ເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການ, ກົມກອງອ້ອມຂ້າງແຂວງ ແລະ ເຈົ້າເມືອງເຂົ້າຮ່ວມໂດຍຜ່ານລະບົບວີດີໂອທາງໄກ.
ໃນກອງປະຊຸມ, ທ່ານ ພົງສະຫວັນ ສິດທະວົງ ໄດ້ກ່າວວ່າ: ກອງປະຊຸມຄັ້ງນີ້ ຈະໄດ້ພ້ອມກັນຄົ້ນຄວ້າປຶກສາຫາລື ບັນດາວຽກງານ ທີ່ສຳຄັນຂອງແຂວງຄື: ຮັບຟັງລາຍງານ ສະພາບພົ້ນເດັ່ນຂອງອົງການປົກຄອງແຂວງ ໃນການຈັດຕັ້ງປະຕິບັດວຽກງານປະຈຳເດືອນກັນຍາ ແລະ ກໍານົດທິດທາງວຽກງານຈຸດສຸມເດືອນຕຸລາ, ວຽກງານການປ້ອງກັນ ແລະ ຮັກສາຄວາມສະຫງົບລຽບຕາມຊາຍແດນ, ການແກ້ໄຂປະກົດການຫຍໍ້ທໍ້ໃນສັງຄົມໂດຍຕິດພັນກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ການຈັດຕັ້ງປະຕິບັດລາຍຮັບ-ລາຍຈ່າຍງົບປະມານປະຈຳເດືອນກັນຍາ, ການຄຸ້ມຄອງການຂຸດຄົ້ນແຮ່ທາດ, ການຕິດຕາມສະພາບການຮຽນ-ການສອນ ແລະ ຮັບຟັງລາຍງານ ກ່ຽວກັບສະພາບໄພພິບັດທີ່ເກີດຂຶ້ນຢູ່ພາຍໃນແຂວງ. ຈາກນັ້ນ, ທ່ານ ຄໍາຫຼ້າ ຜີວວັນນາ ຫົວໜ້າຫ້ອງວ່າການແຂວງກໍໄດ້ຂຶ້ນລາຍງານສະພາບພົ້ນເດັ່ນຂອງອົງການປົກຄອງແຂວງ ວ່າ: ໃນໄລຍະ 1 ເດືອນຜ່ານມາແຂວງສາມາດຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ຊີວິດການເປັນຢູ່ຂອງປະຊາຊົນຄ່ອຍໆດີຂຶ້ນ, ບັນດາຄາດໝາຍສູ້ຊົນຂອງຂະແໜງການຂັ້ນຕ່າງໆບັນລຸຕາມແຜນທີ່ວາງໄວ້; ເສດຖະກິດສືບຕໍ່ຂະຫຍາຍຕົວ, ສາມາດເກັບລາຍຮັບໄດ້ທັງໝົົດ 109.37 ຕື້ກີບ, ລວມລາຍຮັບຮອດປັດຈຸບັນໄດ້ທັງໜົດ 1,896.93 ຕື້ກີບ, ເທົ່າກັບ 90.66% ຂອງແຜນການປີ. ໄດ້ເອົາໃຈໃສ່ຕິດຕາມ ແລະ ຄຸ້ມຄອງລາຄາສິນຄ້າຕາມທ້ອງຕະຫຼາດເພື່ອບໍ່ໃຫ້ສວຍໂອກາດຂຶ້ນລາຄາສິນຄ້າ, ກວດກາການສົ່ງອອກພືດ, ຜະລິດຕະພັນພືດທັງໝົດ 8 ລາຍການ, ຈໍານວນ 20,859 ໂຕນ, ມູນຄ່າ2,520,840 ໂດລາ. ຄຸ້ມຄອງການນໍາເຂົ້າພືດ-ຜະລິດຕະພັນພືດ ແລະ ວັດຖຸຕ້ອງຄວບຄຸມທັງໝົດຈໍານວນ 128,244 ໂຕນ ມູນຄ່າ 39,519.84 ໂດລາ, ສ່ວນວຽກງານວັດທະນະທຳ-ສັງຄົມແມ່ນໄດ້ສໍາເລັດການເປີດພິທີໄຂສົກຮຽນໃໝ່ປະຈໍາສົກຮຽນ2024-2025, ຕິດຕາມ ແລະ ເຝົ້າລະວັງການລະບາດພະຍາດລະດູການ ແລະ ການລະບາດຂອງພະຍາດໄຂ້ຍຸງລາຍທີ່ເກີດຂຶ້ນຢູ່ 10 ເມືອງ, ກວມເອົາ 163 ບ້ານ, ເກີດຂຶ້ນໃນເດືອນ ກໍລະນີ, ໄດ້ປັບປຸງເນື້ອໃນການອອກຂ່າວທາງວິທະຍຸ-ໂທລະພາບເພື່ອສະໜອງຂໍ້ມູນຂ່າວສານໃຫ້ປະຊາຊົນຢ່າງຖົ່ວເຖິງ, ຍົກລະດັບສີມືແຮງງານໃຫ້ກໍາລັງແຮງງານພາຍໃນຫົວໜ່ວຍແຮງງານ ແລະ ໄດ້ມອບເຄື່ອງຊ່ວຍເຫຼືອໃຫ້ຜູ້ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຢູ່ 4 ເມືອງເໜືອ ລວມມູນຄ່າທັງໝົດ 537,915,000 ກີບ. ໃນກອງປະຊຸມຍັງໄດ້ປະກອບຄໍາຄິດ-ຄໍາເຫັນເພື່ອເຮັດໃຫ້ກອງປະຊຸມຄັ້ງນີ້ ມີເນື້ອໃນຄົບຖ້ວນສົມບູນເລິກເຊິ່ງຂຶ້ນຕື່ມ.
(ຂ່າວ-ພາບ: ອຸ່ນເຮືອນ ໂພທິລັກ)
ຄໍາເຫັນ