ທ່ານ ໄທຍະພອນ ສິງທອງ ປະທານສະພາການຄ້າ ແລະ ອຸດສາຫະກໍາ (ອຄ) ແຂວງຄໍາມ່ວນໄດ້ໃຫ້ສໍາພາດຕໍ່ຜູ້ສື່ຂ່າວແຂວງວ່າ: ເພື່ອເປັນການຫ້າງຫາກະກຽມໃຫ້ແກ່ການວາງສະແດງ ແລະ ຈໍາ ໜ່າຍສິນຄ້າຕິດພັນກັບງານບຸນອອກພັນສາປະວໍຣະນາ ແລະ ຊ່ວງເຮືອປະຈໍາປີ 2023 ຢູ່ເທດສະບານເມືອງທ່າແຂກ ຊຶ່ງໄດ້ຈັດຂຶ້ນໃນລະຫວ່າງວັນທີ 27-29 ຕຸລານີ້.
ທາງສະພາການຄ້າ ແລະ ອຸດສາຫະກໍາແຂວງກໍໄດ້ຮ່ວມກັບພະແນກອຸດສາຫະກໍາ ແລະ ການຄ້າແຂວງ ໂດຍໄດ້ຮັບການມອບໝາຍຈາກຄະນະຮັບຜິດຊອບການຈັດງານໃຫ້ມີການຫ້າງຫາກະກຽມການຈັດວາງສະແດງ ແລະ ຈໍາໜ່າຍສິນຄ້າໂດຍສະເພາະກໍແມ່ນສິນຄ້າທີ່ຜະລິດຂຶ້ນພາຍໃນແຂວງ ແລະ ສິນຄ້າທີ່ຜະລິດຢູ່ ສປປ ລາວ ພ້ອມກັນນັ້ນກໍໄດ້ມີສິນຄ້າທີ່ມາຈາກຕ່າງປະເທດຈໍານວນໜຶ່ງ ຊຶ່ງໄດ້ນໍາມາຈໍາໜ່າຍຂາຍພາຍໃນຂອບເຂດງານບຸນໃນປີນີ້ຊຶ່ງຜ່ານການຫ້າງຫາກະກຽມພວກເຮົາກໍໄດ້ມີການແຈ້ງການເຖິງບັນດາເມືອງ ແລະ ເຈົ້າຂອງຜູ້ຜະລິດ ຊຶ່ງເປັນຜະລິດຕະພັນພາຍໃນຂອງພວກເຮົາໃຫ້ມາຮ່ວມວາງສະແດງ ແລະ ຈໍາໜ່າຍສິນຄ້າທັງນີ້ກໍເພື່ອເປັນກະຕຸກຊຸກຍູ້ໃຫ້ຫົວໜ່ວຍທຸລະກິດຂະໜາດນ້ອຍ,ຂະໜາດກາງຢູ່ພາຍໃນແຂວງໄດ້ມີໂອກາດນໍາເອົາສິນຄ້າຂອງຕົນເອງມາວາງສະແດງ ແລະ ຈໍາໜ່າຍ. ພ້ອມກັນນັ້ນກໍເພື່ອເປັນການຊອກຫາຄູ່ຮ່ວມທາງທຸລະກິດເພື່ອເປັນການແລກປ່ຽນ ແລະ ຊື້-ຂາຍຜະລິດຕະພັນນໍາກັນ , ອີກດ້ານໜຶ່ງສໍາລັບໜຶ່ງເມືອງໜຶ່ງຜະລິດຕະພັນ ຫຼື (ODOP)ມາຮອດປັດຈຸບັນແມ່ນໄດ້ຖືກຍອມຮັບຈາກຜູ້ຊົມໃຊ້ນັບມື້ນັບຫຼາຍຂຶ້ນໂດຍສະເພາະສິນຄ້າທີ່ນໍາມາວາງສະແດງ ແລະ ຈໍາໜ່າຍໃນປັດຈຸບັນ ຊຶ່ງປະກອບມີແຜ່ນແພ, ເຄື່ອງຈັກສານ, ຫັດຖະກໍາປັ່ນໝໍ້ຫຼໍ່ໄຫ ຊຶ່ງປະເພດສິນຄ້າດັ່ງກ່າວພາຍໃນແຂວງຂອງພວກເຮົາແມ່ນໄດ້ມີລູກຄ້າໄດ້ມາຈັບຈອງແລ້ວນໍາໄປຈໍາໜ່າຍຢູ່ສະຖານທີ່ຕ່າງໆ ແລະ ເປັນທີ່ນິຍົມຂອງລູກຄ້າຢ່າງແຜ່ຫຼາຍພ້ອມທັງເປັນຜະລິດຕະພັນທີ່ທາງພາກລັດໄດ້ໃຫ້ການຊຸກຍູ້ສົ່ງເສີມ .
ສໍາລັບສິນຄ້າ (ODOP) ແມ່ນໄດ້ສະເໜີໃຫ້ 10 ເມືອງທົ່ວແຂວງໄດ້ນໍາມາວາງສະແດງ ແລະ ຈໍາໜ່າຍຢູ່ທີ່ບໍລິເວນຫໍໄຫວ້ມູນເຊື້ອ 21 ມີນາແຕ່ຍັງ 3 ເມືອງທີ່ບໍ່ໄດ້ເຂົ້າມາວາງສະແດງເນື່ອງຈາກວ່າຄານໍາເອົາຜະລິດຕະພັນຂອງເມືອງໄປຮ່ວມງານວາງສະແດງ ແລະ ຈໍາໜ່າຍຢູ່ນະຄອນຫຼວງວຽງຈັນເປັນຕົ້ນແມ່ນເມືອງນາກາຍ, ເມືອງຄູນຄໍາ ແລະ ເມືອງຫີນບູນ. ພິເສດທາງສະຫະພັນແມ່ຍິງແຂວງກໍໄດ້ຮ້ານຄ້າວາງສະແດງ ແລະ ຈໍາໜ່າຍທີ່ເປັນຜະລິດພັນພາຍໃນແຂວງ ຊຶ່ງໄດ້ນໍາເອົາຜະລິດຕະພັນມາຮ່ວມໃນງານຄັ້ງນີ້ດ້ວຍ. ນອກຈາກນັ້ນ ຍັງມີຫົວໜ່ວຍຜູ້ຜະລິດອີກຈໍານວນໜຶ່ງໂດຍສະເພາະແມ່ນແຈ່ວ, ປະເພດຢາສະໝຸນໄພ ແລະ ສິນຄ້າປະເພດອື່ນໆເຊັ່ນ: ຊາ ແລະ ກາເຟ. ສໍາລັບໃນພາກສ່ວນທົ່ວໄປຂອງງານແມ່ນມີຮ້ານຈໍາໜ່າຍສິນຄ້າປະເພດຕ່າງໆລວມທັງການຂາຍບັ້ງເຂົ້າຫຼາມ, ປີ້ງໄກ່ຈໍານວນ 300 ກວ່າລ໋ອກ ຊຶ່ງເຫັນວ່າຫຼາຍກວ່າປີຜ່ານມາ. ໃນປີນີ້ຄະນະຮັບຜິດຊອບຈັດງານບຸນກໍໄດ້ເນັ້ນຄວາມເປັນລະບຽບຮຽບຮ້ອຍ, ເນັ້ນດ້ານຄວາມສວຍງາມເພື່ອເຮັດໃຫ້ຜູ້ຄົນທີ່ມາທ່ຽວໃນງານມີຄວາມປະທັບໃຈ ຊຶ່ງໃນໄລຍະວັນທີ 25- 26 ຕຸລາ ຜ່ານມາທາງເມືອງ ແຂວງຄໍາມ່ວນ ກໍໄດ້ເປີດຂະບວນການເຮັດອະນາໄມລວມ ຊຶ່ງບໍ່ໄດ້ເນັ້ນສະເພາະໃນງານບຸນເທົ່ານັ້ນແຕ່ເປັນການອະນາໄມໃນທົ່ວເທດສະບານເມືອງ, ທັງນີ້ກໍເພື່ອເປັນການປູກຈິດສໍານຶກໃຫ້ພໍ່ແມ່ປະຊາຊົນໄດ້ຫັນມາໃຫ້ຄວາມສໍາຄັນ ແລະ ເອົາໃຈໃສ່ດ້ານການຮັກສາຄວາມສະອາດ, ຄວາມເປັນລະບຽບຮຽບຮ້ອຍລວມເຖິງບັນຫາສິ່ງແວດລ້ອມອ້ອມຂ້າງຂອງພວກເຮົາ ເພື່ອເປັນການຮອງຮັບທີ່ປະເທດລາວເຮົາຈະເປີດປີທ່ອງທ່ຽວໃນປີ 2024 ຊຶ່ງແຂວງຄໍາມ່ວນຈະໄດ້ເນັ້ນໃນດ້ານການເປັນເຈົ້າພາບທີ່ດີ, ສ້າງຕົວເມືອງໃຫ້ມີຄວາມສະອາດສວຍງາມ, ໃຫ້ເມືອງເປັນທີ່ໜ້າທ່ຽວໜ້າຊົມ ແລະ ເປັນເມືອງທີ່ໜ້າຢ້ຽມຢາມ;
ພ້ອມກັນນີ້, ທ່ານ ໄທຍະພອນ ສິງທອງ ກໍໄດ້ຂໍເຊີນຊວນທຸກຫົວໜ່ວຍທຸລະກິດທຸກພາກສ່ວນນັບແຕ່ຫົວໜ່ວຍທຸລະກິດຂັ້ນຄອບຄົວຈົ່ງພ້ອມກັນຜະລິດສິນຄ້າພາຍໃນໃຫ້ມີຄວາມຫຼາກຫຼາຍທັງນີ້ກໍເພື່ອໃຫ້ສອດຄ່ອງກັບແນວທາງຂອງພັກ ແລະ ລັດຖະບານວາງອອກວ່າດ້ວຍການປະຕິບັດສອງວາລະແຫ່ງຊາດໂດຍສະເພາະແມ່ນວາລະແຫ່ງຊາດວ່າດ້ວຍການຜ່ານຜ່າຄວາມຫຍຸ້ງຍາກກ່ຽວກັບບັນຫາເສດຖະກິດ-ການເງິນ ຊຶ່ງມາຮອດປັດຈຸບັນນີ້ພວກເຮົາກໍໄດ້ມີການສູ້ຊົນເພື່ອຜະລິດສິນຄ້າຢູ່ພາຍໃນໃຫ້ມີຄວາມຫຼາກຫຼາຍເພື່ອໃຫ້ເທົ່າທຽມກັບຜະລິດຕະພັນຂອງປະເທດເພື່ອນບ້ານ ແລະ ການຊົມໃຊ້ຜະລິດຕະພັນພາຍໃນຂອງພວກເຮົາກໍໃຫ້ນັບມື້ນັບຫຼາຍຂຶ້ນ.
(ຂ່າວ: ແດງສະຫວັດ ແສນພານິດ)
ຄໍາເຫັນ