຮູ້ ແລະ ນຳໃຊ້ຜະລິດຕະພັນຢາພື້ນເມືອງລາວຢ່າງທົ່ວເຖິງ. ພ້ອມນີ້, ຍັງເປັນການຊຸກຍູ້ສົ່ງເສີມໃຫ້ຄົນລາວຫັນມາຊົມໃຊ້ຜະລິດຕະພັນຢາພື້ນເມືອງລາວທີ່ຜະລິດໂດຍຄົນລາວ ທີ່ມີຄຸນນະພາບໄດ້ມາດຕະຖານ, ຜ່ານ ອຍ ແລະ ອື່ນໆ ຄວບຄູ່ກັບຢາຫຼວງ.
 |
ທ່ານ ບຸນເລື່ອນ ດວງເດືອນ ໃຫ້ຮູ້ຕື່ມວ່າ: ງານວາງສະແດງໃນຄັ້ງນີ້ຈະຊ່ວຍຂັບເຄື່ອນການໃຊ້ຢາ ພື້ນເມືອງລາວໃນການຮັກສາສົມທົບຢາຫຼວງ ແລະ ການແພດທາງເລືອກໃນສະຖານທີ່ບໍລິການຂັ້ນຕ່າງໆ, ການສົ່ງເສີມຜູ້ຜະລິດ-ທ່າແຮງຈາກຊັບພະຍາກອນທີ່ເປັນຢາ, ຮັກສາພູມປັນຍາຂອງທ້ອງຖິ່ນ, ການສືບສານພັນທຸກຳພືດທີ່ເປັນຢາ ແລະ ອົງຄວາມຮູ້ດັ້ງເດີມຂອງຊາວລາວ ທັງເປັນການຍົກລະດັບມາດຕະຖານການຜະລິດຢາພື້ນເມືອງລາວ ແລະ ພັດທະນາໃຫ້ສູງຂຶ້ນເປັນກ້າວໆ ສ້າງຄວາມເຊື່ອໝັ້ນຕໍ່ຜູ້ບໍລິໂພກທາງດ້ານຄຸນນະພາບ, ປະສິດທິພາບ ແລະ ຄວາມປອດໄພ.
ການຈັດງານວາງສະແດງຄັ້ງນີ້, ແມ່ນເຫດການທີ່ສໍາຄັນຂອງວຽກງານການແພດ ແລະ ການຢາພື້ນ ເມືອງຂອງກະຊວງສາທາລະນະສຸກທີ່ສະທ້ອນໃຫ້ເຫັນການເສີມຂະຫຍາຍແນວຄິດປະທານ ໄກສອນ ພົມວິຫານຕໍ່ວຽກງານການແພດ ແລະ ການຢາພື້ນເມືອງລາວ ໂດຍຕິດພັນມໍຣະດົກທາງວັດທະນະທຳ ແລະ ຄວາມຮັ່ງມີທາງທຳມະຊາດຂອງປະເທດລາວທີ່ຄວນອະນຸລັກ ແລະ ພັດທະນາໃຫ້ທັນສະໄໝ.
 |
ຂ່າວ-ພາບ: ບຸນອູ້ມ
ຄໍາເຫັນ