ພິທີປະກາດການແຕ່ງຕັ້ງຮອງປະທານ, ຜູ້ປະຈໍາການ, ກຳມະການ, ຄະນະກຳມະການປ້ອງກັນຊາດ(ປກຊ)-ປ້ອງກັນຄວາມສະຫງົບ(ປກສ) ແຂວງຫຼວງພະບາງໄດ້ຈັດຂຶ້ນໃນວັນທີ 22 ພະຈິກຜ່ານມາທີ່ສະໂມສອນກອງບັນຊາການທະຫານແຂວງໂດຍການເປັນປະທານຂອງທ່ານ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ, ມີຄະນະກຳມະການປ້ອງກັນຊາດແຂວງ, ຕາງໜ້າການນໍາແຂວງທີ່ກ່ຽວຂ້ອງເຂົ້າຮ່ວມ.
ທ່ານ ພົນຈັດຕະວາ ວິລ່ຽມ ວົງທິສານ ຫົວໜ້າການທະຫານກອງບັນຊາການທະຫານແຂວງໄດ້ຂຶ້ນລາຍງານການປະຕິບັດໜ້າທີ່ວຽກງານໃນໄລຍະຜ່ານມາ. ຈາກນັ້ນ, ທ່ານ ພັນເອກ ຄໍາຜິວ ມະນີວົງ ຮອງຫົວໜ້າຫ້ອງການ ປກຊ-ປກສ ສູນກາງ ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງທ່ານ ພົນຈັດຕະວາ ວິລ່ຽມ ວົງທິສານ ເປັນຮອງປະທານທັງເປັນຜູ້ປະຈໍາການ; ແຕ່ງຕັ້ງທ່ານ ພົນຈັດຕະວາ ຕູ່ຊົ່ງ ປັດໄຈ ເປັນຮອງປະທານ; ທ່ານ ເພັງ ຄໍາມະວົງ; ທ່ານ ພັນເອກ ສີວິໄຊ ເພັງສັນຕິສຸກ ແລະ ທ່ານ ພັນເອກ ຄໍາເພົ້າ ເດດບັນດິດ ເປັນກຳມະການ.
ໂອກາດນີ້, ທ່ານ ພົນຕີ ຈັນທອງ ສອນຕະອາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາພ້ອມທັງມີຄໍາເຫັນໂອ້ລົມໃຫ້ທິດຊີ້ນໍາເພື່ອເປັນແນວທາງ ແລະບ່ອນອີງໃຫ້ແກ່ຄະນະກຳມະການ ປກຊ-ປກສ ແຂວງໃນການຈັດຕັ້ງປະຕິບັດໜ້າທີ່ວຽກງານເພື່ອສືບຕໍ່ປົກປັກຮັກສາເຮັດໃຫ້ສະພາບພາຍໃນທົ່ວແຂວງ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ, ຊີວິດການເປັນຢູ່ຂອງປະຊາຊົນພາຍໃນແຂວງໄດ້ຮັບການພັດທະນານັບມື້ດີຂຶ້ນເປັນກ້າວໆ.
ຂ່າວ-ພາບ: ບຸນເພັງ ວົງແກ້ວມະນີ
ຄໍາເຫັນ