ປາຖະກະຖາວັນສະຖາປະນາ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ຄົບຮອບ 78 ປີ

ໃຫ້ກຽດເຂົ້າຮ່ວມມີ ສະຫາຍ ນາງ ວິລະວອນ ພັນທະວົງ ຮອງປະທານກໍາມາທິການວັດທະນະທຳສັງຄົມ ແລະ ບັນດາເຜົ່າ ສະພາແຫ່ງຊາດ ຮອງປະທານສະມາຄົມມິດຕະພາບລາວ - ສປປ ເກົາຫຼີ; ສະຫາຍ ລີ ຢົງ ຊົນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ; ສະຫາຍ ເພັດສົມພອນ ແສນສີ ຮອງເລຂາຄະນະບໍລິຫານງານພັກເມືອງ ປະທານຄະນະກຳມະການປົກຄອງເມືອງໄຊທານີ; ຄະນະກົມ, ຄະນະພະແນກ, ພະນັກງານ, ນາຍ ແລະ ພົນຕໍາຫຼວດ ແລະ ແຂກມາຈາກພາກສ່ວນທີ່ກ່ຽວຂ້ອງ ຈໍານວນ ປະມານ 400 ກວ່າສະຫາຍເຂົ້າຮ່ວມ; ໃນພິທີດັ່ງກ່າວໄດ້ມີການ ວາງສະແດງຮູບພາບ, ສາຍວີດີໂອ ແລະ ກ່າວປາຖະກະຖາກ່ຽວກັບສະພາບການພັດທະນາເສດຖະກິດ-ສັງຄົມ, ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ສປປ ເກົາຫຼີ ໃນໄລຍະທີ່ຜ່ານມາ ແລະ ປັດຈຸບັນ, ພ້ອມນີ້ ກໍຍັງມີການສະແດງສິລະປະ ຕື່ມອີກ.

ໃນພິທີປາຖະກະຖາຄັ້ງນີ້, ສະຫາຍ ລີ ຢົງ ຊົນ, ໄດ້ໃຫ້ກຽດຂຶ້ນກ່າວປາຖະກະຖາ ຊຶ່ງໄດ້ຍົກໃຫ້ເຫັນເຖິງບົດບາດການນໍາພາໆລະກິດປະຕິວັດຕໍ່ສູ້ກູ້ຊາດ ເພື່ອກອບກູ້ເອົາເອກະລາດແຫ່ງຊາດ, ປົກປັກຮັກສາ ແລະ ສ້າງສາພັດທະນາ ສປປ ເກົາຫຼີ ບົນເສັ້ນທາງສູ່ຈຸດໝາຍສັງຄົມນິຍົມໃນແຕ່ລະໄລຍະຂອງພັກແຮງງານເກົາຫຼີ ອັນມີ ປະທານ ກິມ ອິນ ຊຸງ ຜູ້ນໍາທີ່ຍິ່ງໃຫຍ່ ປະທານປະເທດຕະຫຼອດການ ແຫ່ງ ສປປ ເກົາຫຼີ ແລະ ຜູ້ນຳພາແສງສະຫວ່າງ ແນວຄິດຈຸດເຊ ແລະ ສະຫາຍ ກິມ ເຈິງ ອິນ ຜູ້ນໍາທີ່ຍິ່ງໃຫຍ່ ເລຂາທິການໃຫຍ່ພັກແຮງງານເກົາຫຼີຕະຫຼອດການ ປະທານຄະນະກໍາມາທິການປ້ອງກັນຊາດ ແຫ່ງ ສປປ ເກົາຫຼີ ຕະຫຼອດການຂອງປະຊາຊົນ ສປປ ເກົາຫຼີ ເປັນແກນນໍາໄລຍະຜ່ານມາ ແລະ ສະຫາຍ ກິມ ເຈິງ ອຸນ ຜູ້ນໍາທີ່ເຄົາລົບຮັກ ເລຂາທິການໃຫຍ່ພັກແຮງງານເກົາຫຼີ ປະທານກິດຈະການແຫ່ງລັດແຫ່ງ ສປປ ເກົາຫຼີ ຜູ້ບັນຊາການສູງສຸດກໍາລັງປະກອບອາວຸດແຫ່ງ ສປປ ເກົາຫຼີ ຂອງປະຊາຊົນ ສປປ ເກົາຫຼີ ເປັນແກນນໍາໃນປັດຈຸບັນ. ນອກຈາກນີ້ ກໍໄດ້ຍົກໃຫ້ເຫັນເຖິງສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ສປປ ເກົາຫຼີ ທີ່ໄດ້ຮັບການເສີມຂະຫຍາຍ ແລະ ພັດທະນາເພີ່ມພູນຄູນສ້າງຢ່າງບໍ່ຢຸດຢັ້ງ.

(ຂ່າວ: ແສງຈັນ)