ປາກຊັນ ສ້າງກິດຈະກໍາຂະບວນການປູກຈິດສໍານຶກໃນການອະນາໄມ ແລະ ຄຸ້ມຄອງສິ່ງເສດເຫຼືອ

ທີ່ຂຶ້ນກັບພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງບໍລິຄໍາໄຊ ໄດ້ສົມທົບກັບຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງປາກຊັນ ສ້າງກິດຈະກໍາຂະບວນການປູກຈິດສໍານຶກໃນການອະນາໄມ, ຄຸ້ມຄອງສິ່ງເສດເຫຼືອ ແລະ ພຶດບຸກລຸກຕາມສາຍນໍ້າ ແລະ ຂອບເຂດທີ່ດິນບໍລິເວນນໍ້າ ທີຕິດຈອດກັບສາຍນໍ້າຫ້ວຍປຶງ (ສາຍນໍ້າຫ້ວຍເຜີ້ງ), ເຂົ້າຮ່ວມມີ ທ່ານ ອິນປັນ ລໍມະນີ ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງປາກຊັນ ທັງເປັນຄະນະກຳມະການຂັ້ນແຂວງໂຄງການດັ່ງກ່າວ, ມີບັນດາອໍານາດການປົກຄອງ ແລະ ພໍ່ແມ່ປະຊາຊົນບ້ານນາສົ້ມມໍ, ບ້ານສີນໄຊ ຕະຫຼອດຮອດຄູ-ອາຈານ ແລະ ນ້ອງນັກຮຽນ ມັດທະຍົມຕົ້ນສີນໄຊ ເຂົ້າຮ່ວມ.
ການສ້າງຂະບວນການໃນຄັ້ງນີ້, ກໍເພື່ອເປັນການປູກຈິດສໍານຶກໃນການຄຸ້ມຄອງສິ່ງເສດເຫຼືອ, ຂັດແຍກຂີ້ເຫຍື້ອ ໃຫ້ຖຶກວິທີ ເພື່ອປ້ອງກັນບໍ່ໃຫ້ຖີ້ມລົງສູ້ຂອບເຂດທີ່ດິນບໍລິເວນແຫຼ່ງນໍ້າທໍາມະຊາດ ເພື່ອຈະສ້າງຄວາມເປີເປື້ອນ ແລະ ການອຸດຕັນໃນການໄຫຼຂອງນໍ້າ, ເພື່ອບໍ່ໃຫ້ມີນໍ້າຖ້ວມຂັງໃນເວລາຝົນຕົກ ແລະ ເກີດມີໄພນໍ້າຖ້ວມ. ນອກຈາກນີ້ ກໍເພື່ອແນ່ໃສ່ເຮັດໃຫ້ພໍ່ແມ່ປະຊາຊົນມີສະຕິລະວັງຕົວ, ມີຄວາມເປັນເຈົ້າການ ຮ່ວມກັນທໍາລາຍພຶດບຸກລຸກປະເພດຕ່າງໆ ເພື່ອບໍ່ໃຫ້ແຜ່ລາມໄປສູ້ວົງກວ້າງ ໃນນີ້ກໍເພື່ອເຮັດໃຫ້ຂອບເຂດທີ່ດິນບໍລິເວນນໍ້າແຫຼ່ງນໍ້າດັ່ງກ່າວ ໃຫ້ມີຄວາມອຸດົມສົມບູນ ແລະ ເຕັມໄປດ້ວຍຄວາມສວຍສົດງົດງາມ ມີຄວາມຫຼາກຫຼາຍທາງດ້ານຊິວະນາໆພັນ ເຮັດໃຫ້ສະຖານທີ່ດັ່ງກ່າວເປັນບ່ອນຢູ່ອາໃສ ແລະ ເປັນບ່ອນຂະຫຍາຍພັນຂອງສັດນໍ້າ-ສັດປ່າ ເຮັດໃຫ້ພໍ່ແມ່ປະຊາຊົນບັນດາເຜົ່າ ພ້ອມກັນເປັນເຈົ້າການອະນຸລັກສັດນໍ້າ-ສັດປ່າ ໃຫ້ມີຄວາມຍືນຍົງຕະຫຼອດໄປ.
(ຂ່າວ-ພາບ: ວຽງສະຫວັນ)