ຍົກລະດັບດ້ານໄອທີ ໃຫ້ພະນັກງານຄະນະໂຄສະນາອົບຮົມທົ່ວແຂວງສາລະວັນ

ອົບຮົມຍົກລະດັບຄວາມຮູ້ດ້ານຄອມພີວເຕີ, ການບໍາລຸງຮັກສາຄອມພີວເຕີ, ລະບົບເຄື່ອຂ່າຍເອເລັກໂຕຣນິກ ໃຫ້ພະນັກງານຄະນະໂຄສະນາອົບຮົມແຂວງ, ໂຄສະນາອົບຮົມເມືອງ 8 ຕົວເມືອງ ແລະ ພະແນການອ້ອມຂ້າງແຂວງສາລະວັນໄດ້ສຳເລັດລົງໃນວັນທີ 17 ມັງກອນ ນີ້, ພາຍຫຼັງທີ່ໄດ້ດຳເນີນມາແຕ່ວັນທີ 15 ມັງກອນທີ່ແຂວງສາລະວັນໂດຍມີທ່ານນາງ ວິລະວອນ ພັນທະວົງຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ), ທ່ານ ຈັນສະໜອນ ພົມມະແສງ ຫົວໜ້າຄະນະໂຄສະນາອົບຮົມແຂວງສາລະວັນ,  ທ່ານ ວັນຕຸລາ ຮັກນຸດ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ຄອສພ, ມີຄູຝຶກຈາກຄະນະໂຄສະນາອົບຮົມສູນກາງພັກ, ສຳມະນາກອນຄະນະໂຄສະນາອົບຮົມແຂວງ, ເມືອງ ແລະ ພະແນກການອ້ອມຂ້າງແຂວງເຂົ້າຮ່ວມ.
 ການຝຶກອົບຮົມຄັ້ງນີ້ ນັກສຳມະນາກອນແມ່ນໄດ້ຮຽນຮູ້ດ້ານທິດສະດີ ແລະພາກປະຕິບັດຕົວຈິງກ່ຽວກັບຄວາມຮູ້ພື້ນຖານຂອງລະບົບຄອມພິວເຕີ, ການຕິດຕັ້ງລະບົບວິນໂດ (Windows7-11), ການນໍາໃຊ້ແອັບໂຟໂຕຊັອບ ( Adobe Photoshop cs3), ການນໍາໃຊ້ໂປຣແກຣມ ຜ່ານລະບົບອອນລາຍ ແລະ ການຕັດຕໍ່ວິດີ. ຜ່ານການຝຶກອົບຮົມເຫັນວ່ານັກສຳມະນາກອນແມ່ນມີຄວາມຮັບຮູ້ເຂົ້າໃຈ ກວມ 95%. ທັງນີ້ກໍເພື່ອເປັນການຍົກລະດັບຄວາມຮູ້ຄວາມສາມາດຂອງພະນັກງານໃຫ້ມີຄວາມຊຳນານທາງດ້ານໄອທີ, ມີຄວາມສະດວກວ່ອງໄວ, ສາມາດເກັບຂໍ້ມູນຕ່າງແລະ ສາມາດແກ້ໄຂ ສ້ອມແປງດ້ວຍຕົນເອງໄດ້. 
ຂ່າວ-ພາບ: ທິດລານີ ໂຄດໂຍທາ