ພ້ອມດ້ວຍຂະແໜງການກ່ຽວຂ້ອງໄດ້ເຄື່ອນໄຫວຕິດຕາມສະຖານີສູບນໍ້າຢູ່ຈຸດສໍາຄັນຕ່າງໆ ເພື່ອຕິດຕາມລະດັບນໍ້າແລະ ແກ້ໄຂບັນຫາການສະໜອງນໍ້າບໍ່ພຽງພໍໃນ ນວ ຂຶ້ນໃນວັນທີ 18 ມີນາຜ່ານມາ ຊຶ່ງຄະນະໄດ້ລົງຕິດຕາມຢູ່ສະຖານີສູບນໍ້າເຂດແຄມຂອງ ແລະ ຈຸດສະຖານທີ່ຫ້ອງການວິສະວະກຳ ແລະ ສິ່ງແວດລ້ອມ ລັດວິສາຫະກິດນໍ້າປະປານວ.
ການລົງເຄື່ອນໄຫວຄັ້ງນີ້ໄດ້ຮັບຟັງການລາຍງານຂອງທ່ານ ໄຊຍາ ໄຊມຸງຄຸນ ຜູ້ອຳນວຍການລັດວິສາຫະກິດນໍ້າປະປານວ ໂດຍຍົກໃຫ້ເຫັນສະພາບການຜະລິດ ແລະ ການສະໜອງນໍ້າໃຫ້ປະຊາຊົນວ່າ: ປັດຈຸບັນລັດວິສາຫະກິດນໍ້າປະປາ ນວ ສາມາດຜະລິດນໍ້າສູງສຸດໄດ້ 348,000 ແມັດກ້ອນຕໍ່ວັນ ຊຶ່ງມາຈາກ 6 ໂຮງງານຄື: ໂຮງງານດົງໝາກຄາຍກໍາລັງການຜະລິດ 120,000 ແມັດກ້ອນຕໍ່ວັນ, ໂຮງງານຈີ່ນາຍໂມ້ກໍາລັງການຜະລິດ 80,000 ແມັດກ່ອນຕໍ່ວັນ, ໂຮງງານເກົ້າລ້ຽວ ກໍາລັງການຜະລິດ 60,000 ແມັດກ້ອນຕໍ່ວັນ, ໂຮງງານດົງບັງກຳລັງການຜະລິດ 44,000 ແມັດກ້ອນຕໍ່ວັນ, ໂຮງງານແສນດິນ ກໍາລັງການຜະລິດ 24,000 ແມັດກ້ອນຕໍ່ວັນ, ໂຮງງານທ່າເດື່ອ ກໍາລັງການຜະລິດ 20,000 ແມັດກ້ອນຕໍ່ວັນ. ສໍາລັບໂຮງງານຢູ່ສາຂາເມືອງສັງທອງມີ 6 ໂຮງງານ ກໍາລັງການຜະລິດໄດ້ 2,110 ແມັດກ້ອນຕໍ່ວັນ, ເມືອງປາກງື່ມມີ 4 ໂຮງງານ ກຳລັງການຜະລິດໄດ້ 2,600 ແມັດກ້ອນຕໍ່ວັນ ຈຳນວນປະຊາກອນທີ່ໄດ້ຮັບການບໍລິການນໍ້າປະປາມີ 819,863 ຄົນຢູ່ 7 ຕົວເມືອງໃນ ຊຶ່ງມີຈໍານວນໝໍ້ແທກນໍ້າທັງໝົດ 202,274 ໜ່ວຍ, ບໍລິມາດນໍ້າຈໍາໜ່າຍປີຜ່ານມາ 89,244.747 ແມັດກ້ອນຕໍ່ປີ ເທົ່າກັບ 244,506 ແມັດກ້ອນຕໍ່ວັນ.
ການນໍາໃຊ້ນໍ້າໃນປັດຈຸບັນໂດຍສະເພາະແມ່ນໄລຍະລະດູແລ້ງແມ່ນສູງກວ່າລະດູຝົນ ໂດຍສະເພາະປະເພດເຂດບໍລິການເຊັ່ນ: ບັນດາໂຮງແຮມ, ເຂດສູນການຄ້າ Pakson,ເຂດວຽງຈັນເຊັນເຕີ, ເຂດດອນຈັນ, ເຂດແຄມຂອງ ແລະ ບັນດາໂຮງແຮມພັດຕະຄານຕ່າງໆ. ຕໍ່ບັນຫາດັ່ງກ່າວລັດວິສາຫະກິດນໍ້າປະປາ ນວ ຈຶ່ງໄດ້ກຳນົດວຽກງານທີ່ຈະຕ້ອງໄດ້ຈັດຕັ້ງປະຕິບັດໃນໄລຍະລະດູແລ້ງປີນີ້ ແລະ ວຽກງານທີ່ຈະໄດ້ປະຕິບັດໃຫ້ສໍາເລັດໂດຍໄວເຊັ່ນ:ສູ້ຊົນຮັກສາກໍາລັງການຜະລິດ (ໃຫ້ຜະລິດສູງສຸດເຕັມອັດຕາ) ບໍ່ໃຫ້ຫຼຸດ 348,000 ແມັດກ້ອນຕໍ່ວັນໃນແຕ່ລະໂຮງງານຕ້ອງຜະລິດນໍ້າໃຫ້ໄດ້ຕາມກໍາລັງການຜະລິດຂອງແຕ່ລະໂຮງງານ, ປັບແຮງດັນນໍ້າເພື່ອໃຫ້ນໍ້າໄຫຼເຂົ້າໃນຕົວເມືອງແຕ່ຕ້ອງຮັບປະກັນໃຫ້ເຂດທີ່ຫຼຸດແຮງດັນມີນໍ້າໃຊ້ພຽງພໍ, ປັບແຮງດັນ ແລະ ບໍລິມາດນໍ້າໃຫ້ກະຈາຍມີລັກສະນະນໍ້າໃຊ້ທົ່ວເຖິງ ແລະ ດຸ່ນດ່ຽງກັນໃນແຕ່ລະພື້ນທີ່ ຕິດຕາມກວດກາລະບົບສາຍທໍ່ນໍ້າປະປາແຕ່ໂຮງງານຜະລິດນໍ້າປະປາ ຫາຄົວເຮືອນປະຊາຊົນ ຍົກສູງຄວາມອາດສາມາດໜ່ວຍງານສ້ອມແປງເພື່ອສ້ອມແປງນໍ້າແຕກ-ນໍ້າຮົ່ວໃຫ້ສ້ອມແປງໄວໃຫ້ສໍາເລັດພາຍໃນ 24 ຊົ່ວໂມງຫຼັງຈາກໄດ້ຮັບແຈ້ງຂໍ້ມູນຄົ້ນຄວ້າ ແລະ ກຳນົດເຂດຈຸດສຸມເພື່ອຈະແກ້ໄຂນໍ້າອອກຄ່ອຍ, ນໍ້າບໍ່ອອກ, ຄົ້ນຄວ້າ ແລະ ກຳນົດການບໍລິການນໍ້າປະປາທາງລົດຈາກພາກສ່ວນເອກະຊົນໃຫ້ລັດວິສາຫະກິດໄຟຟ້າ ນວ ຮັບປະກັນການສະໜອງກະແສໄຟຟ້າໃຫ້ມີແຮງດັນປົກກະຕິ ຖ້າກະແສໄຟຟ້າບໍ່ມາເປັນປົກກະຕິຈະບໍ່ສາມາດຜະລິດນໍ້າໄດ້.
ໂອກາດນີ້, ທ່ານລັດຖະມົນຕີກະຊວງ ຍທຂ ແລະ ທ່ານເຈົ້າຄອງ ນວ ໄດ້ຊີ້ນຳໃຫ້ລັດວິສາຫະກິດນໍ້າປະປາ ນວ ຈົ່ງສືບຕໍ່ຊອກຫາວິທີແກ້ໄຂສະເພາະໜ້າ ແລະ ຍາວນານໃຫ້ມີປະສິດທິພາບເພື່ອເຮັດແນວໃດໃຫ້ປະຊາຊົນມີນໍ້າໃຊ້ຢ່າງພຽງພໍ ໂດຍສະເພາະໃນໄລຍະລະດູຮ້ອນນີ້ ພ້ອມນັ້ນກໍໄດ້ແນະນຳໃຫ້ທວງຄືນບັນດາສັນຍາກ່ຽວກັບການກໍ່ສ້າງ ແລະ ພັດທະນາລະບົບນໍ້າປະປາທີ່ເຊັນໄປແລ້ວນັ້ນໃຫ້ຮີບຮ້ອນຈັດຕັ້ງປະຕິບັດໃຫ້ສຳເລັດຕາມຄາດໝາຍທີ່ວາງໄວ້.
ຂ່າວ:ນາງ ອົ້ນ
ຄໍາເຫັນ