ບັນຫາທີ 1. ດ້ານວຽກງານການເມືອງ ແລະ ການບໍລິຫານລັດ ການຈັດຕັ້ງປະຕິບັດມະຕິກອງປະຊຸມຄັ້ງປະຖົມມະລຶກ ໃຫ້ບັນດາຂະແໜງການ ກວດກາຄືນ ບັນດາວຽກງານທີ່ຍັງຄົງຄ້າງ, ສິ່ງໃດທີ່ຍັງຊັກຊ້າຕ້ອງໄດ້ເລັ່ງແກ້ໄຂ ໃຫ້ສຳເລັດຕາມກຳນົດເວລາ, ບໍ່ໃຫ້ປ່ອຍປະເປັນພັນທະຄ້າງຄາຂ້າມໄຕມາດ, ໂຄງການດຳເນີນງານ 5 ປີ (2026-2030) ຕ້ອງຮີບຮ້ອນເຜີຍແຜ່ ແລະ ຜັນຂະຫຍາຍໃຫ້ກາຍເປັນແຜນງານ, ໂຄງການລະອຽດ ຂອງແຕ່ລະພະແນກການ, ຕ້ອງເຮັດໃຫ້ພະນັກງານທຸກຂັ້ນກຳແໜ້ນເນື້ອໃນສຳຄັນ ເພື່ອຄວາມເປັນເອກະພາບໃນການປະຕິບັດ, ກົນໄກການປະສານງານ ແລະ ແບບແຜນວິທີເຮັດວຽກ ໃຫ້ປະຕິບັດຕາມຂໍ້ຕົກລົງ ວ່າດ້ວຍການປະສານງານ ລະຫວ່າງ ປະທານຄະນະກຳມະການປົກຄອງແຂວງ ກັບບັນດາຫ້ອງວ່າການ, ພະແນກການ ແລະ ທ້ອງຖິ່ນ ຢ່າງເຂັ້ມງວດ. ຕ້ອງຫຼຸດຜ່ອນຂັ້ນຕອນທີ່ບໍ່ຈຳເປັນ, ເສີມຂະຫຍາຍແບບແຜນເຮັດວຽກທີ່ທັນສະໄໝ, ມີຈຸດສຸມ ແລະ ມີປະສິດທິຜົນສູງ; ບັນຫາທີ 2. ດ້ານເສດຖະກິດ, ຊັບພະຍາກອນ ແລະ ພື້ນຖານໂຄງລ່າງ ການຄຸ້ມຄອງພະລັງງານ ແລະ ບໍ່ແຮ່ ຕ້ອງເພີ່ມທະວີການຕິດຕາມ, ກວດກາສະພາບຂາດແຄນນໍ້າມັນເຊື້ອໄຟຢ່າງໃກ້ຊິດ. ພ້ອມກັນນັ້ນ, ຕ້ອງເຂັ້ມງວດໃນການຄຸ້ມຄອງຊັບພະຍາກອນປ່າໄມ້ ແລະ ແຮ່ທາດ, ສະກັດກັ້ນການຂຸດຄົ້ນທີ່ຜິດກົດໝາຍ ຢ່າງເດັດຂາດ, ເລັ່ງປັບປຸງການຈັດຕັ້ງ ແລະ ເຄື່ອນໄຫວ ຂອງພະແນກການເງິນ. ສຸມໃສ່ການເກັບລາຍຮັບໃຫ້ຄົບຖ້ວນ, ຄຸ້ມຄອງລາຍຈ່າຍໃຫ້ປະຢັດມັດທະຍັດ. ສຳລັບບ້ວງເງິນລາຍຮັບເກີນແຜນ ປີ 2025, ຕ້ອງຈັດສັນເຂົ້າໃນວຽກງານບຸລິມະສິດ ແລະ ໂຄງການທີ່ມີຄວາມຈຳເປັນແທ້ໆ, ຊຸກຍູ້ການຜະລິດລະດູແລ້ງໃຫ້ແຂງແຮງ ເພື່ອເປັນສິນຄ້າສົ່ງອອກ. ຕິດຕາມຄວາມຄືບໜ້າການກໍ່ສ້າງເສັ້ນທາງຫຼວງໃຫ້ໄດ້ຕາມມາດຕະຖານເຕັກນິກ ແລະ ທັນຕາມກຳນົດເວລາ, ການຄຸ້ມຄອງໂຄງການລົງທຶນ (MOU) ຕ້ອງມີການແບ່ງຄວາມຮັບຜິດຊອບ ລະຫວ່າງ ສູນກາງ ແລະ ທ້ອງຖິ່ນໃຫ້ຈະແຈ້ງ ໃນການຕິດຕາມ ແລະ ຊຸກຍູ້ໂຄງການທີ່ໄດ້ເຊັນບົດບັນທຶກຄວາມເຂົ້າໃຈແລ້ວນັ້ນ ໃຫ້ເກີດດອກອອກຜົນ; ບັນຫາທີ 3. ດ້ານວຽກງານວັດທະນະທຳ-ສັງຄົມ ແລະ ປ້ອງກັນຊາດ-ປ້ອງກັນຄວາມສະຫງົບ ຕ້ອງເພີ່ມທະວີການແກ້ໄຂປະກົດການຫຍໍ້ທໍ້ໃນສັງຄົມ, ໂດຍສະເພາະບັນຫາຢາເສບຕິດ ແລະ ອຸບັດຕິເຫດຕາມທ້ອງຖະໜົນ, ປັບປຸງຍົກລະດັບການບໍລິການປິ່ນປົວ ຂອງແພດໝໍ ໃຫ້ມີຈັນຍາບັນ, ຮັບປະກັນການສະໜອງຢາ ແລະ ອຸປະກອນການແພດໃຫ້ໂຮງໝໍ ແລະ ສຸກສາລາ ຢ່າງພຽງພໍ, ເລີ່ມວາງແຜນກະກຽມຄວາມພ້ອມຮອບດ້ານ ເພື່ອເປັນເຈົ້າພາບຈັດງານກິລານັກຮຽນທົ່ວປະເທດ ໃນປີ 2027, ກະກຽມຄວາມພ້ອມໃນການປະກາດສ້າງຕັ້ງຕາແສງ ໃຫ້ຖືກຕ້ອງຕາມລະບຽບການ, ກະກຽມຈັດງານປະກວດນາງສັງຂານ ງານບຸນປີໃໝ່ລາວ ໃຫ້ມີບັນຍາກາດເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມ; ບັນຫາທີສ 4. ດ້ານວຽກງານບຸກຄະລາກອນ ແລະ ການຕ່າງປະເທດ ຕ້ອງກວດກາຄືນການບັນຈຸ ແລະ ຊັບຊ້ອນພະນັກງານ-ລັດຖະກອນ ໃຫ້ຖືກຕ້ອງຕາມຕຳແໜ່ງງານ, ເນັ້ນໃສ່ຄຸນນະພາບ ແລະ ຄວາມຮັບຜິດຊອບສູງ, ການຮ່ວມມືກັບ ສສ ຫວຽດນາມ ຕ້ອງເລັ່ງຜັນຂະຫຍາຍເນື້ອໃນບົດບັນທຶກ (MOU) ກັບບັນດາແຂວງເພື່ອນມິດ ໃຫ້ເປັນຮູບປະທຳ ໂດຍສະເພາະ ແມ່ນການກະກຽມຕ້ອນຮັບ ແລະ ເຮັດວຽກກັບຄະນະຜູ້ແທນ ທີ່ຈະມາຢ້ຽມຢາມ ແລະ ອວຍພອນປີໃໝ່ລາວ ໃຫ້ມີຄວາມສະໜິດສະໜົມ ແລະ ສົມກຽດ.
(ຂ່າວ: ພຸດທະສອນ)
ຄໍາເຫັນ