ຍ້ອນຖືເອົາກະສິກໍາອິນຊີເປັນຫຼັກລາຍຮັບປະຊາຊົນບ້ານທ່າຊ້າງຈຶ່ງໝັ້ນຄົງ

ສະຫາຍ ວິໄລພອນ ເພັດນະຄອນສີ ຮອງປະທານສະຫະກອນທ່າຊ້າງ ນະຄອນຫຼວງວຽງຈັນ ໄດ້ປະກອບຄໍາເຫັນຕໍ່ກອງປະຊຸມໃຫ່ຍຜູ້ແທນອົງຄະນະພັກນະຄອນຫຼວງວຽງ ຄັ້ງທີ VIII ທີ່ຫໍປະຊຸມແຫ່ງຊາດໃນຫົວຂໍ້: “ຕົວແບບສະຫະກອນຜະລິດກະສິກຳອິນຊີບ້ານທ່າຊ້າງ” ວ່າ: ສະຫະກອນຜະລິດກະສິກຳອິນຊີບ້ານທ່າຊ້າງ ສ້າງຕັ້ງຂຶ້ນໃນປີ 2021 ຕາມທະບຽນເລກທີ 0023 ລົງວັນທີ 18 ມີນາ 2023 ເປັນສະຫະກອນໜຶ່ງຂອງເມືອງປາກງື່ມ ຊຶ່ງເມື່ອກ່ອນແມ່ນເປັນກຸ່ມຜະລິດກະສິກຳອິນຊີ, ເລີ່ມຕົ້ນຈັດຕັ້ງປະຕິບັດປີ 2011, ມີເນື້ອທີ່ 1.2 ເຮັກຕາ, ຜະລິດພືດຜັກໄດ້ 54 ໂຕນ/ປີ. ປັດຈຸບັນ, ໄດ້ຈັດຕັ້ງເປັນສະຫະກອນ, ມີຫ້ອງການຕັ້ງຢູ່ບ້ານທ່າຊ້າງ ເມືອງປາກງື່ມ, ມີສະມາຊິກທັງໝົດ 108 ຄອບຄົວ, ເນື້ອທີ່ທັງໝົດ 139,34 ຮຕ, ຜົນຜະລິດທັງໝົດ 4,170ໂຕນ/ປີ, ສະຫະກອນມີຄະນະບໍລິຫານງານຈໍານວນ6 ຄົນ, ຄະນະກວດກາ 3 ຄົນ, ກວດກາມາດຕະຖານ ICS ຈໍານວນ 5 ຄົນ, ສະຫະກອນຜະລິດກະສິກຳອິນຊີບ້ານທ່າຊ້າງ ແມ່ນໄດ້ຮັບການຊຸກຍູ້ຈາກພະແນກກະສິກຳ ແລະ ປ່າໄມ້ ແລະ ຫ້ອງການກະສິກຳ ແລະ ປ່າໄມ້ເມືອງປາກງື່ມ ແລະ ພາກສ່ວນກ່ຽວຂ້ອງ.

ຕະຫຼອດໄລຍະ 5 ປີຜ່ານມາ, ສະຫະກອນຜະລິດກະສິກຳອິນຊີບ້ານທ່າຊ້າງ ມີບາດກ້າວຂະຫຍາຍຕົວ ແລະ ມີຄວາມເຂັ້ມແຂງຫຼາຍຂຶ້ນເມື່ອທຽບໃສ່ເມື່ອກ່ອນ, ບົດບາດ ແລະ ໜ້າທີ່ຫຼັກຂອງສະຫະກອນແມ່ນສຸມໃສ່ການຄຸ້ມຄອງບໍລິຫານສະຫະກອນ, ຄຸ້ມຄອງການຜະລິດຕາມມາດຕະຖານກະສິກຳອິນຊີຂອງສະມາຊິກ, ການຊອກຫາແຫຼ່ງທຶນເພື່ອພັດທະນາໂຄງລ່າງພື້ນຖານ, ການບໍລິຫານທຸລະກິດ, ການຜະລິດ, ການຊື້-ຂາຍ ແລະ ສ້າງກອງທຶນຂອງສະຫະກອນເພື່ອໃຫ້ສະມາຊິກມີສ່ວນຮ່ວມໃນການພັດທະນາການຜະລິດກະສິກຳອິນຊີໃຫ້ມີການເຕີບໃຫຍ່ຂະຫຍາຍຕົວ.

ສະຫະກອນໄດ້ຮັບການສະໜັບສະໜູນຈາກພາກລັດ, ອົງການຈັດຕັ້ງສາກົນ ແລະ ອື່ນໆ. ມາຮອດປັດຈຸບັນ, ມີຫ້ອງການ 1 ຫຼັງ, ຮ້ານຂາຍເຄື່ອງຂອງສະຫະກອນ 1 ຫຼັງ, ໂຮງເຮືອນຜະລິດຝຸ່ນ 1 ຫຼັງ, ມີເຮືອນຮົ່ມປູກພືດຜັກ 440 ຫຼັງໃນນັ້ນເຮືອນຮົ່ມທີ່ສ້າງດ້ວຍໂຄງເຫຼັກ ແລະ ເສົາຊີມັງຈໍານວນ 300 ຫຼັງ, ສາງເຢັນເກັບມ້ຽນພືດຜັກ 1 ຫຼັງ, ຜະລິດຈຸລິນຊີຮັບໃຊ້ການຜະລິດດ້ວຍຕົນເອງ, ໄດ້ຮັບການຝຶກອົບຮົມສ້າງຄວາມເຂັ້ມແຂງໃຫ້ສະຫະກອນຈາກຂັ້ນເທິງ ແລະ ພາກສ່ວນກ່ຽວຂ້ອງໃນການຄຸ້ມຄອງບໍລິຫານ. ໄລຍະທີ່ຜ່ານມາ, ໄດ້ຮັບການຢັ້ງຢືນມາດຕະຖານກະສິກຳອິນຊີທຸກໆປີ, ໄດ້ຮັບໃບຢັ້ງຢືນເປັນຜະລິດຕະພັນໂອດ໊ອບ, ດ້ານລະບົບການສະໜອງນໍ້າໄດ້ຮັບການຊ່ວຍເຫຼືອປັບປຸງດີຂຶ້ນ, ມີສ່ວນຮ່ວມໃນການເຂົ້າຮ່ວມໃນງານວາງສະແດງໃນວັນສໍາຄັນຕ່າງໆຂອງຊາດ, ໄດ້ຮັບການອໍານວຍຄວາມສະດວກ ແລະ ການເຂົ້າຫາແຫຼ່ງທຶນສະຫະກອນ, ການຫັນເປັນສະຫະກອນແມ່ນມີຄວາມສະດວກຂຶ້ນຖ້າທຽບໃສ່ການເປັນກຸ່ມການຜະລິດ; ມີການຮ່ວມມືຈາກຫຼາຍພາກສ່ວນທັງພາກລັດ ແລະ ເອກະຊົນເຂົ້າຊ່ວຍຊຸກຍູ້ສະໜັບສະໜູນເພື່ອຊ່ວຍໃນການພັດທະນາສະຫະກອນໃຫ້ມີຄວາມເຂັ້ມແຂງ. ນອກຈາກນີ້, ຍັງໄດ້ມີໂອກາດໃນການເຂົ້າຮ່ວມເປັນສະມາຊິກຫຼາຍໆເຄືອຂ່າຍຜະລິດກະສິກຳ ແລະ ໄດ້ຮັບການຮ່ວມມືຈາກຫຼາຍພາກສ່ວນຫຼາຍຂຶ້ນ.

ສິ່ງທີ່ພົ້ນເດັ່ນແມ່ນການຜະລິດແລະການຈໍາໜ່າຍ, ສາມາດຜະລິດພືດຜັກ ແລະ ໝາກໄມ້ອິນຊີເພື່ອເຂົ້າໄປຂາຍໃນຕະຫຼາດອິນຊີຂອງນະຄອນຫຼວງວຽງຈັນ 271 ໂຕນ/ປີ, ມູນຄ່າ 5.9 ຕື້ກີບ/ປີ, ສະເລ່ຍໃສ່ຄອບຄົວທີ່ເຮັດການຜະລິດໄດ້ຮັບ 73 ລ້ານກວ່າກີບ/ຄອບຄົວ/ປີ. ນອກຈາກນີ້, ທາງສະຫະກອນຍັງໄດ້ເຮັດສັນຍາຜູກພັນສອງສົ້ນໃນການສະໜອງພືດຜັກໃຫ້ຜູ້ປະກອບການເປັນຕົ້ນບໍລິສັດຊີພີ, ເມືອງລາວຟຸດໃນການເກັບຊື້ຜົນຜະລິດອາທິດລະ 1 ໂຕນ, ເຫັນວ່າການຜະລິດພືດຜັກ ແລະ ໝາກໄມ້ຕາມມາດຕະຖານກະສິກຳອິນຊີໄດ້ຍົກຊີວິດການເປັນຢູ່ຂອງຊາວສວນດີຂຶ້ນຫຼາຍຖ້າທຽບໃສ່ໃນເມື່ອກ່ອນ, ອັນໄດ້ເຮັດໃຫ້ການຜະລິດກະສິກຳອິນຊີກາຍເປັນແຫຼ່ງລາຍຮັບຫຼັກຂອງຊາວບ້ານທ່າຊ້າງ;ສະແດງໃຫ້ເຫັນຄືແຕ່ລະຄອບຄົວມີລົດບັນທຸກຂະໜາດນ້ອຍເພື່ອແກ່ເອົາຜົນຜະລິດມາຂາຍຢູ່ຕະຫຼາດອິນຊີແລະຕະຫຼາດແຫ່ງອື່ນໆໃນນະຄອນຫຼວງວຽງຈັນ. ນອກນັ້ນ,ຍັງໄດ້ມີການປັບປຸງສິ່ງອໍານວຍຄວາມສະດວກ, ພື້ນຖານການຜະລິດ, ທີ່ຢູ່ອາໄສໄດ້ຮັບການພັດທະນາຂຶ້ນເປັນກ້າວໆ.

ຄຽງຄູ່ກັນນັ້ນ, ຍັງມີສິ່ງທ້າທາຍໃນການຈັດຕັ້ງປະຕິບັດໃນຮູບແບບສະຫະກອນເຫັນວ່າເປັນສິ່ງໃໝ່ສໍາລັບຊາວກະສິກອນເຮັດໃຫ້ບົດຮຽນການນໍາພາ ແລະ ການສ້າງຄວາມເຂົ້າໃຈກັບສະມາຊິກຈໍານວນໜຶ່ງຍັງບໍ່ທັນເຂັ້ມແຂງ, ການພັດທະນາຮູບແບບສະຫະກອນແບບໃໝ່ຈະຕ້ອງໄດ້ຖອດຖອນບົດຮຽນຈາກປະເທດໃກ້ຄຽງທີ່ມີບົດຮຽນໃນດ້ານນີ້ມາແລ້ວ.

ຜົນສໍາເລັດທີ່ກ່າວມາຂ້າງເທິງ, ແມ່ນບົດຮຽນ ແລະ ປະສົບການທີ່ສະຫະກອນຜະລິດກະສິກຳອິນຊີໄດ້ພັດທະນາຕັ້ງແຕ່ເລີ່ມຕົ້ນຈົນຮອດປັດຈຸບັນເຮັດໃຫ້ມີຄວາມຍືນຍົງແລະສາມາດແກ້ໄຂຊີວິດການເປັນຢູ່ຂອງສະມາຊິກໄດ້.ໃນນາມຕາງໜ້າໃຫ້ສະຫະກອນຜະລິດກະສິກຳອິນຊີບ້ານທ່າຊ້າງ, ສະຫາຍ ວິໄລພອນ ເພັດນະຄອນສີ ກໍໄດ້ສະແດງຄວາມຮູ້ບຸນຄຸນຕໍ່ການຊີ້ນໍາ-ນໍາພາຂອງພັກ, ອົງການປົກຄອງ, ອົງການຈັດຕັ້ງສາກົນແລະທຸກພາກສ່ວນທີ່ກ່ຽວຂ້ອງຊຶ່ງຍາມໃດກໍເປັນຫ່ວງເປັນໄຍ ແລະ ຊຸກຍູ້ສະຫະກອນຜະລິດກະສິກຳອິນຊີຕະຫຼອດມາ.