ຂ່າວລະບຸວ່າ: ບົດລາຍງານເສດຖະກິດ ຫວຽດນາມ 2025 ສຸມໃສ່ວິໄຈພື້ນຖານມະຫາພາກຂອງ ຫວຽດນາມ, ຜົນກະທົບຂອງການເຊື່ອມໂຍງເຂົ້າກັບສາກົນໃນການດຶງດູດເງິນລົງທຶນຕ່າງປະເທດ, ການຄ້າສາກົນຂອງ ຫວຽດນາມ ແລະ ການພັດທະນາພື້ນຖານເສດຖະກິດ ກາກບອນຕ່ຳ. ບົດລາຍງານໄດ້ຍົກອອກຂໍ້ສະເໜີແນະກັບຫວຽດນາມ ເພື່ອແນໃສ່ສືບຕໍ່ກ້າວໄປເຖິງພື້ນຖານເສດຖະກິດເຊື່ອມໂຍງ, ໂປ່ງໄສ, ຍືນຍົງ ແລະ ກວມລວມກວ່າ. ທ່ານ ອາວາໂຣ ເປເຣເຣຍ (Alvaro Pereira) ນັກຊ່ຽວຊານດ້ານເສດຖະກິດ ຫົວໜ້າ OECD ເນັ້ນໜັກວ່າ: ຫວຽດນາມວາງເປົ້າ ໝາຍກາຍເປັນປະເທດທີ່ມີລາຍຮັບສູງໃນປີ 2045. ພວກເຮົາຮູ້ວ່າເພື່ອບັນລຸເປົ້າໝາຍນີ້, ຫວຽດນາມ ຕ້ອງສືບຕໍ່ປັບປຸງຢ່າງແຮງ, ສືບຕໍ່ລົງທຶນເຂົ້າໃນການສຶກສາ, ພື້ນຖານໂຄງລ່າງ, ເປີດປະຕູເພື່ອໃຫ້ການເຕີບໂຕການສົ່ງອອກໃຫ້ຫຼາຍກ່ວາອີກ. ສິ່ງສຳຄັນພິເສດນັ້ນແມ່ນປັດຈຸບັນ, ຫວຽດນາມ ແມ່ນປະເທດມີຊາວໜຸ່ມຫຼາຍ ແລະ ພວມໄດ້ຮັບຜົນປະໂຫຍດໃຫຍ່ທີ່ສຸດຈາກແຫຼ່ງກຳລັງນີ້. ແຕ່ກໍຄືກັນກັບທຸກປະເທດໃນໂລກ, ຫວຽດນາມ ກໍຕ້ອງປະຕິຮູບ ແລະ ສ້າງໂຄງປະກອບຄືນໃໝ່ຢ່າງແຮງເພື່ອປ່ຽນແປງ, ປັບປຸງສະມັດຖະພາບ, ຄຸນນະພາບໃນການອອກແຮງງານ.
ໃນສານທີ່ໄດ້ສົ່ງໄປຍັງກອງປະຊຸມ, ທ່ານ ມາເທຣຍ ຄໍຣແມນ (Mathias Cormann) ເລຂາທິການໃຫຍ່ OECD ໄດ້ຕີລາຄາຜົນສຳເລັດຂອງການພັດທະນາເສດຖະກິດ-ສັງຄົມຂອງ ຫວຽດນາມ, ທ່ານຢັ້ງຢືນການສະໜັບສະໜູນຂອງອົງການນີ້ ແລະ ໃຫ້ຄຳໝັ້ນສັນຍາຈະສືບຕໍ່ໜູນຊ່ວຍ ຫວຽດນາມ ເພື່ອບັນລຸບັນດາເປົ້າໝາຍການເຕີບໂຕສູງໃນໄລຍະຈະມາເຖິງ.
ຄໍາເຫັນ