 |
ທ່ານ ນາງ ຈັນທະຈອນ ວົງໄຊ ກ່າວວ່າ: ງານໃນຄັ້ງນີ້, ຈັດຂຶ້ນເພື່ອເປັນການຂໍ່ານັບຊົມເຊີຍຜົນສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ພ້ອມທັງໂຄສະນາວັດທະນະທໍາດ້ານອາຫານລາວໃຫ້ເຊື່ອມສານກັບວິຖີຊີວິດຂອງປະຊາຄົມອາຊຽນ ໃນຖານະທີ່ ສທຍ ເປັນປະທານເຄືອຂ່າຍຜູ້ປະກອບການແມ່ຍິງອາຊຽນ (AWEN LAOS) ໃນປີ 2026-2027; ເພື່ອສືບຕໍ່ອະນຸລັກ, ສົ່ງເສີມອາຫານທີ່ເປັນເອກະລັກຂອງລາວໃນທ້ອງຖິ່ນຕ່າງໆ ໂດຍສະເພາະອາຫານປະເພດລາບລາວ (ເພາະໃນປີ 2025 ຜ່ານມາ ສທຍ ໄດ້ເປັນເຈົ້າການສະເໜີຂໍລາບລາວ ເປັນມໍຣະດົກໂລກທາງດ້ານອາຫານໂດຍຜ່ານກະຊວງວັດທະນະທໍາ ແລະ ການທ່ອງທ່ຽວ ແລະ ໃຫ້ສາມາດເຜີຍແຜ່ເພື່ອການສົ່ງອອກສູ່ປະຊາຄົມອາຊຽນໄດ້; ເພື່ອເປັນບ່ອນໂຄສະນາ ແລະ ຈໍາໜ່າຍຜະລິດຕະພັນທາງດ້ານອາຫານຂອງຜູ້ປະກອບການຂະໜາດນ້ອຍ ແລະ ກາງ, ທັງເປັນການສະໜັບສະໜູນຊ່ວຍເຫຼືອຊຶ່ງກັນແລະກັນຢ່າງຕໍ່ເນື່ອງ; ໂຄສະນາ ແລະ ສົ່ງເສີມທຸລະກິດອາຫານລາວໃຫ້ເປັນທີ່ຍອມຮັບວ່າການບໍລິໂພກອາຫານລາວແມ່ນສະອາດ, ປອດໄພ. ງານເທດສະການອາຫານລາວ ເປັນຕະຫຼາດນັດລະດັບຊາດ ເພື່ອໃຫ້ຜູ້ປະກອບການແມ່ຍິງ ແລະ ຄອບຄົວ ໄດ້ຈໍາໜ່າຍຜົນຜະລິດກະສິກໍາ, ຫັດຖະກໍາ ແລະ ໂຄສະນາຍີ່ຫໍ້ ແລະ ຄຸນນະພາບຂອງຕົນ, ຜູ້ບໍລິໂພກສາມາດ ຈັບຈ່າຍຊື້ຂາຍດ້ວຍຄວາມໝັ້ນໃຈໄດ້.
 |
ງານເທດສະການອາຫານລາວ ປີ 2026 ຈະເປີດຂຶ້ນໃນວັນທີ 26-30/1/2026 ທີ່ສວນເຈົ້າອານຸວົງ ແຄມຂອງ ຄືດັ່ງທຸກປີ. ງານໃນຄັ້ງນີ້, ຈັດແບບເປີດກວ້າງ ໂດຍອະນຸຍາດໃຫ້ມີອາຫານລາວແບບພື້ນບ້ານ, ອາຫານລາວປະຍຸກ ແລະ ອາຫານນາໆຊາດຈໍານວນໜຶ່ງມາວາງຂາຍເຖິງ 180 ຮ້ານ. ໃນນັ້ນ, ຈະມີ “ຈໍາລອງເຮືອນຄົວລາວບູຮານ” ຈາກປະສົບການຈິງຂອງຮ້ານອາຫານຄົວລາວ 33 ປີ. ແລະ “ ແຂວງແຫ່ງສະເໜ່ ” ໂດຍການເປັນເຈົ້າການຂອງສະມາຄົມນັກທຸລະກິດແມ່ຍິງ ແຂວງສະຫວັນນະເຂດ. ນອກນັ້ນ, ເນື່ອງຈາກວ່າທາງຜູ້ລ້ຽງໝູ ທີ່ຊາວບ້ານໂພນໂຮມ ເມືອງປາກຊັນ ແຂວງບໍລິຄໍາໄຊ ໄດ້ລ້ຽງໝູ ແລະ ມີອາຫານແປຮູບຈາກຜະລິດຕະພັນໝູເກີນຄວາມຕ້ອງການຂອງແຂວງ, ທາງຄະນະຈັດງານໄດ້ຮັບການຊີ້ນໍາຂອງທ່ານລັດຖະມົນຕີ ກະຊວງອຸດສາຫະກໍາ ແລະ ການຄ້າ ຈຶ່ງໄດ້ສະເໜີພາກສ່ວນກ່ຽວຂ້ອງໃຫ້ນໍາມາຈໍາໜ່າຍຊີ້ນໝູແປຮູບໃນງານ. ດັ່ງນັ້ນ, ຂໍເຊີນປະຊາຊົນ ແລະ ທຸກພາກສ່ວນເຂົ້າມາອຸດໜູນໄດ້ທຸກມື້ ຢູ່ທີ່ງານ. ພ້ອມດຽວກັນນີ້, ຍັງມີອາຫານລາວທີ່ເປັນເອກະລັກຈາກນະຄອນຫຼວງ, ແຂວງຕ່າງໆ, ຮ້ານອາຫານພື້ນເມືອງລາວ ທີ່ໂຄສະນາໂດ່ງດັງໃນສື່ອອນລາຍ. ທີ່ຂາດບໍ່ໄດ້ກໍຄືບັນດາຮ້ານຂອງຄູ່ຮ່ວມຍຸດທະສາດ (ບໍລິສັດເບຍລາວຈໍາກັດ, ກຸ່ມບໍລິສັດດາວເຮືອງຈໍາກັດ ແລະ ຜູ້ສະໜັບສະໜູນງານ ແລະ ສະມາຊິກຂອງພວກເຮົາ). ພິເສດໃນໄລຍະດຽວກັນ ສທຍ ຍັງຈະຈັດກອງປະຊຸມ AWEN board meeting ຄັ້ງທໍາອິດ ທີ່ລາວເຮົາເປັນປະທານ AWEN (ເຄືອຂ່າຍຜູ້ປະກອບການແມ່ຍິງອາຊຽນ) ລະຫວ່າງວັນທີ 27-29/1/2026 ເພື່ອໃຫ້ແຂກກອງປະຊຸມໄດ້ມາທ່ຽວງານຫຼັງເລີກປະຊຸມໃນທຸກວັນ; ໃນປີ 2026 ຄາດຄະເນຈະມີເມັດເງິນໝູນວຽນປະມານ 10 ກວ່າຕື້ກີບ (ທຽບໃສ່ປີກາຍແມ່ນ 8 ຕື້ກີບ).
ສໍາລັບກິດຈະກໍາໃນງານຄັ້ງນີ້, ໄດ້ຕົບແຕ່ງ “ເຮືອນຄົວລາວບູຮານ” ເປັນບ່ອນອະນຸລັກ ແລະ ເຜີຍແຜ່ວັດທະນະທໍາ, ວິຖີຊີວິດ, ການຕົບແຕ່ງເຮືອນຄົວ, ອາຫານເອກະລັກ ທີ່ສາມາດແຕ່ງກິນແບບລາວໆ ເພື່ອໃຫ້ແຂກທ່ຽວຊົມ; ຕົບແຕ່ງ “ແຂວງແຫ່ງສະເໜ່” ຂອງງານ (ຈາກແຂວງສະຫວັນນະເຂດ) ກ່ຽວກັບອະນຸລັກ ແລະ ເຜີຍແຜ່ວິຖີຊີວິດຂອງເຜົ່າຕ່າງໆໃນພາກກາງຂອງລາວສູ່ສາຍຕາຊາວອາຊຽນທີ່ມາທ່ຽວປະເທດລາວ; ສາທິດການຕໍາໝາກຫຸ່ງ ຈາກແມ່ຄົວຕົວຈີວ (ຫຼານນ້ອຍເຍົາວະຊົນໂຮງຮຽນຕ່າງໆ); ສາທິດການປຸງແຕ່ງ “ໝໍ້າຊີ້ນ” ຈາກແຂວງສະຫວັນນະເຂດ; ສະແດງສິລະປະຫຼານນ້ອຍໃນມື້ເປີດງານ, ເດີນແບບໃນຊຸດລາວຈາກຫຼານນ້ອຍເຍົາວະຊົນ ແລະ ສິລະປິນນັກຮ້ອງຈາກຄ່າຍເພງ ສະຫຼັບກັນໃນແຕ່ລະຄໍ່າຄືນ; ວາງສະແດງ ແລະ ຂາຍອາຫານລາວເອກະລັກ 18 ແຂວງ ແລະ ອາຫານລາວປະຍຸກທົ່ວໄປ; ມີການບໍລິການຂອງທະນາຄານ ແລະ ໃຫ້ຄວາມຮູ້ທາງດ້ານການເງິນການຕະຫຼາດ ໃນການເຂົ້າຫາແຫຼ່ງທຶນດອກເບັ້ຍຕໍ່າ ເພື່ອຊ່ວຍເຫຼືອທຸລະກິດຂະໜາດນ້ອຍ, ກາງ ແລະ ຈຸນລະວິຫາຫະກິດ ແລະ ມີການໄລ້ສົດທຸກວັນເປັນປົກກະຕິ.
 |
ທ່ານ ນາງ ຈັນທະຈອນ ວົງໄຊ ຍັງໄດ້ເຊີນຊວນມວນຊົນທຸກຖ້ວນໜ້າໂດຍຜ່ານສື່ຕ່າງໆ ຈົ່ງໄດ້ເຂົ້າຮ່ວມທ່ຽວ ແລະ ເກັບພາບພາຍໃນງານເມືອຝາກທາງບ້ານ ແລະ ເລືອກຊິມເລືອກຊື້ອາຫານ, ເຄື່ອງດື່ມ, ເຄື່ອງຫັດຖະກຳລາວໃນງານຄັ້ງນີ້ຊຶ່ງຈັດຂຶ້ນເປັນເວລາ 5 ວັນ ເລີ່ມແຕ່ວັນທີ 26-30/1/2026 ເວລາ 10:00 ໂມງເຊົ້າ - 22:00 ໂມງ.
ຂ່າວ-ພາບ: ວັນເພັງ+ພູວັນ
ຄໍາເຫັນ