ທ່ານ ຫວາງຢີ້ ກ່າວວ່າ: ປີນີ້ແມ່ນປີທີ່ຈີນ ແລະ ເອີຣົບສ້າງຕັ້ງສາຍພົວພັນທາງການທູດຮ່ວມກັນຄົບຮອບ 50 ປີ, ທັງແມ່ນປີທີ່ອົງການສະຫະປະຊາຊາດສ້າງຕັ້ງຂຶ້ນຄົບຮອບ 80 ປີ. ການພົບປະລະຫວ່າງຜູ້ນຳຈີນກັບເອີຣົບທີ່ຈະຈັດຂຶ້ນໃນໄວໆນີ້ ເປັນການພົບປະທີ່ຈັດຂຶ້ນໃນໄລຍະເວລາສຳຄັນ. ຈີນຄອງຄອຍຈະຮ່ວມກັບເອີຣົບ ສະຫຼຸບບົດຮຽນທີ່ດີ ແລະ ສິ່ງບົ່ງບອກທີ່ສຳຄັນໃນການຂະຫຍາຍສາຍພົວພັນລະຫວ່າງຈີນ-ເອີຣົບຕະຫຼອດໄລຍະ 50 ປີຜ່ານມາ, ວາງແຜນການສົນທະນາ ແລະ ການຮ່ວມມືໃນ 50 ປີຕໍ່ໜ້າ ເພື່ອສົ່ງສັນຍານທີ່ຈະແຈ້ງ, ທາງບວກ ແລະ ຕັ້ງໜ້າໄປສູ່ພາຍນອກ. ຈີນສະໜັບສະໜູນຂະບວນການເຊື່ອມໂຍງເຂົ້າກັນຂອງເອີຣົບຢ່າງສະເໝີຕົ້ນສະເໝີປາຍ, ສອງຝ່າຍຕ້ອງຢຶດໝັ້ນລັດທິຫຼາຍຝ່າຍ ແລະ ການຄ້າເສລີ, ປົກປັກຮັກສາລະບຽບການສາກົນ ແລະ ຄວາມເປັນລະບຽບຂອງສາກົນ, ຊຸກຍູ້ການແກ້ໄຂຄວາມຂັດແຍ້ງສາກົນດ້ວຍສັນຕິວິທີ, ຮ່ວມກັນຮັບມືກັບການປ່ຽນແປງຂອງດິນຟ້າອາກາດ ແລະ ສິ່ງທ້າທາຍອື່ນໆຂອງໂລກ.
ທ່ານນາງ ວອນ ເດີ ເລເຢນ ກ່າວວ່າ: ເອີຣົບສຸມກຳລັງຂະຫຍາຍການພົວພັນລະຫວ່າງເອີຣົບ-ຈີນຢ່າງໝັ້ນທ່ຽງ, ມີລັກສະນະສ້າງສັນ ແລະ ການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດດ້ານການພັດທະນາເສດຖະກິດການຄ້າ, ຂ້າພະເຈົ້າຫວັງວ່າຈະລົງເລິກແລກປ່ຽນຄວາມເຫັນກັບຜູ້ນຳຈີນ ກ່ຽວກັບບັນຫາທີ່ສອງຝ່າຍສົນໃຈຮ່ວມກັນ ເພື່ອສົ່ງສັນຍານທີ່ເຂັ້ມແຂງຢ່າງຕັ້ງໜ້າໃຫ້ແກ່ໂລກ. ເອີຣົບຈະສືບຕໍ່ປະຕິບັດນະໂຍບາຍປະເທດຈີນດຽວ.
ຄໍາເຫັນ