ອີງໃສ່ຂໍ້ມູນທີ່ໄດ້ຈາກການສໍາຫຼວດບໍລິສັດຜູ້ຜະລິດອາຫານພາຍໃນປະເທດ 195 ແຫ່ງ, ໂດຍບໍລິສັດຄົ້ນຄວ້າ Teikoku Databank ພົບວ່າ: ຜູ້ຜະລິດກໍາລັງກະກຽມທີ່ຈະເພີ່ມລາຄາສິນຄ້າ 1,422 ລາຍການໃນເດືອນກັນຍານີ້ ຊຶ່ງ ເພີ່ມຂຶ້ນ 0.6% ຈາກປີກ່ອນ.
ສິນຄ້າໃນກຸ່ມເຄື່ອງປຸງ ເຊັ່ນ: ຊອດ ແລະ ມາຍອງເນສ ກວມເອົາອັດຕາສ່ວນຫຼາຍທີ່ສຸດ 427 ລາຍການ. ໂດຍຂໍ້ມູນຍັງຊີ້ໃຫ້ເຫັນວ່າ ບໍລິສັດ Kewpie ຈະຂຶ້ນລາຄາສິນຄ້າ 66 ລາຍການ ຊຶ່ງລວມທັງມາຍອງເນສ ແລະ ນໍ້າສະຫຼັດ.ຕິດຕາມມາດ້ວຍຜະລິດຕະພັນອາຫານປຸງແຕ່ງເຊັ່ນ: ອາຫານແຊ່ແຂງ ຈຳນວນ 338 ລາຍການ, ຂອງຫວານ ແລະ ອາຫານວ່າງເຊັ່ນ: ຊັອກໂກແລັດ ມີ 291 ລາຍການ. ອຸດສາຫະກໍານໍ້ານົມ Morinaga ຈະຂຶ້ນລາຄາຜະລິດຕະພັນທີ່ນິຍົມເຊັ່ນ: ກະແລັມເຄືອບຊັອກໂກແລັດ ແລະ ສິນຄ້າອື່ນໆອີກ 17 ລາຍການ.
Tekoku Databank ລະບຸວ່າ: ກ່ອນໜ້ານີ້ມີການຄາດຄະເນວ່າການຂຶ້ນລາຄາສິນຄ້າຈະເກີດຂຶ້ນຊົ່ວຄາວ, ໂດຍມີສາເຫດຕົ້ນຕໍແມ່ນຍ້ອນລາຄານໍ້າມັນດິບທີ່ສູງຂຶ້ນ ແລະ ຄ່າເງິນເຢນທີ່ອ່ອນຄ່າ, ແຕ່ປັດຈຸບັນການເພີ່ມຂຶ້ນເຫຼົ່ານີ້ໄດ້ກາຍເປັນເລື່ອງປົກກະຕິໄປແລ້ວ, ອີກທັງສາເຫດຂອງການຂຶ້ນລາຄາຍັງມາຈາກປັດໄຈພາຍໃນປະເທດ.
"ເຫດຜົນຂອງການເພີ່ມຂຶ້ນຂອງລາຄາໄດ້ປ່ຽນຈາກເງິນເຢນທີ່ອ່ອນຄ່າລົງໄປສູ່ປັດໃຈພາຍໃນປະເທດ," ຂໍ້ມູນລະບຸວ່າ: ຈໍານວນບໍລິສັດທີ່ອ້າງເຖິງຄ່າໃຊ້ຈ່າຍໃນການຂົນສົ່ງ ແລະ ຄ່າແຮງງານທີ່ສູງຂຶ້ນມີຈຳນວນເພີ່ມຂຶ້ນຢ່າງຫຼວງຫຼາຍທ່າມກາງການຂາດແຄນພະນັກງານຂັບລົດບັນທຸກ.
ບົດລາຍງານຍັງໄດ້ຍົກໃຫ້ເຫັນວ່າ, ຈຳນວນສິນຄ້າທີ່ມີລາຄາເພີ່ມຂຶ້ນໃນປີນີ້ມີເຖິງ 20.034 ລາຍການ ຊຶ່ງເປັນຄັ້ງທຳອິດໃນຮອບ 2 ປີທີ່ຈຳນວນສິນຄ້າທີ່ມີລາຄາເພີ່ມຂຶ້ນໄດ້ລື່ນກາຍ 20.000 ລາຍການ ແລະ ອາດເພີ່ມຂຶ້ນທຽບເທົ່າກັບປີ 2022 ທີ່ມີຈຳນວນ 25.768 ລາຍການ.
ຄໍາເຫັນ