ໃນໂອກາດເຂົ້າຮ່ວມກອງປະຊຸມວຽກງານສື່ມວນຊົນທົ່ວປະເທດຄັ້ງທີ I. ທ່ານ ສິງໄຊ ວັນຄໍາ ຫົວໜ້າຄະນະໂຄສະນາອົບຮົມແຂວງຫຼວງນໍ້າທາ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນ ໃນວັນທີ 14 ກໍລະກົດນີ້, ທີ່ຫໍປະຊຸມແຫ່ງຊາດວ່າ: ກອງປະຊຸມຄັ້ງນີ້, ເປັນເວທີທີ່ມີຄວາມໝາຍ ຄວາມສໍາຄັນຕໍ່ການພັດທະນາວຽກງານສື່ມວນຊົນຂອງປະເທດ ຊຶ່ງກອງປະຊຸມດັ່ງກ່າວ, ໄດ້ຕີລາຄາຜົນສໍາເລັດຂອງການຈັດຕັ້ງວຽກງານສື່ມວນຊົນຕະ ຫຼອດໄລຍະກວ່າ 70 ປີຜ່ານມາ ພ້ອມທັງຊີ້ໃຫ້ເຫັນບັນຫາ ແລະ ຂໍ້ຈໍາກັດທີ່ຈໍາເປັນຕ້ອງໄດ້ຮ່ວມກັນປັບປຸງແກ້ໄຂເພື່ອໃຫ້ວຽກງານສື່ມວນຊົນ ສາມາດປະຕິບັດພາລະບົດບາດເປັນກະບອກສຽງຂອງພັກໃນການເຜີຍແຜ່ ແລະ ຜັນຂະຫຍາຍແນວທາງນະໂຍບາຍຂອງພັກໄປສູ່ປະຊາຊົນໄດ້ຢ່າງທົ່ວເຖິງ. ພ້ອມກັນນັ້ນ, ສື່ມວນຊົນຍັງມີບົດ ບາດສໍາຄັນໃນການນໍາເອົາຄວາມຄິດເຫັນ ຄວາມຕ້ອງການ ແລະ ຄວາມປາຖະໜາຂອງປະຊາຊົນສະທ້ອນກັບໄປຍັງພັກ ແລະ ລັດ ເພື່ອໃຫ້ນໍາໄປພິຈາລະນາປັບປຸງນະໂຍບາຍ ແລະ ມາດຕະການຕ່າງໆ ໃຫ້ສອດຄ່ອງກັບສະພາບຕົວຈິງ ອັນເປັນການປະກອບສ່ວນໃຫ້ການພັດທະນາເສດຖະກິດ-ສັງຄົມຂອງປະເທດບັນລຸເປົ້າໝາຍ.
ທ່ານ ສິງໄຊ ວັນຄໍາ ກ່າວຕື່ມວ່າ: ໃນຍຸກດີຈີຕອນ ຫຼື ຍຸກ 4.0 ວຽກງານສື່ມວນຊົນກໍາລັງປະເຊີນກັບສິ່ງທ້າທາຍຫຼາຍດ້ານ ຈຶ່ງຈໍາເປັນຕ້ອງປັບປຸງທັງເນື້ອໃນ, ຮູບແບບ ແລະ ວິທີການນໍາສະເໜີຂ່າວສານໃຫ້ທັນສະໄໝ ແລະ ສອດຄ່ອງກັບພຶດຕິກໍາການຮັບຂ່າວສານຂອງສັງຄົມໃນປັດຈຸບັນ. ສະນັ້ນ, ການພັດທະນາທັກສະ ແລະ ຍົກລະດັບຄວາມຮູ້-ຄວາມສາມາດດ້ານວິຊາຊີບຂອງນັກຂ່າວ ແລະ ຜູ້ປະຕິບັດວຽກງານສື່ມວນຊົນເປັນປັດໄຈສໍາຄັນທີ່ຈະຊ່ວຍໃຫ້ສື່ມວນຊົນ ສາມາດປັບຕົວທັນກັບການປ່ຽນແປງຂອງຍຸກສະໄໝ ແລະ ສືບຕໍ່ປະຕິບັດພາລະບົດບາດເປັນກະບອກສຽງຂອງພັກ ແລະ ຮັບໃຊ້ປະຊາຊົນໄດ້ຢ່າງມີຄຸນນະພາບ.
ຄໍາເຫັນ