ທ່ານ ໂຈເຊ ຣາໂມສ ອໍຕ້າ ປະທານາທິບໍດີ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ພ້ອມດ້ວຍຄະນະ ໄດ້ຢ້ຽມຢາມ ເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ໃນວັນທີ 1 ມີນານີ້, ໃນໂອກາດທີ່ເດີນທາງມາຢ້ຽມຢາມທາງລັດຖະກິດຢູ່ ສປປ ລາວ ໃນລະຫວ່າງວັນທີ 27 ກຸມພາ ຫາ ວັນທີ 2 ມີນາ 2024.
ໂອກາດດັ່ງກ່າວ, ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ລາຍງານສະພາບລວມການພັດທະນາເຂດເສດຖະກິດພິເສດ ຢູ່ ນະຄອນຫຼວງວຽງຈັນ ປະກອບມີ 5 ເຂດເສດຖະກິດພິເສດ ຄື: ເຂດພັດທະນາກວມລວມໄຊເຊດຖາ, ເຂດເສດຖະກິດພິເສດ ບຶງທາດຫຼວງ, ເຂດເສດຖະກິດພິເສດ ລ່ອງແທ່ງ-ວຽງຈັນ, ເຂດເສດຖະກິດພິເສດ ດົງໂພສີ ແລະ ເຂດໂລຈີສຕິກ ນະຄອນຫຼວງວຽງຈັນ, ມີເນື້ອທີ່ທັງໝົດ 2.360 ເຮັກຕາ ຕາມສັນຍາສຳປະທານ.
ມາຮອດປັດຈຸບັນ, ສາມາດດຶງດູດການລົງທຶນຈາກພາຍໃນ ແລະ ຕ່າງປະເທດໄດ້ທັງໝົດ 229 ບໍລິສັດ, ມີແຜນການລົງທຶນທັງໝົດ 6 ພັນລ້ານໂດລາ, ມີທຶນຈົດທະບຽນ 950 ລ້ານໂດລາ, ມີການລົງທຶນຕົວຈິງມູນຄ່າ 3 ພັນລ້ານໂດລາ, ປະຕິບັດພັນທະເຂົ້າງົບປະມານຂອງລັດໄດ້ທັງໝົດ 278 ຕື້ກີບ, ສາມາດສ້າງວຽກເຮັດງານທໍາໄດ້ 9.623 ຄົນ, ສົ່ງອອກສິນຄ້າມູນຄ່າ 350 ລ້ານໂດລາ, ໃນນັ້ນ, ສິນຄ້າທີ່ສົ່ງອອກປະກອບມີ: ເຄື່ອງເອເລັກໂຕຣນິກ, ເຄື່ອງນຸ່ງຫົ່ມ, ຜະລິດຕະພັນການແພດ, ຜະລິດຕະພັນດອກໄຟແສງສະຫວ່າງ, ແຜ່ນໂຊລ້າແຊວ, ຜະລິດຕະພັນເຄື່ອງດື່ມ, ອາຫານ ແລະ ອື່ນໆ. ສ່ວນການນໍາເຂົ້າສິນຄ້າມູນຄ່າ 3,6 ພັນລ້ານໂດລາ ໃນນັ້ນ, ປະກອບມີ: ປະເພດເຄື່ອງຈັກ, ວັດຖຸອຸປະກອນ, ວັດຖຸດິບ ທີ່ນຳໃຊ້ເຂົ້າການກໍ່ສ້າງພື້ນຖານໂຄງລ່າງ, ຕຶກອາຄານ, ໂຮງງານ, ທຳການຜະລິດປຸງແຕ່ງ, ແປຮູບ ຈຳໜ່າຍພາຍໃນ ແລະ ສົ່ງອອກຕ່າງປະເທດ.
ສຳລັບ ເຂດພັດທະນາກວມລວມໄຊເຊດຖາ ແມ່ນໂຄງການຮ່ວມທຶນ ລະຫວ່າງ ອົງການປົກຄອງນະຄອນຫຼວງວຽງຈັນ ຕາງໜ້າລັດຖະບານ ສປປ ລາວ ແລະ ບໍລິສັດລົງທຶນຕ່າງປະເທດແຂວງຢຸນນານ ຕາງໜ້າລັດຖະບານ ສປ ຈີນ ໂດຍມີເປົ້າໝາຍເພື່ອພັດທະນາແບບກວມລວມຄົບວົງຈອນ ທີ່ປະກອບດ້ວຍເຂດອຸດສາຫະກຳທັນສະໄໝ, ເຂດການຄ້າ, ການບໍລິການ, ເຂດການຂົນສົ່ງ ແລະ ເຂດຕົວເມືອງ ໃໝ່ ຂອງນະຄອນຫຼວງວຽງຈັນ.
ມາເຖິງປັດຈຸບັນ ມີວິສາຫະກິດ ເຂົ້າມາລົງທຶນທັງພາຍໃນ ແລະ ຕ່າງປະເທດ ຈຳນວນ 132 ບໍລິສັດ, ມີທຶນທັງໝົດ 2,5 ຕື້ກວ່າໂດລາ, ທຶນຈົດທະບຽນ 443 ລ້ານກວ່າໂດລາ, ມີມູນການລົງທຶນຕົວຈິງພາຍໃນເຂດທັງໝົດ 2,4 ຕື້ກວ່າໂດລາ, ມີແຮງງານ 7.828 ຄົນ, ປະຕິບັດພັນທະ 203 ຕື້ກີບ. ວິສາຫະກິດທີ່ເຂົ້າມາເຊັ່ນ: ບໍລິສັດ ໂຮຢາລາວ ຈຳກັດ ຈາກປະເທດຢີປຸ່ນ, ໂຮງງານຜະລິດເລນແວ່ນຕາ ແລະ ແຜນຣາດດິດເພື່ອສົ່ງອອກ, ບໍລິສັດ ຄວາມຫວັງໃໝ່ ຈຳກັດ ຈາກປະເທດສິງກະໂປ ຜະລິດຫົວອາຫານສັດຈໍາໜ່າຍພາຍໃນປະເທດ, ບໍລິສັດ ເປ້ເຕີເຄື່ອງນຸ່ງຫົ່ມ ຈຳກັດ ຜະລິດເຄື່ອງນຸ່ງຫົ່ມສົ່ງອອກຕ່າງປະເທດ, ບໍລິສັດ ຈົງຫຼິ້ນເຕັກໂນໂລຊີ ຈຳກັດຜູ້ດຽວ ຜະລິດແຜ່ນໂຊລ່າເຊວ, ບໍລິສັດ ຟາມາກຣຸບ ຈຳກັດ ຜະລິດຕະພັນການແພດ ແລະ ບໍລິສັດອື່ນໆ.
ໃນປີ 2023 ສາມາດດຶງດູດການລົງທຶນໃໝ່ 26 ບໍລິສັດ ທຽບໃສ່ປີ 2022 ເພີ່ມຂຶ້ນ 14 ບໍລິສັດ, ໂດຍມີແຜນ ລົງທຶນທັງໝົດ 319 ລ້ານໂດລາ, ທຶນຈົດທະບຽນ 21 ລ້ານໂດລາ ແລະ ມີມູນຄ່າການລົງທຶນ ຕົວຈິງ 138 ລ້ານໂດລາ, ປະຕິບັດພັນທະອາກອນຈໍານວນ 23 ຕື້ກີບ, ນຳເຂົ້າສິນຄ້າ ມູນຄ່າ 72 ລ້ານໂດລາ, ສົ່ງອອກສິນຄ້າ ມູນຄ່າ 64 ລ້ານໂດລາ, ມີແຮງງານ 7.828 ຄົນ. ປັດຈຸບັນເຂດໄດ້ສຸມໃສ່ ການພັດທະນາພື້ນຖານໂຄງລ່າງ, ສິ່ງອຳນວຍຄວາມສະດວກ ໃຫ້ແກ່ການລົງທຶນ ໃນໄລຍະທີ 2.
ໃນວັນດຽວກັນ, ທ່ານ ໂຈເຊ ຣາໂມສ ອໍຕ້າ ປະທານາທິບໍດີ ພ້ອມຄະນະ ຍັງໄດ້ຢ້ຽມຢາມມະຫາວິທະຍາໄລແຫ່ງຊາດ (ມຊ) ເພື່ອຂຶ້ນປາຖະກະຖາ ກ່ຽວກັບທິດທາງໃນການສົ່ງເສີມການພົວພັນ ແລະ ການຮ່ວມມື ລະຫວ່າງ ສປ ຕີມໍ-ເລສເຕ ແລະ ສປປ ລາວ ໃນຕໍ່ໜ້າ ໃຫ້ແກ່ ນັກຮຽນ-ນັກສຶກສາ ແລະ ພາກທຸລະກິດຂອງລາວ ແລະ ໄດ້ຢ້ຽມຢາມ ດ່ານສາກົນສິນຄ້າ ທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫຼວງວຽງຈັນ ຕື່ມອີກ.
(ຂ່າວ-ພາບ:ສຳນານ)
ຄໍາເຫັນ