 |
ກອງປະຊຸມໄດ້ຮັບຟັງການເຜີຍແຜ່ເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ທີ່ສະແດງໃຫ້ເຫັນເຖິງໝາກຜົນຂອງການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ກໍານົດແນວທາງ, ນະໂຍບາຍ ແລະ ແຜນປະຕິບັດງານ ຂອງພັກ ແລະ ປະເທດຊາດ ໃນ 5 ປີຕໍ່ໜ້າ, ຍຸດທະສາດພັດທະນາ 10 ປີ, ກໍານົດວິໄສທັດ ຮອດປີ 2055 ພ້ອມທັງເປັນການຢັ້ງຢືນເຖິງຄວາມສາມັກຄີເປັນເອກະພາບສູງຢູ່ພາຍໃນພັກ, ເສີມຂະຫຍາຍມານະຈິດປະຕິວັດຂອງທົ່ວພັກ, ສືບຕໍ່ຍູ້ແຮງພາລະກິດປ່ຽນແປງໃໝ່ ເຂົ້າສູ່ລວງເລິກ ແລະ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ. ເພື່ອສືບຕໍ່ຍູ້ແຮງການຜັນຂະຫຍາຍແນວທາງການປ່ຽນແປງໃໝ່ຂອງພັກ ສູ່ລວງເລິກຕໍ່ໆໄປ, ສ້າງບັນດາປັດໄຈການບູລະນະລະບອບປະຊາທິປະໄຕປະຊາຊົນ ກ້າວຂຶ້ນສູ່ສັງຄົມນິຍົມ ເພື່ອເຮັດໃຫ້ຄະນະພັກແຕ່ລະຂັ້ນ ລວມເຖິງສະມາຊິກພັກ-ພະນັກງານ ໃຫ້ຮັບຮູ້ ແລະ ເຂົ້າໃຈ, ເຊື່ອມຊຶມກໍາແໜ້ນຢ່າງເລິກເຊິ່ງ ແລະ ໝູນໃຊ້ແນວທາງດັ່ງກ່າວເຂົ້າສູ່ວຽກງານຕົວຈິງໃນຂະແໜງການຕົນ. ພ້ອມດຽວກັນນັ້ນ ສະຫາຍ ຕ້ອຍ ພົນທິລາດ ຄະນະປະຈໍາພັກ ຮອງເລຂາຄະນະພັກອົງການກວດສອບແຫ່ງລັດ ກໍໄດ້ໃຫ້ກຽດເຜີຍແຜ່ເຊື່ອມຊຶມວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 71 ປີ ທີ່ສະແດງໃຫ້ເຫັນເຖິງປະຫວັດການກໍາເນີດ ແລະ ມູນເຊືື້ອອັນດີງາມຂອງພັກ ທີ່ໄດ້ນໍາພາ-ຊີ້ນໍາປະເທດຊາດຂອງພວກເຮົາຜ່ານຜ່າອຸປະສັກຕ່າງໆ ຈົນສາມາດນໍາພາປະເທດຊາດຫຼຸດພົ້ນຈາກການປົກຄອງຂອງພວກລ່າເມືອງຂຶ້ນ ແລະ ໄດ້ເອົາໃຈໃສ່ນໍາພາ-ຊີ້ນໍາປົກປັກຮັກສາ ແລະ ສ້າງສາ ພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງສີວິໄລ ເປັນກ້າວໆມາ.
 |
ໃນຕອນທ້າຍ ກອງປະຊຸມກໍຍັງໄດ້ຮັບຟັງການໂອ້ລົມຂອງສະຫາຍ ປະທານກອງປະຊຸມ ຊຶ່ງສະຫາຍໄດ້ຊີ້ນໍາໃຫ້ບັນດາສະຫາຍຄະນະບໍລິຫານງານພັກ, ຄະນະໜ່ວຍພັກ, ຄະນະນໍາກົມ, ຄະນະພະແນກ ພ້ອມດ້ວຍສະມາຊິກພັກ ເອົາໃຈໃສ່ຢ່າງຕັ້ງໜ້າໃນຫຼາຍບັນຫາ ເປັນຕົ້ນ:
1. ໃຫ້ບັນດາສະຫາຍຄະນະພັກ, ຄະນະໜ່ວຍພັກ, ຄະນະນໍາແຕ່ລະຂັ້ນ ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ ໃຫ້ຖືບັນຫານີ້ເປັນບັນຫາກົກ ແລະ ເປັນຄວາມຮັບຜິດຊອບ ຂອງຄະນະພັກແຕ່ລະຂັ້ນ. ສະມາຊິກພັກ, ພະນັກງານ ຕ້ອງໄດ້ຍົກລະດັບຄວາມຮູ້ທາງດ້ານທິດສະດີການເມືອງ ດ້ວຍການເອົາໃຈໃສ່ຄົ້ນຄວ້າ, ເຊື່ອມຊຶມແນວທາງນະໂຍບາຍຂອງພັກ ໃຫ້ເລິກເຊິ່ງ ແລະ ໜັກແໜ້ນ. ຄະນະໜ່ວຍພັກຕ້ອງເອົາໃຈໃສ່ຍົກລະດັບທິດສະດີການເມືອງ ໃຫ້ສະມາຊິກພັກ-ພະນັກງານ ດ້ວຍຫຼາຍຮູບການ ແລະ ຫຼາຍວິທີການຕື່ມອີກເປັນຕົ້ນ: ຄັດເລືອກສະມາຊິກພັກ, ພະນັກງານ ໄປຍົກລະດັບທິດສະດີການເມືອງແນໃສ່ສ້າງພະນັກງານສືບທອດປ່ຽນແທນ, ຈັດຕັ້ງເຊື່ອມຊຶມມະຕິ, ຄຳສັ່ງຕ່າງໆ ໃຫ້ສະມາຊິກພັກ, ພະນັກງານ ເພື່ອໃຫ້ກໍາແໜ້ນຕໍ່ແນວທາງຂອງພັກ-ນະໂຍບາຍຂອງລັດ ໃນແຕ່ລະໄລຍະ.
2. ເພີ່ມທະວີການນຳພາຂອງຄະນະພັກເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງໃນວຽກງານພະນັກງານຜົນສໍາເລັດຂອງວຽກງານດັ່ງກ່າວຈະເປັນສິ່ງຕັດສິນຜົນສຳເລັດຂອງວຽກງານແຕ່ລະດ້ານ ຂອງການນໍາພາ-ຊີ້ນໍາຂອງພວກເຮົາ, ສະນັ້ນ ໃຫ້ຖືເອົາການຍົກລະດັບດ້ານທິດສະດີການເມືອງ ໃຫ້ມີຄວາມໜັກແໜ້ນ, ບໍາລຸງສ້າງດ້ານວຽກງານວິຊາສະເພາະກວດສອບ ໃຫ້ເຂັ້ມແຂງ ແລະ ເປັນມືອາຊີບເທື່ອລະກ້າວ.
3. ບັນດາໜ່ວຍພັກ ຕ້ອງໄດ້ເພີ່ມທະວີໃນການຊຸກຍູ້, ຕິດຕາມ, ກວດກາ ການຈັດຕັ້ງປະຕິບັດໜ້າທີ່ການເມືອງຂອງສະມາຊິກພັກ ໃຫ້ເຂັ້ມແຂງໜັກແໜ້ນ ຂຶ້ນກວ່າເກົ່າ ເພື່ອສ້າງການຫັນປ່ຽນຢ່າງເລິກເຊິ່ງຂອງສະມາຊິກພັກ-ພະນັກງານ, ຍົກສູງຄວາມຮັບຜິດຊອບໃນການແກ້ໄຂບັນຫາປະກົດການຫຍໍ້ທໍ້ຂອງສະມາຊິກພັກ-ພະນັກງານ ທີ່ເກີດຂຶ້ນຢູ່ໃນຄວາມຮັບຜິດຊອບຂອງຕົນໃຫ້ທັນກໍານົດເວລາ, ບັນຫາເກີດຢູ່ບ່ອນໃດ ຫຼື ໜ່ວຍພັກໃດ ແມ່ນໜ່ວຍພັກນັ້ນ ຕ້ອງເປັນເຈົ້າການໃນການແກ້ໄຂ ຖ້າແກ້ໄຂບໍ່ໄດ້ ຕ້ອງໄດ້ລາຍງານຄະນະພັກຂັ້ນເທິງ ເພື່ອພິຈາລະນາແກ້ໄຂໃຫ້ທັນການ.
ຂ່າວ-ພາບ: ອກລ
ຄໍາເຫັນ