ມີທ່ານອ່ອນແກ້ວອຸ່ນອາລົມຮອງເຈົ້າແຂວງອຸດົມໄຊພ້ອມດ້ວຍຫ້ອງການກະສິກໍາແລະປ່າໄມ້ 7 ເມືອງທົ່ວແຂວງ, ຂະແໜງການທີ່ກ່ຽວຂ້ອງແລະພະນັກງານວິຊາການເຂົ້າຮ່ວມ.
ກອງປະຊຸມ ໄດ້ສະຫຼຸບຕີລາຄາຄືນຜົນການຈັດຕັ້ງປະຕິບັດບັນດາໜ້າວຽກຂອງພະແນກກະສິກໍາແລະປ່າໄມ້ທົ່ວແຂວງອຸດົມໄຊໃນໄລຍະ 1 ປີຜ່ານມາ ຊຶ່ງຄະນະພັກ-ຄະນະນຳທຸກຂັ້ນໄດ້ສຸມໃສ່ນຳພາ-ຊີ້ນຳຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມປະຈຳປີ 2024 ແລະທິດທາງແຜນການ 2025 ຂອງແຂວງ, ຂອງກະຊວງແລະຂອງພະແນກ, ເປັນເຈົ້າການຈັດຕັ້ງປະຕິບັດແຜນງານ, ໂຄງການຕາມພາລະບົດບາດ, ສິດແລະໜ້າທີ່ຂອງຕົນຢ່າງແຂງແຮງຕິດພັນການຈັດຕັ້ງຜັນຂະຫຍາຍສອງວາລະແຫ່ງຊາດສາມາດສູ້ຊົນຍາດໄດ້ຜົນສຳເລັດທີ່ພົ້ນເດັ່ນຫຼາຍດ້ານເປັນຕົ້ນສຳເລັດການນຳພາການເມືອງ-ແນວຄິດ, ການຮັກສາຄວາມສະຫງົບພາຍໃນສຳນັກງານ, ອົງການຈັດຕັ້ງ, ວຽກງານວິຊາສະເພາະຕາມແຜນງານບຸລິມະສິດ ຕິດພັນກັບໜ້າທີ່ການເມືອງຂອງຂະແໜງການກະສິກໍາແລະປ່າໄມ້,ແຜນງານຜະລິດກະສິກໍາເພື່ອຄ້ຳປະກັນດ້ານສະບຽງອາຫານແລະໂພຊະນາການ, ແຜນງານຜະລິດກະສິກໍາເປັນສິນຄ້າແລະປຸ່ງແຕ່ງເພື່ອຊົມໃຊ້ພາຍໃນແລະສົ່ງອອກ, ແຜນງານຄຸ້ມຄອງ, ພັດທະນານຳໃຊ້ຊັບພະຍາກອນປ່າໄມ້ແບບຍືນຍົງ, ແຜນພັດທະນາຊົນນະບົດແລະແກ້ໄຂຄວາມທຸກຍາກ.
ສຳລັບວຽກງານກໍ່ສ້າງພັກ-ພະນັກງານ, ວຽກງານອົງການຈັດຕັ້ງມະຫາຊົນ, ວຽກງານ 3 ສ້າງ, ການຈັດຕັ້ງປະຕິບັດນະໂຍບາຍ, ຄາດໝາຍສູ້ຊົນທີ່ສຳຄັນແຕ່ປີ 2026-2029 ຈະໄດ້ສຸມໃສ່ຜະລິດກະສິກໍາເພື່ອຄ້ຳປະກັນດ້ານສະບຽງອາຫານແລະໂພຊະນາການຜະລິດເຂົ້າເປືອກໃຫ້ໄດ້ 453,111 ໂຕນ, ສະເລ່ຍ 90,622ໂຕນຕໍ່ປີ ສະເລ່ຍອັດຕາບໍລິໂພກໃຫ້ໄດ້ 260 ກິໂລກຣາມຕໍ່ຄົນຕໍ່ປີ; ຜະລິດຊີ້ນ, ປາ, ໄຂ່ໃຫ້ໄດ້ 242,842 ໂຕນສະເລ່ຍ 48,568 ໂຕນຕໍ່ປີ;ອັດຕາບໍລິໂພກໃຫ້ໄດ້ 126.62 ກິໂລກຣາມຕໍ່ຄົນຕໍ່ປີ, ຜະລິດກະສິກໍາເປັນສິນຄ້າແລະປຸ່ງແຕ່ງເພື່ອຊົມໃຊ້ພາຍໃນແລະສົ່ງອອກຕາມທ່າແຮງຂອງແຂວງ, ຜະລິດພືດໃຫ້ໄດ້ 4,650,336 ໂຕນຂຶ້ນໄປໃນເນື້ອທີ່ 97,629 ເຮັກຕາ. ສ່ວນການລ້ຽງສັດເປັນສິນຄ້າສົ່ງອອກ: ລ້ຽງງົວໃຫ້ໄດ້ 40,000ໂຕ, ໝູ 168,000ໂຕ, ປາ 54,901 ໂຕນ; ຄຸ້ມຄອງພັດທະນາແລະນຳໃຊ້ຊັບພະຍາກອນປ່າໄມ້ແບບຍືນຍົງ: ແກ້ໄຂຄວາມທຸກຍາກສູ້ຊົນສ້າງຄອບຄົວພົ້ນທຸກໃຫ້ໄດ້ 9,181 ຄອບຄົວ, ສ້າງບ້ານພົ້ນທຸກໃຫ້ໄດ້ 106 ບ້ານ, ສ້າງເມືອງພົ້ນທຸກໃຫ້ໄດ້ 3 ເມືອງ, ສ້າງຄອບຄົວພັດທະນາໃຫ້ໄດ້ 13,725 ຄອບຄົວ, ສ້າງບ້ານພັດທະນາໃຫ້ໄດ້ 126 ບ້ານ, ສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດໃຫ້ໄດ້ 5 ຈຸດສຸມແລະສ້າງເມືອງເຂັ້ມແຂງຮອບດ້ານໃຫ້ໄດ້ 3 ເມືອງ.
ໂອກາດນີ້, ທ່ານອ່ອນແກ້ວອຸ່ນອາລົມໄດ້ຍ້ອງຍໍຊົມເຊີຍຕໍ່ຜົນງານການນຳພາ-ຊີ້ນຳຂອງຄະນະພະແນກກະສິກໍາແລະປ່າໄມ້ທີ່ໄດ້ນຳພາ-ຊີ້ນຳພະນັກງານ, ປະຕິບັດໜ້າທີ່ການເມືອງແລະສາມາດຍາດໄດ້ຜົນສຳເລັດໃນຫຼາຍດ້ານພ້ອມທັງເນັ້ນໃຫ້ພະແນກດັ່ງກ່າວສືບຕໍ່ທຸ່ມເທສະຕິປັນຍາ, ເຫື່ອແຮງ, ຍົກສູງຄວາມຮັບຜິດຊອບໜ້າທີ່ການເມືອງເພື່ອນຳພາ-ຊີ້ນຳວຽກງານກະສິກຳແລະປ່າໄມ້ໃຫ້ມີຜົນງານທີ່ຍິ່ງໃຫຍ່ກວ່າເກົ່າໃນຕໍ່ໜ້າ.
(ຂ່າວ: ດວງຕາແສງມະນີ)
ຄໍາເຫັນ