ປາຖະກະຖາວັນລັດຖະທໍາມະນູນ ແລະ ວັນຢຶດອຳນາດ

ສະຫາຍ ສົມສະຫວາດ ເລັ່ງສະຫວັດ ໄດ້ກ່າວປາຖະກະຖາວັນຢຶດອຳນາດ ໂດຍໄດ້ຍົກໃຫ້ເຫັນປະຫວັດຄວາມເປັນມາຂອງການຢຶດອຳນາດ ໂດຍໃນຄວາມເປັນຈິງແລ້ວການຢຶດອຳນາດເດືອນສິງຫາ ຊຶ່ງໄດ້ມີ 2 ຄັ້ງ ຄື: ຄັ້ງທີ 1 ໃນວັນທີ 23 ສິງຫາ 1945 ຊຶ່ງພາຍໃຕ້ການນໍາພາຂອງຄະນະພັກແຄວ້ນລາວ ໂດຍມີພັກກອມມູນິດອິນດູຈີນ ຊີ້ນໍາ-ນໍາພາໂດຍລວມໃນໄລຍະນັ້ນ ທີ່ໄດ້ຕໍ່ສູ້ເອົາຊະນະພວກລ່າເມືອງຂຶ້ນແບບເກົ່າ; ຄັ້ງທີ 2 ກໍຄືໃນວັນທີ 23 ສິງຫາ 1975 ພາຍໃຕ້ການຊີ້ນໍາ-ນໍາພາຂອງພັກປະຊາຊົນລາວ ກໍຄືພັກປະຊາຊົນ ປະຕິວັດລາວ ໃນປັດຈຸບັນ ຊຶ່ງໄລຍະນັ້ນພັກເຮົາ ໄດ້ນໍາພາປະຊາຊົນລາວບັນດາເຜົ່າ ຕໍ່ສູ້ກັບພວກລ່າເມືອງຂຶ້ນແບບໃໝ່ ແລະ ລູກແຫຼ້ງຕີນມືຂອງເຂົາເຈົ້າ ຢ່າງດຸເດືອດຂ້ຽວຂາດ ເຕັມໄປດ້ວຍຄວາມເສຍສະຫຼະ, ພິລະອາດຫານ ແລະ ມີກຽດສະຫງ່າ ສາມາດຕໍ່ສູ້ຍາດເອົາໄຊຊະນະຂັ້ນສຸດທ້າຍ ດ້ວຍການນໍາໃຊ້ 3 ບາດຄ້ອນຍຸດທະສາດຄື: ການລຸກຮືຂຶ້ນຂອງມະຫາຊົນ, ການໜູນໜີບຂອງກຳລັງປະກອບອາວຸດປະຕິວັດ, ການແຍກຕົວອອກຂອງກໍາລັງທະຫານຂອງສັດຕູ; ມາໃນວັນທີ 23 ສິງຫາ 1975 ທີ່ວຽງຈັນ ປະຊາຊົນຫຼາຍກວ່າ 20,000 ຄົນ ໄດ້ໂຮມຊຸມນຸມ ເພື່ອຕ້ອນຮັບການປະກາດສ້າງຕັ້ງອໍານາດການປົກຄອງປະຕິວັດຢູ່ວຽງຈັນ ແລະ ທັງໝົດແຕ່ຂັ້ນແຂວງ ລົງຮອດທ້ອງຖິ່ນຮາກຖານ ແລະ ໃນວັນທີ 2 ທັນວາ 1975 ກອງປະຊຸມໃຫຍ່ຜູ້ແທນທົ່ວປະເທດ ໄດ້ເປີດຂຶ້ນ, ກອງປະຊຸມໄດ້ເປັນເອກະສັນກັນຜ່ານບັນດາມະຕິອັນເປັນປະຫວັດສາດ ຕົກລົງລຶບລ້າງລະບອບຣາຊາທິປະໄຕ ແລະ ສະຖາປະນາລະບອບ ສາທາລະນະລັດ ປະຊາທິປະໄຕ ປະຊາຊົນ ເປັນປະເທດ ສປປ ລາວ ຢ່າງສະຫງ່າຜ່າເຜີຍ. ພ້ອມດຽວກັນນີ້, ກໍໄດ້ເນັ້ນບາງຈຸດສຳຄັນ ເພື່ອໃຫ້ຜູ້ເຂົ້າຮ່ວມ ສືບຕໍ່ເສີມຂະຫຍາຍມູນເຊື້ອ 23 ສິງຫາ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ຈາກນັ້ນ, ສະຫາຍ ສົມສະຫວາດ ເລັ່ງສະຫວັດ ກໍໄດ້ສືບຕໍ່ປາຖະກະຖາວັນລັດຖະທໍາມະນູນ ຊຶ່ງໄດ້ຍົກໃຫ້ເຫັນຄວາມໝາຍສຳຄັນຂອງລັດຖະທໍາມະນູນ ແລະ ຄວາມເປັນມາຂອງວັນລັດຖະທໍາມະນູນ ແຫ່ງ ສປປ ລາວ ກໍຄືການສ້າງ ແລະ ປັບປຸງລັດຖະທໍາມະນູນ ນັບແຕ່ການສ້າງລັດຖະທໍາມະນູນສະບັບທໍາອິດ ໂດຍໄດ້ເລີ່ມສ້າງມາແຕ່ປີ 1989 ຜ່ານການຄົ້ນຄວ້າ ແລະ ສ້າງໃນໄລຍະ 3 ປີ ກໍໄດ້ຖືກຮັບຮອງເອົາໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນສູງສຸດ ຊຸດທີ II ໃນວາລະປະຊຸມ ວັນທີ 14 ສິງຫາ 1991 ແລະ ປະທານປະເທດ ແຫ່ງ ສປປ ລາວ ໄດ້ອອກລັດຖະດໍາລັດ ປະກາດໃຊ້ ສະບັບທີ 55/ປທ ປທ, ລົງວັນທີ 15 ສິງຫາ 1991 ຊຶ່ງເປັນຂີດໝາຍປະຫວັດສາດທີ່ສຳຄັນ ໃນການຫັນປ່ຽນຈາກການຄຸ້ມຄອງລັດ, ຄຸ້ມຄອງສັງຄົມ ດ້ວຍແນວທາງ, ມະຕິ, ຄໍາສັ່ງຂອງລັດເຮົາ ໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ; ໝາຍວ່າ ໄດ້ຫັນໄປສູ່ການສ້າງລັດເຮົາ ໃຫ້ກາຍເປັນລັດທີ່ປົກຄອງດ້ວຍກົດໝາຍ. ຜ່ານການຈັດຕັ້ງປະຕິບັດລັດຖະທໍາມະນູນ ສະບັບທໍາອິດ ເປັນເວລາ 12 ປີ ແລະ ເພື່ອຕອບສະໜອງຄວາມຮຽກຮ້ອງຕ້ອງການໃນການປະຕິບັດແນວທາງປ່ຽນແປງໃໝ່ຮອບດ້ານ ມີຫຼັກການຂອງພັກ ເຂົ້າສູ່ລວງເລິກ ກໍໄດ້ມີການປັບປຸງລັດຖະທໍາມະນູນ ໃນປີ 2003 ແລະ ປັບປຸງໃນປີ 2015. ມາຮອດປີ 2025, ກໍໄດ້ມີການປັບປຸງລັດຖະທໍາມະນູນ ເປັນຄັ້ງທີ 3 ເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ; ມະຕິ 05/ຄບສພ, ລົງວັນທີ 5 ກັນຍາ 2023 ວ່າດ້ວຍສືບຕໍ່ຍູ້ແຮງການຜັນຂະຫາຍແນວທາງປ່ຽນແປງໃໝ່ ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນໍາພາຂອງພັກ; ມະຕິ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່. ພ້ອມນີ້, ກໍຍັງໄດ້ໃຫ້ຮູ້ເຖິງການຕີລາຄາການຈັດຕັ້ງປະຕິບັດລັດຖະທໍາມະນູນ ໃນຕະຫຼອດໄລຍະ 34 ປີ ຜ່ານມາ ໃນດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້. ນອກນີ້, ກໍຍັງໃຫ້ຮູ້ເຖິງເນື້ອໃນສຳຄັນຂອງລັດຖະທໍາມະນູນ ສະບັບປັບປຸງ ປີ 2025.

(ຂ່າວ-ພາບ: ສຸກສະຫວັນ)