 |
ທ່ານ ຄໍາແດງ ສີບຸນເຮືອງ ຫົວໜ້າອົງການໄອຍະການປະຊາຊົນແຂວງ ໄດ້ກ່າວເປີດກອງປະຊຸມ ພ້ອມທັງຜ່ານບົດສະຫຼຸບການຈັດຕັ້ງປະຕິບັດວຽກງານອະໄພຍະໂທດລະດັບຊາດ ປະຈໍາປີ 2025 ແລະ ທິດທາງວຽກງານຈຸດສຸມ ປະຈໍາປີ 2026. ຈາກນັ້ນ, ທ່ານ ອຸດອນ ແກ້ວນາວົງ ຮອງຫົວໜ້າອົງການໄອຍະການປະຊາຊົນແຂວງໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານອະໄພຍະໂທດລະດັບແຂວງ ປະຈໍາປີ 2025 ແລະ ທິດທາງວຽກງານຈຸດສຸມ ປະຈໍາປີ 2026, ຜ່ານຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງຄະນະກໍາມະການ ແລະ ກອງເລຂາອະໄພຍະໂທດປີ 2026, ຜ່ານແຜນງົບປະມານປີ 2026.
ໃນປີ 2025 ຜ່ານມາ, ທົ່ວປະເທດມີນັກໂທດທີ່ໄດ້ຮັບການອະໄພຍະໂທດຕາມດໍາລັດຂອງປະທານປະເທດ ມີຈໍານວນທັງໝົດ 2,858 ຄົນ ຍິງ 362 ຄົນ, ຕ່າງປະເທດ 59 ຄົນ ຍິງ 7 ຄົນ. ຈໍານວນນັກໂທດທີ່ໄດ້ເງື່ອນໄຂຫຼຸດຜ່ອນໂທດ ມີທັງໝົດ 2,622 ຄົນ ຍິງ 329 ຄົນ, ຕ່າງປະເທດ 57 ຄົນ ຍິງ 6 ຄົນ.
ສໍາລັບຢູ່ແຂວງຄໍາມ່ວນໃນປີ 2025 ຜ່ານມາ, ມີນັກໂທດທີ່ໄດ້ຮັບການໃຫ້ອະໄພຍະໂທດມີຈໍານວນທັງໝົດ 411 ຄົນ ຍິງ 45 ຄົນ. ໃນນີ້, ນັກໂທດທີ່ໄດ້ຮັບການໃຫ້ອະໄພຍະໂທດ ດ້ວຍການຫຼຸດຜ່ອນໂທດ ມີທັງໝົດ 381 ຄົນ ຍິງ 41 ຄົນ ຊຶ່ງໄດ້ແຍກແຕ່ລະປະເພດຄື: ນັກໂທດຄະດີຢາເສບຕິດທັງໝົດ 366 ຄົນ ຍິງ 40 ຄົນ, ນັກໂທດຄະດີທົ່ວໄປທັງໝົດ 15 ຄົນ ຍິງ 1 ຄົນ. ນັກໂທດທີ່ໄດ້ຮັບການໃຫ້ອະໄພຍະໂທດ ດ້ວຍການປ່ອຍຕົວມີທັງໝົດ 30 ຄົນ ຍິງ 4 ຄົນ ຊື່ງແຍກແຕ່ລະປະເພດຄື: ນັກໂທດຄະດີຢາເສບຕິດທັງໝົດ 28 ຄົນ ຍິງ 4 ຄົນ, ນັກໂທດຄະດີທົ່ວໄປທັງໝົດ 2 ຄົນ.
ໃນກອງປະຊຸມ, ບັນດາຜູ້ແທນທີ່ເຂົ້າຮ່ວມກໍໄດ້ຜັດປ່ຽນກັນປະກອຄໍາເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນເພື່ອຊອກໃຫ້ເຫັນບັນຫາຄົງຄ້າງໃນໄລຍະຜ່ານມາ ພ້ອມທັງວາງທິດທາງວຽກງານຈຸດສຸມໃນປີຕໍ່ໄປ. ຈາກນັ້ນ, ປະທານກອງປະຊຸມກໍໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາໃນການຈັດຕັ້ງປະຕິບັດ.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ