ໂດຍ: ສຳນານ
ປີນີ້, ອົງການກາແດງແຫ່ງຊາດລາວຈະຍົກສູງວຽກງານການໂຄສະນາ - ຂ່າວສານ ດ້ວຍການເຜີຍແຜ່ໂຄສະນາພາລະບົດບາດຂອງອົງການກາແດງແຫ່ງຊາດ ໃຫ້ນັບມື້ນັບກວ້າງຂວາງ, ໂຄສະນາປະຫວັດ, ພາລະບົດບາດຂອງຂະບວນການກາແດງ, ກົດໝາຍມະນຸດສະທຳສາກົນ, ກົດໝາຍກາແດງ, ດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງອົງການກາແດງແຫ່ງຊາດ, ບົດບາດຍິງ-ຊາຍ ໃຫ້ແກ່ພະນັກງານ, ອາສາສະໝັກຂັ້ນສູນກາງ ແລະ ທ້ອງຖິ່ນ ຈຳນວນ 16 ຄັ້ງ, ເປົ້າໝາຍຜູ້ເຂົ້າຮ່ວມ 1.800 ຄົນ, ສະເຫຼີມສະຫຼອງວັນສ້າງຕັ້ງອົງການກາແດງແຫ່ງຊາດລາວ ແລະ ວັນສ້າງຕັ້ງກາແດງສາກົນ, ລາຍງານຂໍ້ມູນຂ່າວສານຜ່ານສື່ຕ່າງໆ 200 ຄັ້ງ, ຈັດລາຍການວິທະຍຸປະຈໍາວັນ, ທຸກອາທິດ ເວລາ 9-10 ໂມງ ໃນຄືນ 103.7 MHz, ຂຽນບົດ, ຂຽນຂ່າວ ແລະ ສຳພາດຂ່າວກ່ຽວກັບການເຄື່ອນໄຫວອົງການກາແດງແຫ່ງຊາດລາວອອກສູ່ສັງຄົມ 500 ບົດ, ບັບປຸງສື່ໂຄສະນາຂ່າວສານກາແດງ ໃຫ້ມີລັກສະນະດີຈີຕອນ, ທັນສະໄໝ ແລະ ເຂົ້າເຖິງສັງຄົມຢ່າງວອງໄວ້ໄລຍະ 2 ຄັ້ງ, ຈັດກອງປະຊຸມ ແລະ ຝຶກອົບຮົມວຽກງານໂຄສະນາຂ່າວສານ ໃຫ້ໄດ້ຢ່າງລະ 1 ຄັ້ງ.
ໃນຂະນະດຽວກັນການຂົນຂວາຍແຫຼ່ງທຶນ: ສ້າງກົດລະບຽບວ່າດ້ວຍວຽກງານຂົນຂວາຍແຫຼ່ງທຶນຂອງອົງການກາແດງແຫ່ງຊາດ, ປຸກລະດົມຂົນຂວາຍການສະໜັບສະໜູນວັດຖຸ-ປັດໄຈຈາກສັງຄົມ, ບຸກຄົນ, ນິຕິບຸກຄົນ ທັງພາຍໃນ ແລະ ຕ່າງປະເທດ ດ້ວຍຫຼາຍຮູບແບບ, ໂຄສະນາຕາມສື່ຕ່າງໆ ຄາດຄະເນ 30 ພາກສ່ວນ ແລະ ສືບຕໍ່ເປີດຕູ້ບໍລິຈາກທີ່ມີຢູ່ແລ້ວຈຳນວນ 20 ຕູ້, 14 ຄັ້ງ, ປຸກລະດົມຂົນຂວາຍ ການສະໜັບສະໜູນ ຊ່ວຍເຫຼືອຈາກການຈັດຕັ້ງທັງພາຍໃນ ແລະ ຕ່າງປະເທດ, ສັງຄົມ, ຫ້າງຮ້ານຕ່າງໆ, ສ້າງແຫຼ່ງລາຍຮັບ ຈາກການບໍລິການສັງຄົມທີ່ຖືກຕ້ອງຕາມກົດໝາຍ, ຈັດງານຕະຫຼາດນັດກາແດງລາວ ແລະ ແຂ່ງຂັນກິລາການກຸສົນ ເພື່ອມີແຫຼ່ງທຶນຮັບປະກັນການຕອບໂຕ້ສຸກເສີນຮີບດ່ວນຕໍ່ຜູ້ທີ່ປະສົບເຄາະຮ້າຍ, ຈໍາໜ່າຍນໍ້າດື່ມອົງການກາແດງລາວ ໃຫ້ບັນດາແຂວງທີ່ມີເງື່ອນໄຂ, ພົວພັນປະສານງານກັບບໍລິສັດຕ່າງໆລົງທຶນຮ່ວມກັນໃນພັດທະນາແຫຼ່ງທຶນກາແດງ 3 ບໍລິສັດ, ນໍາໃຊ້ຖານຂໍ້ມູນການຮັບບໍລິຈາກຂອງອົງການກາແດງແຫ່ງຊາດລາວ, ສ້າງການບໍລິຈາກແບບອອນລາຍໃຫ້ໄດ້ພາຍໃນ 4 ແຂວງ, ຈັດຕັ້ງປະຕິບັດໂຄງການສ້າງຄວາມເຂັ້ມແຂງວຽກຊອກຫາແຫຼ່ງທຶນຂອງອົງການກາແດງແຫ່ງຊາດຮ່ວມກັບກາແດງສະວິດ, ຊຸກຍູ້, ຕິດຕາມ ແລະ ແລກປ່ຽນຖອດຖອນບົດຮຽນກ່ຽວກັບວຽກງານຂົນຂວາຍແຫຼ່ງທຶນຕາມແຂວງທີ່ມີຄວາມເຂັ້ມແຂງໃຫ້ໄດ້ 2 ຄັ້ງ, ຈັດກອງປະຊຸມໂຄສະນາເຜີຍແຜ່ວຽກງານກາແດງລາວໃຫ້ແກ່ນັກທຸລະກິດລາວ, ເພື່ອປຸກລະດົມຂົນຂວາຍແຫຼ່ງທຶນ ໃຫ້ໄດ້ 1 ຄັ້ງ.
ໃນນັ້ນວຽກງານຄຸ້ມຄອງອາສາສະໝັກກາແດງ: ປະສານງານກັບສະຫະພັນກາແດງ ແລະ ຊີກວົງເດືອນແດງສາກົນກ່ຽວກັບວຽກງານ ຊາວໜຸ່ມ-ອາສາສະໝັກກາແດງ ໃນການອອກແບບ ແລະ ຮ່າງບົດສະເໜີໂຄງການໃນກອງທຶນສ້າງຄວາມເຂັ້ມແຂງ (CBF Fu nd), ປະສານງານກັບບັນດາຫ້ອງການ, ສະຖາບັນເລືອດແຫ່ງຊາດ ກ່ຽວກັບວຽກງານອາສາສະໝັກ ເພື່ອກຳນົດແຜນສ້າງອາສາສະໝັກກາແດງລາວ, ສືບຕໍ່ກິດຈະກຳແລກປ່ຽນອາສາສະໝັກລະຫວ່າງອົງການກາແດງແຫ່ງຊາດລາວ ແລະ ກາແດງ ສ ເກົາຫຼີ, ຂໍ້ມູນດັ່ງກ່າວຈາກການລາຍງານຂອງ ທ່ານ ຮອງຈັນ ຈັນທະວົງ ຮອງຫົວໜ້າຫ້ອງການ ອົງການກາແດງແຫ່ງຊາດລາວຕໍ່ກອງປະຊຸມ ສະຫຼຸບການຈັດຕັ້ງປະຕິບັດວຽກງານກາແດງ ປະຈຳປີ 2023 ແລະ ທິດທາງແຜນການ ປີ 2024 ທີ່ຜ່ານມາ.
ຄໍາເຫັນ