 |
ໃນກອງປະຊຸມ, ທ່ານ ແສງເພັດ ສີຫາວົງ ຫົວໜ້າກົມປະເມີນຄຸນນະພາບການກວດສອບ ໄດ້ລາຍງານບົດສະຫຼຸບການເຄື່ອນໄຫວວຽກງານປະຈໍາປີ 2025, ທິດທາງແຜນການປີ 2026 ຂອງອົງການກວດສອບແຫ່ງລັດ, ຜົນສຳເລັດທີ່ພົ້ນເດັ່ນໃນປີ 2025 ແມ່ນສາມາດດຳເນີນການກວດສອບໄດ້ທັງໝົດ154 ເປົ້າໝາຍເທົ່າກັບ 100% ຂອງແຜນການ. ຜ່ານການກວດສອບ ແລະ ຊຸກຍູ້ການແກ້ໄຂ, ສາມາດເກັບກູ້ລາຍຮັບມອບຄືນງົບປະມານແຫ່ງລັດໄດ້ທັງໝົດ 5,303.17 ຕື້ກີບ ແລະ 310,000 ໂດລາ. ນອກຈາກນີ້, ຍັງໄດ້ຍົກໃຫ້ເຫັນຜົນສຳເລັດຂອງ 6 ແຜນວຽກຈຸດສຸມ ໂດຍສະເພາະການບັນຈຸວຽກງານກວດສອບເຂົ້າໃນລັດຖະທຳມະນູນ ສະບັບປີ 2025 ເພື່ອເພີ່ມສິດໃຫ້ອົງການກວດສອບແຫ່ງລັດດຳເນີນການກວດສອບຢ່າງເປັນເອກະລາດ.
 |
ກອງປະຊຸມຍັງໄດ້ປຶກສາຫາລືຢ່າງເຈາະຈົງກ່ຽວກັບການກວດສອບໃນຂົງເຂດທີ່ມີຄວາມສ່ຽງ ເປັນຕົ້ນແມ່ນການກວດສອບຂຸດຄົ້ນແຮ່ຄຳແບບທົດລອງທີ່ພົບເຫັນການຂຸດຄົ້ນເກີນເນື້ອທີ່, ການຄຸ້ມຄອງເຂດເສດຖະກິດພິເສດ, ລວມເຖິງການເລັ່ງທວງມອບລາຍຮັບເຂົ້າງົບປະມານຈາກບັນດາໂຄງການລົງທຶນ ແລະ ວິສາຫະກິດລັດ. ໃນກອງປະຊຸມ ທ່ານ ວຽງທະວີສອນ ເທບພະຈັນ ໄດ້ກ່າວສະຫຼຸບຜົນຂອງກອງປະຊຸມ. ໂດຍທ່ານໄດ້ສະແດງຄວາມຍ້ອງຍໍ ແລະ ຕີລາຄາສູງຕໍ່ກັບການປະກອບຄຳເຫັນຢ່າງຟົດຟື້ນ ແລະ ກົງໄປກົງມາ ຂອງບັນດາກົມວິຊາສະເພາະ ແລະ ອົງການກວດສອບປະຈຳພາກ ແລະ ຍັງເນັ້ນໜັກໃຫ້ທົ່ວອົງການກວດສອບແຫ່ງລັດ “ເລັ່ງໃສ່ລະດົມມັນສະໝອງ ແລະ ຄວາມຄິດຄວາມເຫັນ” ເພື່ອປັບປຸງແບບແຜນວິທີເຮັດວຽກ ໃຫ້ມີບາດກ້າວໃໝ່ ທີ່ໜັກແໜ້ນ, ຊັດເຈນ ແລະ ເກີດດອກອອກຜົນດີຂຶ້ນກວ່າເກົ່າ ເພື່ອສ້າງຄວາມເຂົ້າໃຈທີ່ເປັນເອກະພາບໃນການຈັດຕັ້ງປະຕິບັດ. ພ້ອມນັ້ນ, ທ່ານຍັງໄດ້ຊີ້ນຳໃຫ້ແຕ່ລະພາກສ່ວນຮີບຮ້ອນກວດກາຄືນບັນຫາທີ່ຍັງຄ້າງຄາ ໂດຍສະເພາະການເກັບກູ້ລາຍຮັບຢູ່ນອກລະບົບງົບປະມານ ໃຫ້ມີຜົນສຳເລັດຕົວຈິງ. ຕອນທ້າຍ ທ່ານ ວຽງທະວີສອນ ເທບພະຈັນ ໄດ້ເນັ້ນໜັກໃຫ້ຜູ້ເຂົ້າຮ່ວມຈົ່ງຍົກສູງຄວາມຮັບຜິດຊອບ, ລະດົມສະຕິປັນຍາ ເພື່ອສ້າງບາດກ້າວຫັນປ່ຽນໃໝ່ ໃຫ້ວຽກງານກວດສອບມີຄວາມໜັກແໜ້ນ ແລະ ຊັດເຈນກວ່າເກົ່າ.
ຂ່າວ: ອກສລ, ພາບ: ພູວຽງຄຳ
ຄໍາເຫັນ