 |
ທ່ານ ອິນເນດ ຂຽວສີຟ້າ ປະທານຄະນະກຳມະການປົກຄອງເມືອງ ໄດ້ບົດລາຍງານຄວາມພ້ອມ ໃນການປະກາດສ້າງຕັ້ງຕາແສງສາມັກຄີໄຊ ຢູ່ເມືອງເງິນ, ຊຶ່ງຕັ້ງຢູ່ທາງທິດເໜືອຂອງເມືອງເງິນ ຫ່າງຈາກຫ້ອງວ່າການເມືອງເງິນ 25 ກິໂລແມັດ ຄື: ທິດເໜືອ ຕິດກັບແມ່ນ້ຳຂອງ ເມືອງປາກແບງ ແຂວງອຸດົມໄຊ, ທິດໃຕ້ ຕິດກັບຕາແສງເງິນມີໄຊ, ທິດຕາເວັນອອກ ຕິດກັບຕາແສງສິນໄຊ ແລະ ເມືອງຫົງສາ ແລະ ທາງທິດຕາເວັນຕົກ ຕິດກັບເມືອງຊຽງຮ່ອນ. ມີເນື້ອທີ່ທັງໝົດ 37,093 ເຮັກຕາ; ປະກອບມີ 9 ບ້ານຄື: ບ້ານທອງ, ນ້ຳວັນ, ນ້ຳທົນ, ຫ້ວຍເຜີ້ງ, ດອກເກດ, ຜາແດງ, ໂຮມໄຊ, ປາກແຄນ ແລະ ບ້ານຫ້ວຍເງີຍ. ມີ 120 ໜ່ວຍຄຸ້ມຄອງພົນລະເມືອງ, ມີ 1,418 ຄອບຄົວ, ມີພົນລະເມືອງ 8,294 ຄົນ ຍິງ 4.062 ຄົນ. ປະກອບມີ 4 ເຜົ່າຄື: ເຜົ່າມົ້ງ 2,635 ຄົນ ຍິງ 1,264 ຄົນ ກວມເອົາ 29.58%, ເຜົ່າກືມມຸ 5,361 ຄົນ ຍິງ 2,673 ຄົນ ກວມເອົາ 67.84%, ເຜົ່າລາວ 238 ຄົນ, ຍິງ 98 ຄົນ ກວມເອົາ 1.89%, ເຜົ່າລື້ 53 ຄົນ ຍິງ 22 ຄົນ ກວມເອົາ 0.68%.
 |
ທ່ານ ນາງສີຈົມ ບູນມານະທຳ ຮອງເລຂາພັກເມືອງ ຂຶ້ນຜ່ານມະຕິຕົກລົງຂອງຄະນະບໍລິຫານງານພັກເມືອງ ວ່າດ້ວຍການສ້າງຕັ້ງອົງຄະນະພັກຮາກຖານຕາແສງສາມັກຄີໄຊ, ຜ່ານມມະຕິຕົກລົງ ວ່າດ້ວຍການສ້າງຕັ້ງໜ່ວຍພັກຕາແສງ ທີ່ຂຶ້ນກັບອົງຄະນະພັກຮາກຖານຕາແສງສາມັກຄີໄຊ, ຜ່ານມະຕິຕົກລົງ ວ່າດ້ວຍການບົ່ງຕົວແຕ່ງຕັ້ງຄະນະບໍລິຫານງານພັກຮາກຖານຕາແສງ, ເລຂາ, ຮອງເລຂາ, ຄະນະບໍລິຫານງານພັກຮາກຖານຕາແສງສາມັກຄີໄຊ, ຜ່ານຂໍ້ຕົກລົງຂອງຄະນະກຳມະການປົກຄອງເມືອງ ວ່າດ້ວຍການແຕ່ງຕັ້ງປະທານ ແລະ ຮອງປະທານ ຄະນະກຳມະການປົກຄອງຕາແສງສາມັກຄີໄຊ.
ຕອນທ້າຍ, ຄະນະປະທານພ້ອມດ້ວຍແຂກທີ່ເຂົ້າຮ່ວມ ໄດ້ຮ່ວມກັນຕັດແຖບຜ້າ, ລັ່ນຄ້ອງ 9 ບາດ ແລະ ເປີດປ້າຍສຳນັກງານຄະນະກໍາມະການປົກຄອງຕາແສງສາມັກຄີໄຊຢ່າງເປັນທາງການ.
(ຂ່າວ-ພາບ: ອິນແປງ ແຫວນຄຳ)
ຄໍາເຫັນ