ທ່ານ ນາງ ວິໄລ ພິລາວົງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການບົ່ງຕົວແຕ່ງຕັ້ງ ຄະນະບໍລິຫານງານພັກ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ຊຶ່ງປະກອບດ້ວຍ ທ່ານ ບຸນເຖິງ ດວງສະຫວັນ ເປັນເລຂາຄະນະບໍລິຫານງານພັກ; ທ່ານ ວັນທະນາ ນໍລິນທາ ເປັນຮອງເລຂາຄະນະບໍລິຫານງານພັກ; ທ່ານ ນາງ ລັດຕະນາ ອິນທະພົນ ເປັນປະທານຄະນະກວດກາພັກ; ທ່ານ ພູວຽງ ເຫງົ້າພາສີ ເປັນຮອງປະທານຄະນະກວດກາພັກ ແລະ ທ່ານ ສຸລິຍາ ປວງປະດິດ ເປັນກຳມະການພັກ.
ພ້ອມນັ້ນ: ກໍໄດ້ຜ່ານດຳລັດ ຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ທ່ານ ວັນທະນາ ນໍລິນທາ ເປັນຫົວໜ້າຫ້ອງການ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ, ແລະ ຜ່ານຂໍ້ຕົກລົງຂອງຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ໃນການແຕ່ງຕັ້ງຮອງຫົວໜ້າຫ້ອງການ ຈຳນວນ 5 ທ່ານຄື: ທ່ານ ນາງ ລັດຕະນາ ອິນທະພົນ, ທ່ານ ພູວຽງ ເຫງົ້າພາສີ, ທ່ານ ສຸລິຍາ ປວງປະດິດ, ທ່ານ ນາງ ສຸພາພອນ ໄຊຍະເລີດ ແລະ ທ່ານ ນາງ ທະວີຈັນ ທ່ຽງເທບວົງສາ.
ຈາກນັ້ນ, ທ່ານ ບຸນເຖິງ ດວງສະຫວັນ ໄດ້ມີຄຳເຫັນໂອລົມຕໍ່ພິທີ ໂດຍໄດ້ເນັ້ນໜັກໃຫ້ ຫ້ອງການຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ເອົາໃຈໃສ່ໃນການປັບປຸງຄຸນນະພາບຂອງການເປັນເສນາທິການໃຫ້ແກ່ຂັ້ນເທິງໃນວຽກງານສົ່ງເສີມ ແລະ ຄຸ້ມຄອງການລົງທຶນ ໂດຍສະເພາະ ຕ້ອງປັບບັນດາຂອດຂັ້ນໃນການຄົ້ນຄວ້າຕໍ່ການສະເໜີຂໍລົງທຶນໃຫ້ມີຄວາມວ່ອງໄວ ແລະ ຮັບປະກັນຄຸນນະພາບ, ປັບປຸງວຽກງານໂຄສະນາດຶງດູດການລົງທຶນໃຫ້ມີຈຸດສຸມກວ່າເກົ່າ ເພື່ອດຶງດູດການລົງທຶນທີ່ມີຄຸນນະພາບ, ປັບປຸງວຽກງານການເຈລະຈາສັນຍາໃຫ້ມີຄວາມຮັບປະກັນກວ່າເກົ່າ ແລະ ເພີ່ມທະວີວຽກງານຊຸກຍູ້, ຕິດຕາມ ແລະ ກວດກາໂຄງການລົງທຶນໃຫ້ເປັນລະບົບຢ່າງຕໍ່ເນື່ອງ ໂດຍມີມາດຕະການຢ່າງ ເໝາະສົມ ແລະ ທັນເວລາ.
ຂ່າວ: ຄລທ
ຄໍາເຫັນ