ໃນຕອນເຊົ້າຂອງວັນທີ24ພະຈິກນີ້ ທີ່ສະໂມສອນຫ້ອງວ່າການແຂວງຈຳປາສັກໄດ້ມີກອງປະຊຸມການຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ(ສສຊ)ແລະສະມາຊິກສະພາປະຊາຊົນຂັ້ນແຂວງ(ສສຂ)3ແຂວງຄື: ຈຳປາສັກ, ເຊກອງແລະອັດຕະປືກ່ຽວກັບການຕິດຕາມກວດກາຂົງເຂດວຽກງານຍຸຕິທຳ, ການຕິດຕາມກວດກາການປະເມີນການຈັດຕັ້ງປະຕິບັດກົດໝາຍແລະການຕິດຕາມກວດກາວຽກງານຂອງອົງການກວດສອບໂດຍການເປັນປະທານຂອງທ່ານສຸບັນສະວະບຸດປະທານກຳມາທິການວຽກງານສະມາຊິກສະພາແຫ່ງຊາດ; ເຂົ້າຮ່ວມມີທ່ານສາຍອູພູມສາລີຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ,ມີຫົວໜ້າສູນຝຶກອົບຮົມແລະຂໍ້ມູນຂ່າວສານສະຖາບັນຄົ້ນຄວ້ານິຕິກຳສະພາແຫ່ງຊາດ, ສສຂ3ແຂວງດັ່ງກ່າວ,ນັກວິທະຍາກອນຮັບເຊີນຈາກ ສພຊ, ຄະນະພະແນກແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ໄດ້ຮັບການສະໜັບສະໜູນດ້ານງົບປະມານຊ່ວຍເຫຼືອຈາກອົງການຈັດຕັ້ງສາກົນແລະງົບປະມານສົມທົບຈາກຄະນະເລຂາທິການສະພາແຫ່ງຊາດ;ທັງນີ້, ກໍເພື່ອຍົກລະດັບຂີດຄວາມສາມາດໃຫ້ແກ່ສສຂແນໃສ່ເຮັດໃຫ້ສາມາດປະຕິບັດພາລະບົດບາດ, ສິດແລະໜ້າທີ່ຂອງຕົນໃຫ້ມີປະສິດທິຜົນທັງເພື່ອເຮັດໃຫ້ສສຂ ມີຄວາມຮັບຮູ້, ຄວາມເຂົ້າໃຈກ່ຽວກັບບາງທັກສະທີ່ມີຄວາມຈຳເປັນໃນການປະຕິບັດວຽກງານຕົວຈິງໃຫ້ມີຜົນສຳເລັດດີຂຶ້ນ, ເພື່ອແລກປ່ຽນ, ສົນທະນາກ່ຽວກັບບາງບົດຮຽນລະຫວ່າງວິທະຍາກອນ, ສສຂແລະພະນັກງານທີ່ເປັນເສນາທິການດ້ວຍກັນແນໃສ່ການຍົກລະດັບຄວາມຮັບຮູ້ແລະຄວາມສາມາດໃນການປະຕິບັດໜ້າທີ່ການເມືອງໃຫ້ມີປະສິດທິຜົນດີ; ກອງປະຊຸມໄດ້ຮັບຟັງການສະເໜີຫົວຂໍ້ການຕິດຕາມກວດກາການປະເມີນການຈັດຕັ້ງປະຕິບັດກົດໝາຍສະເໜີໂດຍທ່ານນາງອາພິສອນພົງສາຮອງຫົວໜ້າກົມຕິດຕາມກວດກາ, ໂຄສະນາແລະຕີຄວາມໝາຍກົດໝາຍສະພາແຫ່ງຊາດ; ການຕິດຕາມກວດກາຂົງເຂດວຽກງານຍຸຕິທຳສະເໜີໂດຍທ່ານໄກມະນິນເທບບົວລີຫົວໜ້າກົມຄຳຮ້ອງຂໍຄວາມເປັນທຳສະພາແຫ່ງຊາດ; ບົດຮຽນຕິດຕາມກວດກາວຽກງານໃນຂົງເຂດຂອງກຳມາທິການແຜນການ, ການເງິນແລະການກວດສອບສະເໜີໂດຍທ່ານລີເບີລີບົວປາວປະທານກຳມາທິການແຜນການ, ການເງິນແລະການກວດສອບຈາກນັ້ນ, ຜູ້ເຂົ້າຮ່ວມໄດ້ສຸມໃສ່ຄົ້ນຄວ້າ, ປະກອບຄຳຄິດຄຳເຫັນແລະສົນທະນາແລກປ່ຽນບົດຮຽນກັບນັກວິທະຍາກອນຢ່າງກົງໄປກົງມາ; ໃນພິທີ, ທ່ານສຸບັນສະວະບຸດປະທານກຳມາທິການວຽກງານ ສພຊ ໄດ້ກ່າວເປີດກອງປະຊຸມວ່າ: ຄະນະປະຈຳ ສພຊ ກໍຄືຄະນະຊີ້ນໍາລວມການຍົກສູງຂີດຄວາມສາມາດໃຫ້ແກ່ ສສຊ, ສສຂ ແລະພະນັກງານເສນາທິການເວລາໃດກໍເຫັນໄດ້ຄວາມສໍາຄັນແລະໄດ້ເອົາໃຈໃສ່ຊີ້ນຳ-ນຳພາຕໍ່ກັບວຽກງານຍົກສູງຄວາມສາມາດໃຫ້ແກ່ ສສຊ, ສສຂແລະພະນັກງານເສນາທິການເພື່ອຮັບໃຊ້ການປະຕິບັດພາລະບົດບາດ, ສິດແລະໜ້າທີ່ຂອງສະພາແຫ່ງຊາດແລະສະພາປະຊາຊົນຂັ້ນແຂວງຢ່າງຕໍ່ເນື່ອງ; ຊຶ່ງຕາມແຜນການຈະຈັດຂຶ້ນທັງໝົດ6ຈຸດໃນຂອບເຂດທົ່ວປະເທດແລະຄັ້ງນີ້ເປັນຈຸດທີ3ພາຍຫຼັງສໍາເລັດການຈັດຝຶກອົບຮົມຈຸດທີ1ຢູ່ແຂວງຊຽງຂວາງແລະຈຸດທີ2ຢູ່ເມືອງວັງວຽງແຂວງວຽງຈັນໃນເດືອນຕຸລາທີ່ຜ່ານມາ. ຈຸດປະສົງຂອງກອງປະຊຸມຄັ້ງນີ້ກໍເພື່ອຍົກສູງຂີດຄວາມສາມາດໃຫ້ແກ່ ສສຊແລະສສຂໃຫ້ມີຄວາມຮັບຮູ້, ເຂົ້າໃຈແລະມີຄວາມຊຳນິຊຳນານໃນດ້ານທັກສະການຕິດຕາມກວດກາເຮັດໃຫ້ການປະຕິບັດວຽກງານດັ່ງກ່າວມີປະສິດທິພາບປະສິດທິຜົນດີຍິ່ງໆຂຶ້ນ.
ໃນກອງປະຊຸມຝຶກອົບຮົມຄັ້ງນີ້ບັນດາທ່ານ ສສຂທີ່ມາຈາກຫຼາຍຂົງເຂດວຽກງານມີໂອກາດຄົ້ນຄວ້າ, ລົງເລິກ, ກໍາແໜ້ນແລະແລກປ່ຽນບົດຮຽນບັນຫາທີ່ຈຳເປັນໃນການປະຕິບັດພາລະບົດບາດ, ສິດແລະໜ້າທີ່ຂອງຕົນກໍຄືຂອງສະພາແຫ່ງຊາດໃຫ້ມີປະສິດທິພາບແລະປະສິດທິຜົນທັງເປັນການສ້າງເງື່ອນໄຂໃຫ້ສະມາຊິກສະພາໄດ້ພົບປະແລກປ່ຽນບົດຮຽນເຊິ່ງກັນແລະກັນເພີ່ມຕື່ມແລະສາມາດນຳໄປຈັດຕັ້ງປະຕິບັດໃຫ້ເກີດປະໂຫຍດສູງສຸດໃນໜ້າທີ່ການເມືອງຂອງຕົນ; ກອງປະຊຸມຄັ້ງນີ້ແມ່ນດຳເນີນຮອດວັນທີ25ພະຈິກ2023ຈຶ່ງຈະສຳເລັດ.
(ຂ່າວ-ພາບ: ນາງກຸກກິກບຸດດາໄຊ)
ຄໍາເຫັນ