ຍີ່ປຸ່ນ ເປີດຈອງຄິວຂຶ້ນພູເຂົາໄຟຟູຈິ ແບບອອນລາຍ

ຂ່າວຕ່າງປະເທດລາຍງານໃນວັນທີ 14 ພຶດສະພາຜ່ານມາ, ຍີ່ປຸ່ນກຽມເປີດໃຫ້ນັກທ່ອງທ່ຽວຈອງການປີນພູເຂົາໄຟຟູຈິຜ່ານທາງລະບົບອອນລາຍ ຊຶ່ງຈະເລີ່ມປະຕິບັດໃນວັນທີ 20 ພຶດສະພານີ້ ເພື່ອຈັດການກັບບັນຫານັກທ່ອງທ່ຽວຫຼາຍເກີນຈຳນວນ.
ຂ່າວລະບຸວ່າ: ນັບຕັ້ງແຕ່ວັນທີ 20 ພຶດສະພານີ້ ນັກທ່ອງທ່ຽວທີ່ວາງແຜນຈະຂຶ້ນພູເຂົາໄຟຟູຈິ ຕ້ອງຈອງການປີນເຂົາລ່ວງໜ້າ ຜ່ານທາງລະບົບອອນລາຍເທົ່ານັ້ນ, ຫຼັງພົບວ່າມີຈຳນວນນັກທ່ອງທ່ຽວທີ່ຂຶ້ນພູເຂົາໄຟຟູຈິເພີ່ມຂຶ້ນຫຼາຍໃນໄລຍະລະດູການປີນເຂົາໃນລະດູຮ້ອນ ຈົນເກີດຄວາມກັງວົນໃນເລື່ອງຄວາມປອດໄພ ແລະ ຜົນກະທົບຕໍ່ສິ່ງແວດລ້ອມ.
ໂດຍເສັ້ນທາງໂຍຊິດະ ຈະຈຳກັດຈຳນວນນັກປີນເຂົາໃຫ້ຂຶ້ນພູເຂົາໄຟຟູຈິໄດ້ພຽງມື້ລະ 4.000 ຄົນ, ໂດຍຈະມີການເກັບຄ່າທຳນຽມຄົນລະ 13 ໂດລາຕໍ່ຄົນ ແລະ ເພື່ອບໍ່ໃຫ້ນັກເດີນທາງຕ້ອງເດີນທາງມາເສຍເວລາ ຈຶ່ງມີການເປີດລະບົບຈອງລ່ວງໜ້າທາງອອນລາຍມາໃຊ້.
ການເປີດຈອງທາງອອນລາຍຈະເລີ່ມເປີດໃຫ້ບໍລິການໃນວັນທີ 20 ພຶດສະພານີ້, ສຳລັບຜູ້ໃດທີ່ມີແຜນຈະຂຶ້ນປີນພູເຂົາໄຟຟູຈິ ໃນໄລຍະລະດູປີນເຂົາເດືອນກໍລະກົດ ເຖິງເດືອນກັນຍາ ໂດຍຈະມີສະຖານທີ່ຢ່າງນ້ອຍ 1.000 ແຫ່ງ ທີ່ຍັງສາມາດເຂົ້າເບິ່ງໂດຍບໍ່ເສຍເງິນ.
ພູເຂົາໄຟຟູຈິ ຖືກປົກຄຸມໄປດ້ວຍຫິມະເກືອບຕະຫຼອດປີ, ຂະນະທີ່ໃນລະດູຮ້ອນມີນັກທ່ອງທ່ຽວຫຼາຍກວ່າ 220.000 ຄົນ ຍ່າງຂຶ້ນໄປເທິງເນີນຫີນທີ່ສູງຊັນ ໂດຍນັກທ່ອງທ່ຽວບາງພາກສ່ວນປີນເຂົາຂ້າມຄືນເພື່ອໄປເບິ່ງຕາເວັນຂຶ້ນ, ຂະນະທີ່ນັກທ່ອງທ່ຽວບາງຄົນພະຍາຍາມຈະໄປເຖິງຍອດເຂົາທີ່ສູງ 3.776 ແມັດ ໂດຍບໍ່ຢຸດພັກ ເຮັດໃຫ້ພວກເຂົາບໍ່ສະບາຍ ແລະ ໄດ້ຮັບບາດເຈັບ.
ນອກຈາກນີ້, ຍັງມີນັກທ່ອງທ່ຽວອີກຈຳນວນຫຼາຍພາກັນໄປຕາມສະຖານທີ່ຕ່າງໆທີ່ເຫັນພູເຂົາໄຟຟູຈິເປັນສາກຫຼັງ ເພື່ອຖ່າຍພາບເກັບໄວ້ເປັນທີ່ລະນຶກ ແລະ ເປັນສັນຍາລັກຂອງການມາຢາມປະເທດຍີ່ປຸ່ນ.