ໂອເປັກພລັສ ຫຼຸດການຜະລິດນ້ຳມັນເພື່ອກະຕຸ້ນລາຄາໃນຕະຫຼາດໂລກ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ກຸ່ມປະເທດຜູ້ຜະລິດນໍ້າມັນລາຍໃຫຍ່ຂອງໂລກໄດ້ມີມະຕິເຫັນດີຫຼຸດເພດານການຜະລິດເພີ່ມອີກ ເພື່ອເພີ່ມລາຄາໃນຕະຫຼາດໂລກໃຫ້ສູງຂຶ້ນ.
    ໂອເປັກພລັສ ຊຶ່ງເປັນການຮວມໂຕກັນລະຫວ່າງກຸ່ມປະເທດນອກອົງການກຸ່ມປະເທດຜູ້ສົ່ງອອກນ້ຳມັນ (ໂອເປັກ) ຈຳນວນ 10 ປະເທດກັບສະມາຊິກໂອເປັກດັ່ງເດີມ 12 ປະເທດໄດ້ມີມະຕິເຫັນດີຮ່ວມກັນເພື່ອເພີ່ມໄລຍະເວລາຫຼຸດການຜະລິດໂດຍສະໝັກໃຈລວມກັນ 2,2 ລ້ານບາເຣນ ທີ່ໄດ້ປະກາດເມື່ອເດືອນມິຖຸນາ 2023 ອອກໄປຈົນເຖິງໄລຍະໄຕມາດທີ 2 ຂອງປີນີ້ເປັນຢ່າງໜ້ອຍ ເພື່ອສະໜັບສະໜູນການສ້າງສະຖຽນລະພາບຕະຫຼາດ. ທັງນີ້, ຊາອຸດິດ ອາຣັບບີ ຈະຫຼຸດເພດານການຜະລິດເພີ່ມອີກ 1 ລ້ານບາເຣນຕໍ່ວັນ ແລະ ຣັດເຊຍຈະຫຼຸດກຳລັງການຜະລິດເພີ່ມອີກມື້ລະ 470.000 ບາເຣນໃນໄລຍະໄຕມາດທີ 2 ຂອງປີນີ້ ໂດຍການຫຼຸດໂກຕ້າຂອງທັງສອງປະເທດເພີ່ມເຕີ່ມຈາກການປະກາດເພດານການຜະລິດ 500.000 ບາເຣນຕໍ່ວັນທີ່ເຄີຍປະກາດໃນເດືອນເມສາ 2023 ຜ່ານມາ ແລະ ຈະມີຜົນຈົນເຖິງທ້າຍປີ 2024. ຂະນະທີ່ສະຫະນະຄອນອາຣັບເອມິເຣດ (UAE), ກູເວດ, ອີຣັກ ແລະ ກາຊັກສະຖານປະກາດຫຼຸດກຳລັງການຜະລິດຂອງຕົນເອງໄປຕາມອັດຕາສ່ວນເຊັ່ນດຽວກັນ.
ໂອເປັກພລັສ ມີສະມາຊິກ 23 ປະເທດ ແຕ່ແອງໂກລາ ຊຶ່ງເປັນສ່ວນໜຶ່ງຂອງໂອເປັກລາອອກຈາກການເປັນສະມາຊິກເມື່ອເດືອນທັນວາ 2023 ຜ່ານມາ ເນື່ອງຈາກບໍ່ພໍໃຈມະຕິຂອງໂອເປັກທີ່ຕ້ອງການໃຫ້ສະມາຊິກຫຼຸດເພດານການຜະລິດລົງອີກ ເພື່ອກະຕຸ້ນລາຄານ້ຳມັນໃນຕະຫຼາດໂລກໃຫ້ກັບມາສູງຂຶ້ນ ຊຶ່ງສົ່ງຜົນກະທົບຕໍ່ເສດຖະກິດຂອງແອງໂກລາໃນໄລຍະຍາວ.