ອົສຕຣາລີ ຈຳກັດວີຊານັກຮຽນ ເນື່ອງຈາກຈຳນວນຜູ້ອົບພະຍົບສູງເປັນປະຫວັດສາດ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ລັດຖະບານອົສຕຣາລີຈະເລີ່ມບັງຄັບໃຊ້ກົດວີຊາທີ່ເຂັ້ມງວດຫຼາຍຂຶ້ນສຳລັບນັກຮຽນຕ່າງປະເທດ ເນື່ອງຈາກຂໍ້ມູນຢ່າງເປັນທາງການສະແດງໃຫ້ເຫັນວ່າ ຈຳນວນຜູ້ອົບພະຍົບເຂົ້າປະເທດຢູ່ໃນລະດັບສູງເປັນປະຫວັດສາດອີກຄັ້ງ.
    ລັດຖະບານອົສຕຣາລີລະບຸວ່າ: ການຂໍວີຊາສຳລັບນັກຮຽນ ແລະ ນັກສຶກສາຈົບໃໝ່ຈະມີຂໍ້ກຳນົດດ້ານພາສາອັງກິດເພີ່ມຂຶ້ນ ແລະ ອຳນາດການປົກຄອງ ນະຄອນຫຼວງແຄນເບີຣາຈະໄດ້ຮັບອຳນາດໃນການສະກັດກັ້ນຜູ້ໃຫ້ບໍລິການດ້ານການສຶກສາຈາກການຮັບນັກສຶກສາຕ່າງປະເທດຖ້າຫາກພວກເຂົາຝ່າຝືນກົດຫຼາຍຄັ້ງ. ທ່ານນາງ ແຄ ໂອນິນ ລັດຖະມົນຕີກະຊວງພາຍໃນຂອງອົສຕຣາລີກ່າວວ່າ: ການດຳເນີນການໃນໄລຍະທ້າຍອາທິດທີ່ຜ່ານມາຈະຊຸກຍູ້ໃຫ້ລະດັບການອົບພະຍົບຫຼຸດລົງຢ່າງຕໍ່ເນື່ອງຄວບຄູ່ກັບການປະຕິບັດຕາມພັນທະກໍລະນີຂອງພວກເຮົາໃນກົນລະຍຸດການຍ້າຍຖິ່ນຖານ ເພື່ອແກ້ໄຂລະບົບທີ່ເສຍຫາຍ. ນອກຈາກນີ້, ອຳນາດການປົກຄອງນະຄອນຫຼວງແຄນເບີຣາຈະໃຊ້ແບບທົດສອບຄວາມເປັນນັກຮຽນ (GST) ສະບັບໃໝ່ ເພື່ອຈັດການກັບນັກຮຽນຕ່າງປະເທດທີ່ຕ້ອງການມາອົສຕຣາລີເພື່ອເຮັດວຽກເປັນຫຼັກຕະຫຼອດຈົນກຳນົດເງື່ອນໄຂການບໍ່ຢູ່ຕໍ່ກັບວີຊານັກທ່ອງທ່ຽວເພີ່ມຂຶ້ນດ້ວຍ. ອີກຢ່າງໜຶ່ງ, ການເຄື່ອນໄຫວດັ່ງກ່າວ ເກີດຂຶ້ນຫຼັງຈາກລັດຖະບານອົສຕຣາລີດຳເນີນການຫຼາຍຢ່າງເມື່ອປີຜ່ານມາ ເພື່ອຍົກເລີກສິດທິໃນໄລຍະການແຜ່ລະບາດຂອງພະຍາດໂຄວິດ-19 ເຊັ່ນ: ການບໍ່ຈຳກັດຊົ່ວໂມງເຮັດວຽກຂອງນັກສຶກສາຕ່າງປະເທດ ຊຶ່ງລັດຖະບານໃນເວລານັ້ນກ່າວວ່າ: ກົດລະບຽບການຂໍວີຊາສຳລັບນັກຮຽນຕ່າງປະເທດຈະເຂັ້ມງວດຍິ່ງຂຶ້ນ ແລະ ອາດຈະເຮັດໃຫ້ຈຳນວນຜູ້ອົບພະຍົບຫຼຸດລົງເຄິ່ງໜຶ່ງໃນອີກ 2 ປີຂ້າງໜ້ານີ້. ເຖິງແມ່ນວ່າ ອົສຕຣາລີຮັບຜູ້ອົບພະຍົບປະຈຳປີເພີ່ມຂຶ້ນ ໃນປີ 2022 ເພື່ອຊ່ວຍແກ້ໄຂບັນຫາການຂາດແຄນແຮງງານໃນທຸລະກິດຫຼັກຂອງປະເທດຫຼັງຈາກເກີດການແຜ່ລະບາດຂອງພະຍາດໂຄວິດ-19 ແຕ່ການເຄື່ອນໄຫວຂ້າງເທິງກັບເຮັດໃຫ້ການຄວບຄຸມຊາຍແດນເຂັ້ມງວດຍິ່ງຂຶ້ນລວມເຖິງປ້ອງກັນບໍ່ໃຫ້ນັກຮຽນ ແລະ ຄົນງານຕ່າງປະເທດອອກນອກປະເທດເປັນເວລາເກືອບ 2 ປີ.
    ທັງນີ້, ຂໍ້ມູນຈາກສຳນັກງານສະຖິຕິອົສຕຣາລີສະແດງໃຫ້ເຫັນວ່າ: ຈຳນວນຜູ້ອົບພະຍົບເພີ່ມຂຶ້ນ 60% ເປັນ 548.000 ຄົນໃນໄລຍະເວລາ 1 ປີ ໂດຍນັບເຖິງວັນທີ 30 ກັນຍາ 2023 ຊຶ່ງໂດຍລວມແລ້ວປະຊາກອນຂອງອົສຕຣາລີເພີ່ມຂຶ້ນ 2,5% ເປັນ 26,8 ລ້ານຄົນໃນໄລຍະເວລາດັ່ງກ່າວ ຖືວ່າເປັນການເພີ່ມຂຶ້ນໃນອັດຕາທີ່ໄວທີ່ສຸດເປັນປະຫວັດສາດ.