 |
“ຈີນມີຕະຫຼາດການບໍລິໂພກທີ່ໃຫຍ່ໂຕມະໂຫລານ ແລະ ເຕັມໄປດ້ວຍພະລັງຊີວິດ” “ແຕ່ລະມື້ຕ່າງກໍມີການປະດິດສ້າງໃໝ່, ຂະແໜງການໃໝ່ ແລະ ເຕັກໂນໂລຊີໃໝ່ໄດ້ຮັບການພັດທະນາຢ່າງວ່ອງໄວ” “ສະພາບແວດລ້ອມໃນການດຳເນີນທຸລະກິດໄດ້ຮັບການປັບປຸງຢ່າງບໍ່ຢຸດຢັ້ງ” ແຂກທີ່ເຂົ້າຮ່ວມກອງປະຊຸມຕ່າງໆພາກັນກ່າວວ່າ: ພາຍໃຕ້ສະຖານະການສາກົນທີ່ເຕັມໄປດ້ວຍສິ່ງທ້າທາຍຕ່າງໆ, ຈີນຈະສ້າງພະລັງຂັບເຄື່ອນໃໝ່ໃຫ້ແກ່ເສດຖະກິດໂລກ ແລະ ການພັດທະນາຂອງວິສາຫະກິດຂ້າມຊາດ.
ໃນຕະຫຼາດຈີນ, ແຕ່ລະປີມີການບໍລິໂພກເກືອບ 50.000 ຕື້ຢວນ, ການລົງທຶນຫຼາຍກວ່າ 50.000 ຕື້ຢວນ ແລະ ການນຳເຂົ້າຫຼາຍກວ່າ 20.000 ຕື້ຢວນ ຊຶ່ງຍັງສືບຕໍ່ຂະຫຍາຍຕົວຢູ່. ກຸ່ມລາຍຮັບປານກາງເພີ່ມຂຶ້ນ, ອັດຕາສ່ວນຜູ້ອາຍຸສູງເພີ່ມຂຶ້ນ ແລະ ສະຕິໃນການຮັກສາສຸຂະພາບຂອງຜູ້ບໍລິໂພກໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ, ທັງໝົດນີ້ໄດ້ສະແດງໃຫ້ເຫັນເຖິງພະລັງຊີວິດອັນໃຫຍ່ຫຼວງຂອງຕະຫຼາດການບໍລິໂພກຂອງຈີນ.
ພະລັງຂັບເຄື່ອນດ້ານການຜະລິດຂອງຈີນແມ່ນມາຈາກການປະດິດສ້າງໃໝ່ຢ່າງບໍ່ຢຸດຢັ້ງ. ໜ່ວຍວັດແທກເພື່ອຄິດໄລ່ຈຳນວນພະນັກງານທີ່ເຮັດວຽກເຕັມເວລາ ຫຼື FTE (Full-Time Equivalent) ຂອງຜູ້ຄົ້ນຄວ້າ ແລະ ພັດທະນາຂອງຈີນໄດ້ຈັດຢູ່ໃນອັນດັບທຳອິດຂອງໂລກເປັນເວລາຫຼາຍປີຕິດຕໍ່ກັນ, ສ້າງເປັນລະບົບວິຊາທີ່ຄົບຖ້ວນທີ່ສຸດ ແລະ ຂະໜາດໃຫຍ່ທີ່ສຸດໃນໂລກ. ປັດໄຈສຳຄັນດັ່ງກ່າວໄດ້ດຶງດູດຊັບພະຍາກອນດ້ານການປະດິດສ້າງໃໝ່ ແລະ ເຕົ້າໂຮມກຳລັງການປະດິດສ້າງໃໝ່ໃນໂລກ.
ເມື່ອບໍ່ດົນມານີ້, Goldman Sachs, J.P. Morgan ແລະ ອົງການສາກົນອື່ນໆໄດ້ພາກັນປັບຂຶ້ນການຄາດຄະເນການເຕີບໂຕເສດຖະກິດຈີນ ປີ 2025. ໃນ 5 ເດືອນປີນີ້, ວິສາຫະກິດທີ່ລົງທຶນໂດຍຕ່າງປະເທດທີ່ສ້າງຕັ້ງໃໝ່ຢູ່ຈີນມີ 24.018 ແຫ່ງ, ເພີ່ມຂຶ້ນ 10.4% ເມື່ອທຽບໃສ່ໄລຍະດຽວກັນຂອງປີກາຍ. ວິສາຫະກິດຂ້າມຊາດໄດ້ພິສູດໃຫ້ເຫັນດ້ວຍການກະທຳຕົວຈິງວ່າ: ບໍ່ວ່າໄລຍະຜ່ານມາກໍຄືປັດຈຸບັນ, ພວກເຂົາເຈົ້າຕ່າງກໍຫວັງຢາກເດີນທາງຄຽງຂ້າງກັບຈີນ.
ໂດຍ: ຊີອາໄອ
ຄໍາເຫັນ