ປະກອບຄໍາເຫັນໃສ່ການປັບປຸງລັດຖະບັນຍັດວ່າດ້ວຍການໃຫ້ອະໄພຍະໂທດ

ທ່ານ ບົວລີ ເພັດມີໄຊ ຫົວໜ້າຕິດຕາມກວດກາຄ້າຍຄຸມຂັງ-ດັດສ້າງ ຮອງຫົວໜ້າກອງເລຂາຄະນະກຳມະ ການອະໄພຍະໂທດລະດັບຊາດ ໄດ້ໃຫ້ຮູ້ກ່ຽວກັບຜົນການປັບປຸງລັດຖະບັນຍັດ ວ່າດ້ວຍການອະໄພຍະໂທດໃນໄລຍະຜ່ານມາ ເພື່ອເປັນພື້ນຖານສືບຕໍ່ຄົ້ນຄວ້າປະກອບຄໍາເຫັນ ໃສ່ການປັບປຸງລັດຖະບັນຍັດວ່າດ້ວຍການໃຫ້ອະໄພຍະໂທດໃຫ້ມີເນື້ອໃນຄົບຖ້ວນສົມບູນ ແລະ ສາມາດຈັດຕັ້ງປະຕິບັດໄດ້. ພ້ອມນີ້, ຜູ້ເຂົ້າຮ່ວມກອງປະຊຸມໄດ້ສຸມສະຕິປັນຍາປະກອບຄໍາເຫັນດ້ວຍຄວາມຮັບຜິດຊອບສູງ, ຢ່າງມີຈຸດສຸມ ແລະ ສະເໜີວິທີການແກ້ໄຂທີ່ຈະແຈ້ງເພື່ອເປັນພື້ນຖານໃຫ້ຄະນະຮັບຜິດຊອບນໍາໄປປັບປຸງລັດຖະບັນຍັດວ່າດ້ວຍການໃຫ້ອະໄພຍະໂທດໃຫ້ມີເນື້ອໃນຄົບຖ້ວນສົມບູນກວ່າເກົ່າ.

ໃນໂອກາດນີ້, ປະທານກອງປະຊຸມ ຍັງໄດ້ຮຽກຮ້ອງມາຍັງຄະນະຮັບຜິດຊອບໃຫ້ເອົາໃຈໃສ່ບາງວຽກງານທີ່ສໍາຄັນ ໂດຍສະເພາະມອບໃຫ້ກອງເລຂາສັງລວມສັບຊ້ອນເນື້ອໃນເຂົ້າໃສ່ຮ່າງລັດຖະບັນຍັດວ່າດ້ວຍການໃຫ້ອະໄພຍະໂທດສະບັບປັບປຸງໃໝ່ໃຫ້ຄົບຖ້ວນຕາມການປະກອບຄໍາເຫັນຂອງກອງປະຊຸມ ແລະ ມອບໃຫ້ຄະນະປັບປຸງສືບ ຕໍ່ຄົ້ນຄວ້າຄືນກ່ຽວກັບການປັບປຸງໂຄງຮ່າງຂອງລັດຖະບັນຍັດວ່າດ້ວຍການໃຫ້ອະໄພຍະໂທດສະບັບເລກທີ 001/ປປທ, ລົງວັນທີ 20 ມີນາ 2018 ເພື່ອນໍາເຂົ້າສູ່ກອງປະຊຸມໃນຄັ້ງຕໍ່ໄປ. ຂ່າວ-ພາບ: ອອປສ