ປະກາດການຈັດຕັ້ງອົງການປະຕິບັດຄຳຕັດສິນຂອງສານ ນະຄອນຫຼວງວຽງຈັນ

ເມື່ອບໍ່ດົນມານີ້ ທີ່ຫ້ອງປະຊຸມໃຫຍ່ພະແນກຍຸຕິທຳນະຄອນຫຼວງວຽງຈັນ ໄດ້ຈັດພິທີປະກາດການຈັດຕັ້ງອົງການປະຕິບັດຄຳຕັດສິນຂອງສານນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ໄພວີ ສີບົວລິພາ ກຳມະການສູນກາງພັກ ລັດຖະມົນຕີກະຊວງຍຸຕິທຳ ແລະ ທ່ານ ອາດສະພັງທອງ ສີພັນດອນ ກຳມະການສູນກາງພັັັັກ ເຈົ້າຄອງນະຄອນຫຼວງວຽງຈັນ, ມີຫົວໜ້າພະແນກ, ບັນດາກົມກ່ຽວຂ້ອງທີ່ຂຶ້ນກັບກະຊວງ ແລະ   ຫ້ອງການຍຸຕິທຳ  9 ເມືອງ ເຂົ້າຮ່ວມ.
     ທ່ານ ກອງສີ ສາຍສຸດທາ ຫົວໜ້າກົມຄຸ້ມຄອງການປະຕິບັດຄໍາຕັດສິນ ໄດ້ຂຶ້ນຜ່ານຂໍ້ຕົກລົງ ຂອງລັດຖະມົນຕີກະຊວງຍຸຕິທຳ ສະບັບເລກທີ 370/ກຍ, ລົງວັນທີ 23 ມີນາ 2024 ວ່າດ້ວຍການແຕ່ງຕັ້ງຫົວໜ້າກອງປະຕິບັດຄຳຕັດສິນຂອງສານປະຈຳນະຄອນຫຼວງວຽງຈັນ ຕົກລົງແຕ່ງຕັ້ງ ທ່ານ ລັດສະໜີ ເພັດລາວັນ ຮອງຫົວໜ້າກົມຄຸ້ມຄອງການປະຕິບັດຄຳຕັດສິນຂອງສານ ເປັນຫົວໜ້າກອງປະຕິບັດຄຳຕັດສິນຂອງສານ ປະຈຳນະຄອນຫຼວງວຽງຈັນ ພ້ອມດ້ວຍຮອງຫົວໜ້າກອງປະຕິບັດ ຈຳນວນໜຶ່ງ, ແຕ່ງຕັ້ງ ທ່ານ ສົມຈັນ ຈັນດາມະນີ ຫົວໜ້າຫ້ອງການຍຸຕິທຳເມືອງສີສັດຕະນາກ  ເປັນຫົວໜ້າຫ້ອງປະຕິບັດຄຳຕັດສິນຂອງສານ ປະຈຳເມືອງໄຊທານີ; ແຕ່ງຕັ້ງ ທ່ານ ນາງ ຂັນກາບ ພິມມະສອນ ຮອງຫົວໜ້າຫ້ອງການຍຸຕິທຳ ເມືອງນາຊາຍທອງ ເປັນຫົວໜ້າຫ້ອງປະຕິບັດຄຳຕັດສິນຂອງສານ ປະຈຳເມືອງນາຊາຍທອງ ພ້ອມດ້ວຍແຕ່ງຕັ້ງ ຫົວໜ້າ ແລະ ຮອງຫົວໜ້າໜ່ວຍງານຫ້ອງປະຕິບັດຄຳຕັດສິນຂອງສານ ແລະ ຍົກຍ້າຍ, ຊັບຊ້ອນ ພະນັກງານຈຳນວນໜຶ່ງຕື່ມອີກ. ຈາກນັ້ນ,  ທ່ານ ສີວິໄລ ທະວີສິນ ຮອງຫົວໜ້າກົມຄຸ້ມຄອງການປະຕິບັດຄຳຕັດສິນຂອງສານ ກໍໄດ້ລາຍງານສະພາບການຈັດຕັ້ງປະຕິບັດວຽກງານປະຕິບັດຄໍາຕັດສິນຂອງສານ ໃນໄລຍະຜ່ານມາວ່າ ການປັບປຸງອົງການຈັດຕັ້ງປະຕິບັດຄຳຕັດສິນຂອງສານ ໂດຍແຍກຈາກການຄຸ້ມຄອງຂອງສານປະຊາຊົນທ້ອງຖິ່ນ ມາຂຶ້ນກັບການຄຸ້ມຄອງຂອງຂະແໜງຍຸຕິທຳເປັນຕົ້ນມາ, ພັກ, ສະພາແຫ່ງຊາດ ແລະ ລັດຖະບານ ໂດຍສະເພາະ ກະຊວງຍຸຕິທຳ, ອົງການປົກຄອງທ້ອງຖິ່ນ ກໍໄດ້ເອົາໃຈໃສ່ ພ້ອມທັງສ້າງເງື່ອນໄຂ ແລະ ອຳນວຍຄວາມສະດວກຫຼາຍດ້ານຕໍ່ວຽກງານປະຕິບັດຄຳຕັດສີນຂອງສານ, ອົງການປະຕິບັດຄໍາຕັດສີນຂອງສານແມ່ນການຈັດຕັ້ງໜຶ່ງທີ່ຂຶ້ນກັບກະຊວງຍຸຕິທໍາ ຕາມສາຍຕັ້ງຊຶ່ງປະກອບມີ ກົມຄຸ້ມຄອງການປະຕິບັດຄຳຕັດສິນຂອງສານ, ກອງປະຕິບັດຄຳຕັດສິນຂອງສານ ປະຈຳແຂວງ, ນະຄອນຫຼວງ ແລະ ຫ້ອງປະຕິບັດຄຳຕັດສິນຂອງສານ ປະຈຳເມືອງ, ເທດສະບານ, ນະຄອນຫຼວງ. ນອກນັ້ນ, ທ່ານໄດ້ຍົກໃຫ້ເຫັນ ທີ່ຕັ້ງ, ພາລະບົດບາດ, ສິດ ແລະ ໜ້າທີ່, ຂອບເຂດສິດ, ໂຄງປະກອບການຈັດຕັ້ງ ແລະ ໜ້າທີ່ຂອງວຽກງານຕ່າງໆ, ຫຼັກການ ແລະ ແບບແຜນວິທີເຮັດວຽກ.  
     ທ່ານ  ໄພວີ ສີບົວລິພາ  ກໍໄດ້ມີຄຳເຫັນໂອ້ລົມຕໍ່ພະນັກງານທີ່ໄດ້ຮັບການແຕ່ງຕັ້ງ ແລະ ສັບຊ້ອນໃນຄັ້ງນີ້ ຈະຕ້ອງໄດ້ເອົາໃຈໃສ່ຕື່ມບາງບັນຫາດັ່ງນີ້ 1.) ສຶບຕໍ່ຄົ້ນຄວ້າປັບປຸງແບບແຜນວິທີການນຳພາ , ປັບປຸງແບບແຜນດ້ານຄວາມຮູ້ຄວາມສາມາດ , ສັບຊ້ອນພະນັກງານ-ລັດຖະກອນໃຫ້ຖືກຕ້ອງກັບໜ້າທີ່ວຽກງານຕົວຈິງ; 2.) ສືບຕໍ່ຊີ້ນຳ-ນຳພາການເມືອງ-ແນວຄິດ ໃຫ້ໜັກແໜ້ນ, ມີຫົວຄິດປະດິດສ້າງໃນການນຳພາ, ແກ້ໄຂບັນຫາຕ່າໆບົນພື້ນຖານການປະຕິບັດລະບອບປະຊາທິປະໄຕແບບລວມສູນ; 3.) ສູ້ຊົນນຳພາວຽກງານທີ່ຕົນຮັບຜິດຊອບໃຫ້ບັນລຸຕາມເປົ້າໜາຍ; 4.) ເຕົ້າໂຮມຄວາມສາມັກຄີຢູ່ພາຍໃນໃຫ້ໜັກແໜ້ນ; 5.) ກະກຽມສະຖານທີ່ເຮັດວຽກໃຫ້ເໝາະສົມ ແລະ ອຳນວຍຄວາມສະດວກໃນການເຮັດວຽກ.
ຂ່າວ-ພາບ: ນາງ ບຸນຖອມ ພະສະແຫວງ