ອົງການໄອຍະການປະຊາຊົນເຂດ 1 ໄຊຍະບູລີ ປະກາດສ້າງຕັ້ງບັນດາໜ່ວຍງານ 

ອົງການໄອຍະການປະຊາຊົນເຂດ 1 ແຂວງໄຊຍະບູລີ ໄດ້ຈັດພິທີປະກາດສ້າງຕັ້ງໜ່ວຍງານ ແລະ ຊັບ ຊ້ອນບ່ອນປະຈຳການຂອງພະນັກງານພາຍໃນອົງການໄອຍະການປະຊາຊົນເຂດ 1 ຂຶ້ນໃນວັນທີ 16 ພຶດສະພາ ຜ່ານມາ ໂດຍການໃຫ້ກຽດເຂົ້າຮ່ວມຂອງທ່ານນາງ ເພັດມະນີ ໃຈດີ ຮອງຫົວໜ້າອົງການໄອຍະການປະຊົນແຂວງ, ທ່ານ ຄຳພຽນ ປັນຍາວົງ ຫົວໜ້າຫ້ອງການຄະນະຈັດຕັ້ງເມືອງ, ທ່ານ ສົມຊາຍ ທຳມະວົງ ຫົວໜ້າອົງການໄອຍະການປະຊາຊົນເຂດ 1 ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານນາງ ກິ່ງສະດາ ໄຊຍະລັກ ຮອງຫົວໜ້າຫ້ອງການອົງການໄອຍະການປະຊາຊົນແຂວງ ໄດ້ຜ່ານຂໍ້ຕົກລົງຂອງຫົວໜ້າອົງການໄອຍະການປະຊາຊົນສູງສຸດ ສະບັບເລກທີ 360/ອອປສ, ລົງວັນທີ 29 ເມສາ 2024 ວ່າດ້ວຍການສ້າງຕັ້ງໜ່ວຍງານຢູ່ອົງການໄອຍະການປະຊາຊົນເຂດ 1 ແຂວງໄຊຍະບູລີ, ຫົວໜ້າອົງການໄອຍະການປະຊາຊົນສູງສຸດຕົກລົງເຫັນດີສ້າງຕັ້ງບັນດາໜ່ວຍງານຢູ່ອົງການໄອຍະການປະຊາຊົນເຂດ 1 ແຂວງໄຊຍະບູລີຄື: ໜ່ວຍງານຫ້ອງການ, ໜ່ວຍງານຕິດຕາມກວດກາການດຳເນີນຄະດີອາຍາ ແລະ ໜ່ວຍງານຕິດຕາມກວດກາການດຳເນີນຄະດີແພ່ງ ແລະ ໜ່ວຍງານຕິດຕາມກວດກາທົ່ວໄປ ແລະ ຕິດຕາມກວດກາສະຖານທີ່ກັກຕົວ ແລະ ສະຖານທີ່ກັກຂັງ. ໃນພິທີໄດ້ຜ່ານຂໍ້ຕົກລົງວ່າດ້ວຍການຊັບຊ້ອນ ແລະ ແຕ່ງຕັ້ງຫົວໜ້າໜ່ວຍງານ, ຮອງຫົວໜ້າໜ່ວຍງານ ແລະ ຊັບຊ້ອນບ່ອນປະຈຳການຂອງພະນັກງານວິຊາການພາຍໃນອົງການໄອຍະການປະຊາຊົນເຂດ 1 ແຂວງໄຊຍະບູລີຈຳນວນໜຶ່ງ. 
    ໂອກາດນີ້, ທ່ານນາງ ເພັດມະນີ ໃຈດີ ໄດ້ໃຫ້ກຽດໂອ້ລົມ ເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງຈົ່ງສຸມທຸກສະຕິປັນຍາຄວາມຮູ້-ຄວາມສາມາດເຂົ້າໃນໜ້າທີ່ວຽກງານຕາມການຈັດຕັ້ງພັກ-ລັດມອບໝາຍໃຫ້ມີຜົນສຳເລັດຕາມລະດັບຄາດໝາຍ. ຂ່າວ-ພາບ: ສົມພົງ ສີສະຫວັດ