 |
ກອງປະຊຸມໄດ້ຕີລາຄາຜົນການນຳພາ-ຊີ້ນຳຮອບດ້ານໃນໄລຍະ 6 ເດືອນຕົ້ນປີ 2026 ແລະ ຄົ້ນຄວ້າທິດທາງວຽກງານ 6 ເດືອນທ້າຍປີ ໂດຍເນັ້ນການລາຍງານ 4 ບັນຫາສໍາຄັນ ປະກອບມີ: ການປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດ, ວຽກງານປ້ອງກັນຊາດ-ປ້ອງກັນຄວາມສະຫງົບຮອບດ້ານທົ່ວແຂວງ, ການຊຸກຍູ້ສົ່ງເສີມຜະລິດເປັນສິນຄ້າ ແລະ ການກຽມພ້ອມຮັບມືໄພພິບັດໃນລະດູຝົນ.
ສະຫາຍ ໄຊຊະນະ ໂຄດພູທອນ ໄດ້ເນັ້ນວ່າ: ບັນດາຫົວຂໍ້ທີ່ນຳມາຄົ້ນຄວ້າໃນກອງປະຊຸມຄັ້ງນີ້ ລ້ວນແຕ່ເປັນວຽກງານສຳຄັນທີ່ກ່ຽວພັນກັບການນຳພາ-ຊີ້ນຳຂອງຄະນະບໍລິຫານງານພັກແຂວງ. ພ້ອມທັງຮຽກຮ້ອງໃຫ້ຜູ້ເຂົ້າຮ່ວມຮ່ວມກັນວິເຄາະຜົນສຳເລັດ, ຊີ້ແຈງຂໍ້ຄົງຄ້າງ ແລະ ສະເໜີມາດຕະການແກ້ໄຂຢ່າງກົງໄປກົງມາ ເພື່ອໃຫ້ການດຳເນີນວຽກງານໃນໄລຍະຕໍ່ໜ້າບັນລຸຕາມເປົ້າໝາຍ.
ຕາມການລາຍງານຕໍ່ກອງປະຊຸມໃນ 6 ເດືອນຕົ້ນປີ 2026 ເສດຖະກິດຂອງແຂວງຂະຫຍາຍຕົວ 4.7% ທຽບໃສ່ແຜນການ 6.4%. ຍອດຜະລິດຕະພັນພາຍໃນ (GDP) ບັນລຸ 21,127 ຕື້ກີບ ຫຼື ເທົ່າກັບ73% ຂອງແຜນ, ສະເລ່ຍລາຍຮັບປະຊາຊົນຢູ່ທີ່ 45 ລ້ານກີບ ຫຼື 2,151 ໂດລາຕໍ່ຄົນຕໍ່ປີ. ດ້ານກະສິກຳ ການປູກເຂົ້ານາແຊງບັນລຸ 10,656 ເຮັກຕາ ໄດ້ຜົນຜະລິດ 52,825 ໂຕນ. ສ່ວນແຜນຜະລິດເຂົ້ານາປີ ກໍານົດເນື້ອທີ່ 94,102 ເຮັກຕາ ຄາດຜົນຜະລິດ 344,650 ໂຕນ, ປັດຈຸບັນຊາວກະສິກອນໄດ້ປັກດຳແລະ ນາຫວ່ານຕາມແຜນທີ່ວາງໄວ້.
 |
ສ່ວນດ້ານການເງິນ ສາມາດເກັບລາຍຮັບງົບປະມານໄດ້ 3,324.30 ຕື້ກີບ ເທົ່າກັບ 68.59% ຂອງແຜນປີ. ໃນນັ້ນ ລາຍຮັບສູນກາງບັນລຸ 81.43% ແລະ ລາຍຮັບທ້ອງຖິ່ນບັນລຸ 60.22%. ສ່ວນດ້ານລາຍຈ່າຍງົບປະມານປະຕິບັດໄດ້ 583.39 ຕື້ກີບ ຫຼື 30.79% ຂອງແຜນ.
ນອກຈາກນັ້ນ ກອງປະຊຸມຍັງຕີລາຄາວ່າ ການຜະລິດກະສິກຳໄດ້ຂະຫຍາຍເປັນສິນຄ້າຫຼາຍຂຶ້ນ, ການລົງທຶນຂອງລັດ ແລະ ເອກະຊົນດຳເນີນໄປຕາມກົດໝາຍ, ໂຄງການພັດທະນາໂຄງສ້າງພື້ນຖານມີຄວາມຄືບໜ້າ, ດ້ານການສຶກສາ, ສາທາລະນະສຸກ ແລະ ວັດທະນະທຳ ຍັງສືບຕໍ່ໄດ້ຮັບການຍົກລະດັບ ແນໃສ່ການພັດທະນາຢ່າງຍືນຍົງ.
ຂ່າວ : ມະນີວັນ
ຄໍາເຫັນ