ປະກາດການຈັດຕັ້ງ ພາຍຫຼັງການໂຮມ ກະຊວງ ພບ ແລະ ກະຊວງ ອຄ

ສະຫາຍ ມະໄລທອງ ກົມມະສິດ ໄດ້ລາຍງານກ່ຽວກັບການກະກຽມ ແລະ ດໍາເນີນການປັບປຸງກົງຈັກການຈັດຕັ້ງໃນໄລຍະຜ່ານມາ ໃນການໂຮມກະຊວງ ພບ ແລະ ກະຊວງ ອຄ ເຂົ້າກັນ ແລະ ທິດທາງແຜນການໃນຕໍ່ໜ້າ ໃຫ້ຮູ້ວ່າ: ພາຍຫຼັງມີມະຕິຂອງຄະນະບໍລິຫານງານສູນກາງພັກ ວ່າດ້ວຍການປັບປຸງກົງຈັກການຈັດຕັ້ງ ແລະ ມະຕິຂອງສະພາແຫ່ງຊາດ ວ່າດ້ວຍການຮັບຮອງການປັບປຸງກົງຈັກການຈັດຕັ້ງຂອງ ລັດຖະບານ, ຄະນະພັກ-ຄະນະນໍາຂອງ ພບ ແລະ ອຄ ກໍແຕ່ງຕັ້ງຄະນະຮັບຜິດຊອບປັບປຸງກົງຈັກການຈັດຕັ້ງຂອງຕົນ, ພ້ອມທັງໄດ້ສະຫຼຸບ, ສັງລວມ ແລະ ຕີລາຄາ ການຈັດຕັ້ງປະຕິບັດວຽກງານຂອງກະຊວງຕົນ ໃນໄລຍະຜ່ານມາ ເພື່ອເປັນຖານຂໍ້ມູນ ໃນການຄົ້ນຄວ້າ ການປັບປຸງພາລະບົດບາດ, ສິດ, ໜ້າທີ່ ແລະ ໂຄງປະກອບກົງຈັກການຈັດຕັ້ງຂອງ ກະຊວງໃໝ່ ພາຍຫຼັງທີ່ໂຮມເຂົ້າກັນ. ຄະນະຜິດຊອບຂັ້ນກະຊວງ ແມ່ນປະກອບດ້ວຍ 3 ຄະນະຕົ້ນຕໍ ຄື: ຄະນະດ້ານເນື້ອໃນ, ຄະນະດ້ານບຸກຄະລາກອນ ແລະ ຄະນະດ້ານຊັບສິນ.

ຈາກນັ້ນ, ສະຫາຍ ພົນໂທ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງປ້ອງກັນຄວາມສະຫງົບ ຄະນະຮັບຜິດຊອບປັບປຸງກົງຈັກການຈັດຕັ້ງ ກໍໄດ້ຂຶ້ນຜ່ານນິຕິກຳຂອງຂັ້ນເທິງເປັນຕົ້ນແມ່ນ: ຄຳສັ່ງຂອງກົມການເມືອງສູນກາງພັກ ວ່າດ້ວຍການຍົກຍ້າຍ ສະຫາຍ ໂພໄຊ ໄຊຍະສອນ ໄປປະຈຳການຢູ່ ກະຊວງແຮງງານ ແລະ ສະຫວັດດີການສັງຄົມ; ລັດຖະດຳລັດຂອງປະທານປະເທດ ວ່າດ້ວຍການຍົກຍ້າຍ ສະຫາຍ ໂພໄຊ ໄຊຍະສອນ ເປັນລັດຖະມົນຕີກະຊວງແຮງງານ ແລະ ສະຫວັດດີການສັງຄົມ; ມະຕິຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງ ສະຫາຍ ມະໄລທອງ ກົມມະສິດ ເປັນເລຂາຄະນະບໍລິຫານງານພັກ ກະຊວງ ອຄ; ລັດຖະດຳລັດຂອງປະທານປະເທດ ວ່າດ້ວຍການແຕ່ງຕັ້ງ ສະຫາຍ ມະໄລທອງ ກົມມະສິດ ເປັນລັດຖະມົນຕີ ກະຊວງ ອຄ; ມະຕິຂອງຄະນະເລຂາທິການສູນກາງພັກວ່າດ້ວຍການສ້າງຕັ້ງອົງຄະນະພັກ ອຄ; ມະຕິຕົກລົງຂອງ ຄະນະເລຂາທິການສູນກາງພັກ ວ່າດ້ວຍການບົ່ງຕົວແຕ່ງຕັ້ງ ຄະນະບໍລິຫານງານພັກກະຊວງ ອຄ ປະກອບມີ 11 ສະຫາຍຄື: 1. ສະຫາຍ ມະໄລທອງ ກົມມະສິດ ຄະນະບໍລິຫານງານພັກ ຄະນະປະຈຳພັກ ເປັນເລຂາຄະນະພັກກະຊວງ; 2. ສະຫາຍ ຈັນສະແຫວງ ບຸນຍົງ ຄະນະບໍລິຫານງານພັກ ຄະນະປະຈຳພັກ ເປັນຮອງເລຂາຄະນະພັກກະຊວງ, 3. ສະຫາຍ ຈັນທະບູນ ສຸກອາລຸນ ຄະນະບໍລິຫານງານພັກ ເປັນຄະນະປະຈຳພັກກະຊວງ; 4. ສະຫາຍ ມະໂນທອງ ວົງໄຊ ກຳມະການຄະນະພັກ; 5. ສະຫາຍ ນາງ ແສງເດືອນ ວົງອິນ ກຳມະການຄະນະພັກ; 6. ສະຫາຍ ພຸດທະວັນ ນັນທະວົງ ກຳມະການຄະນະພັກ; 7. ສະຫາຍ ບົວວັນ ວິລະວົງ ກຳມະການຄະນະພັກ; 8. ສະຫາຍ ໄຊສົມເພັດ ນໍລະສິງ ກຳມະການຄະນະພັກ; 9. ສະຫາຍ ເພັດສະຫວັນ ລັດຕະນະທົງໄຊ ກຳມະການຄະນະພັກ; 10. ສະຫາຍ ໄຊຊະນະ ໄຊຍະກອນ ກຳມະການຄະນະພັກ ແລະ 11. ສະຫາຍ ອະພິສິດ ແສງສຸລິວົງ ກຳມະການຄະນະພັກ.

ຜ່ານແຈ້ງການຂອງ ຄະນະປັບປຸງກົງຈັກການຈັດຕັ້ງ ກ່ຽວກັບການຮັບຮອງກົງຈັກ ແລະ ບຸກຄະລາກອນຂອງ ກະຊວງ ອຄ ຄື: ແຕ່ງຕັ້ງ ສະຫາຍ ຈັນສະແຫວງ ບຸນຍົງ, ສະຫາຍ ຈັນທະບູນ ສຸກອາລຸນ ແລະ ສະຫາຍ ມະໂນທອງ ວົງໄຊ ເປັນຮອງລັດຖະມົນຕີ ອຄ; ແຕ່ງຕັ້ງ ສະຫາຍ ບົວວັນ ວິລະວົງ ເປັນຫົວໜ້າຫ້ອງການກະຊວງ; ສະຫາຍ ນາງ ແສງເດືອນ ວົງອິນ ເປັນຫົວໜ້າກົມຈັດຕັ້ງ ແລະ ພະນັກງານ; ສະຫາຍ ພຸດທະວັນ ນັນທະວົງ ເປັນຫົວໜ້າກົມກວດກາ; ສະຫາຍ ນາງ ສັນຕິສຸກ ພິມພະຈັນ ເປັນຫົວໜ້າກົມນະໂຍບາຍ, ແຜນພັດທະນາ ແລະ ປະເມີນຜົນ; ສະຫາຍ ບຸນເພັງ ສີບຸນເຮືອງ ເປັນຫົວໜ້າກົມອຸດສາຫະກຳປຸງແຕ່ງ; ສະຫາຍ ເພັດສະຫວັນ ລັດຕະນະທົງໄຊ ເປັນຫົວໜ້າກົມພະລັງງານ; ສະຫາຍ ບຸນຍົງ ສີດາວົງ ເປັນຫົວໜ້າກົມທໍລະນີສາດ ແລະ ບໍ່ແຮ່; ສະຫາຍ ໄຊຊະນະ ໄຊຍະກອນ ເປັນຫົວໜ້າກົມເຈລະຈາ ແລະ ຮ່ວມມືສາກົນ; ສະຫາຍ ສັນຕິສຸກ ພູນສະຫວັດ ເປັນຫົວໜ້າກົມ ການຄ້າພາຍໃນ; ສະຫາຍ ນາງ ກິ່ງສະດອນ ເພັດດາວເຮືອງ ເປັນຫົວໜ້າກົມການຄ້າຕ່າງປະເທດ; ສະຫາຍ ໄຊສົມເພັດ ນໍລະສິງ ເປັນຫົວໜ້າກົມ ຄຸ້ມຄອງຊັບສິນທາງປັນຍາ; ສະຫາຍ ສີສັງຄົມ ໂຄດໂຍທາ ເປັນຫົວໜ້າກົມມາດຕະຖານ ແລະ ວັດແທກ; ສະຫາຍ ອະພິສິດ ແສງສຸລິວົງ ເປັນຫົວໜ້າກົມຄຸ້ມຄອງວິສາຫະກິດ; ສະຫາຍ ນາງ ມະນີວອນ ວົງໄຊ ເປັນຫົວໜ້າກົມ ສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ແລະ ສະຫາຍ ອະນຸສັກ ພົງສະຫວັດ ເປັນຫົວໜ້າສະຖາບັນອຸດສາຫະກຳ ແລະ ພະລັງານ.

ກະຊວງ ອຄ ແມ່ນກົງຈັກການຈັດຕັ້ງໜຶ່ງຂອງລັດຖະບານ, ມີພາລະບົດບາດ ເປັນເສນາທິການໃຫ້ແກ່ລັດຖະບານ ໃນການຄຸ້ມຄອງມະຫາພາກ ລວມສູນ ກ່ຽວກັບວຽກງານ ອຸດ ສາຫະກຳ, ຫັດຖະກຳ, ພະລັງງານ, ທໍລະນີສາດ, ບໍ່ແຮ່, ການຄຸ້ມຄອງເຄມີ, ການຄ້າພາຍໃນ, ການຄ້າຕ່າງປະເທດ, ການຄ້າຜ່ານທາງເອເລັກໂຕຣນິກ, ການປົກປ້ອງຜູ້ຊົມໃຊ້, ການແຂ່ງຂັນທາງທຸລະກິດ, ການຄຸ້ມຄອງວຽກງານທະບຽນວິສາຫະກິດ, ການສົ່ງເສີມວິສາຫະກິດ, ຊັບສິນທາງປັນຍາ, ມາດຕະຖານ ແລະ ວັດແທກ ແລະ ການເຊື່ອມໂຍງເສດຖະກິດກັບພາກພື້ນ ແລະ ສາກົນ. ກະຊວງ ອຄ ມີ 30 ໜ້າທີ່ ແລະ 14 ຂອບເຂດສິດ ກ່ຽວກັບວຽກງານ ອຸດສາຫະກຳ, ການຄ້າ, ຊັບສິນທາງປັນຍາ, ມາດຕະຖານ-ວັດແທກ, ພະລັງງານ, ບໍ່ແຮ່ ແລະ ພັດທະນາວິສາຫະກິດ.

(ຂ່າວ: ຄໍາແສງ, ພາບ: ວຽງສະຫວັນ-ແອັບເປິ້ນ)