ປະກາດສ້າງຕັ້ງຕາແສງ ບືງໄຊ ເປັນຕາແສງທຳອິດ ຂອງເມືອງ

ທ່ານ ບຸນສາ ຄ່ຽມມະນີຂັນໄຊ ປະທານຄະນະກຳມະການປົກຄອງເມືອງສາລະວັນ ໄດ້ລາຍງານການກຽມຄວາມພ້ອມຮອບດ້ານວ່າ: ຕາແສງ ບຶງໄຊ ມີເນື້ອທີ່ທັງໝົດ 43,827.6 ເຮັກຕາ, ກວມເອົາ 24 ບ້ານ ຄື: ບ້ານບຶງໄຊ, ນາໄຊຊ່ວຍ, ຫ້ວຍຫຼາດ, ບຶງຂາມ, ໜອງບົວນ້ອຍ, ພະນວນ, ຈານໃຕ້, ທົ່ງນາຄໍາ, ນາດອນບົງ, ໜອງໃສ, ນາຫີນໂລງ, ນາໂພເລີນ, ໂຄກສະຫວາດ, ໝອງໝໍ້, ວັງງົວ, ຜັກແພວທົ່ງ, ຈານວົງ, ຕົ້ງໃຫຍ່, ຜັກແພວເສັດ, ແກ້ງຂຸມ, ແກ້ງເປາະ, ຕົ້ງສິລິໄລ, ໜອງບູ່ຫີນ ແລະ ບ້ານຈານເໜືອ, ມີພົນລະເມືອງທັງໝົດ 23,565 ຄົນ, ມີ 26,061 ຄອບຄົວ, ມີ 3,730 ຫຼັງຄາເຮືອນ, ປະຊາຊົນສ່ວນໃຫຍ່ ເຮັດການຜະລິດກະສິກຳ ເປັນອາຊີບຫຼັກ ກວມເອົາ 80%, ອາຊີບຄ້າຂາຍ 19% ແລະ ອາຊີບອື່ນໆຈຳນວນໜຶ່ງ. ການສ້າງຕັ້ງຕາແສງ ບຶງໄຊ ໄດ້ມີການກໍານົດກົງຈັກການຈັດຕັ້ງຢ່າງລະອຽດ ເພື່ອຮັບປະກັນການເຄື່ອນໄຫວວຽກງານ, ແນໃສ່ປັບປຸງກົງຈັກການຈັດຕັ້ງ ແລະ ຍົກລະດັບປະສິດທິພາບການຄຸ້ມຄອງບໍລິຫານລັດໃຫ້ມີຄວາມເຂັ້ມແຂງ. ປະກອບມີ 27 ໜ່ວຍພັກຮາກຖານຂຶ້ນກັບ.

ໃນພິທີ, ໄດ້ມີການຜ່ານຂໍ້ຕົກລົງ ສະບັບເລກທີ 229/ຄປຂ, ວ່າດ້ວຍການສ້າງຕັ້ງຕາແສງ ບຶງໄຊ ແລະ ຂໍ້ຕົກລົງ ສະບັບເລກທີ 32,33 ແລະ 37 ວ່າດ້ວຍການແຕ່ງຕັ້ງ ທ່ານ ດາວອນ ເຄນຍານີ ກຳມະການພັກເມືອງ ເປັນປະທານ, ທ່ານ ພວງແກ້ວ ປະທຸມລິດ ແລະ ທ່ານ ຮທ ບົງຂຽນ ເສົາກົມກິ່ງແກ້ວ ເປັນຮອງປະທານ ຄະນະກໍາມະການປົກຄອງຕາແສງ ບຶງໄຊ.

ທ່ານ ປະເດີມພອນ ສົນທະນີ ໄດ້ເນັ້ນໃຫ້ຄະນະກໍາມະການປົກຄອງຕາແສງ ຈົ່ງຍົກສູງຄວາມຮັບຜິດຊອບໃນການຮັບໃຊ້ປະຊາຊົນ, ສ້າງຄວາມສາມັກຄີພາຍໃນ ແລະ ຜັນຂະຫຍາຍແນວທາງນະໂຍບາຍຂອງພັກ-ລັດ ໃຫ້ເຂົ້າເຖິງຮາກຖານຢ່າງທົ່ວເຖິງ.ຈາກນັ້ນ, ໄດ້ມີພິທີຕັດແຖບຜ້າ, ເປີດປ້າຍສຳນັກງານ ຄະນະກໍາມະການປົກຄອງຕາແສງ ບຶງໄຊ ຢ່າງເປັນທາງການ ແລະ ລັ່ນຄ້ອງ 9 ບາດ.

(ຂ່າວ-ພາບ: ວິໄລວອນ ສິດທິໄຊ)